سەنات توراعاسى – الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى ماۋلەن اشىمباەۆ الەمدىك جانە ءداستۇرلى دىندەر ليدەرلەرىنىڭ سەزى حالىقارالىق كۇن تارتىبىندەگى بىرەگەي باستاما جانە جاھاندىق دىنارالىق ديالوگتىڭ ناعىز ءتيىمدى تەتىگى ەكەنىن اتاپ ءوتتى.
سونداي-اق سەزد حاتشىلىعىنىڭ باسشىسى قازاقستان تاۋەلسىزدىك جىلدارىندا بەيبىتشىلىك پەن جالپىۇلتتىق ديالوگتىڭ وزىندىك مودەلىن قالىپتاستىرا العانىنا نازار اۋداردى. ول «بىرلىك ارالۋاندىقتا» قاعيداتىنا, ەلدىڭ بولاشاعى ءۇشىن ورتاق جاۋاپكەرشىلىككە جانە ەتنوسى مەن دىنىنە قاراماستان ازاماتتاردىڭ قۇقىقتارىن قۇرمەتتەۋ مەن قامتاماسىز ەتۋگە نەگىزدەلگەن.
«بيىل ءبىز قازاقستان تاۋەلسىزدىگىنىڭ 30 جىلدىعىن اتاپ وتەمىز. وسى كەزەڭدە بەيبىتشىلىكتىڭ, جالپىۇلتتىق بىرلىك پەن كونفەسسياارالىق ديالوگتىڭ وزىندىك مودەلىن قالىپتاستىرا الدىق. قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ نەگىزىن قالاعان بۇل باعدار ءوزىنىڭ تيىمدىلىگى مەن ومىرشەڭدىگىن دالەلدەپ ۇلگەردى. قازىرگى تاڭدا ەل پرەزيدەنتى قاسىم-جومارت توقاەۆتىڭ باسشىلىعىمەن ەتنوسارالىق جانە كونفەسسياارالىق كەلىسىمدى قامتاماسىز ەتۋ ساياساتى جالعاسىپ كەلەدى. ءبىز الەمدىك جانە ءداستۇرلى دىندەر ليدەرلەرىنىڭ سەزى مەن حاتشىلىق وتىرىسىن ابىروي-بەدەل جيناۋ ءۇشىن وتكىزبەيمىز. بۇل – قازاقستاندىق دامۋ جولىنىڭ ءبىرتۇتاس اجىراماس بولىگى», دەدى ماۋلەن اشىمباەۆ.
سونىمەن قاتار سەنات سپيكەرى بيىلعى حاتشىلىق وتىرىسى كۇردەلى جاعدايدا ءوتىپ جاتقانىن ايتىپ, وعان كوروناۆيرۋس پاندەمياسى مەن سوڭعى جىلداردا الەمدە باسقا دا جاھاندىق پروبلەمالاردىڭ ۋشىعا ءتۇسۋى سەبەپ ەكەنىن تىلگە تيەك ەتتى. ولاردىڭ قاتارىندا گەوساياسي جانە گەوەكونوميكالىق فاكتورلار مەن جاھاندىق قاۋىپسىزدىك جۇيەسىنىڭ بۇزىلۋى سالدارىنان تۋىنداعان حالىقارالىق شيەلەنىستىڭ كۇشەيۋى, قارۋ-جاراق جارىسىنىڭ ۇدەۋى جانە جاھاندىق ەكولوگيالىق كۇن تارتىبىندەگى تۇيتكىلدەر بار.
«وسىنداي جاعدايدا رۋحاني كوشباسشىلاردىڭ باستى مىندەتى قۇندىلىقتاردىڭ دۇرىس جۇيەسىن قالىپتاستىرۋ جانە ادامداردى بەيبىتشىلىك, ادامگەرشىلىك, قوعامدىق كەلىسىم, ءوزارا قولداۋ سياقتى يدەيالار اياسىنا توپتاستىرۋ بولۋى كەرەكتىگى ءسوزسىز. الەمدىك جانە ءداستۇرلى دىندەر ليدەرلەرى سەزىنىڭ نەگىزگى ماقساتى دا – وسى.
سوندىقتان بارشاڭىزعا ءبىزدىڭ فورۋمعا قاتىسىپ, بەلسەندى قولداۋ كورسەتكەندەرىڭىز ءۇشىن شىنايى العىسىمىزدى بىلدىرەمىز», دەدى سەزد حاتشىلىعىنىڭ باسشىسى.
