اشىلعان كۇنى-اق وبلىس ورتالىعىنان نۇر-سۇلتان, الماتى قالالارىنا ۇشاقتار ۇشتى. اعىمداعى جىلدىڭ مامىر ايىنان باستاپ وسكەمەن اۋەجايى «نۇرلى جول» مەملەكەتتىك باعدارلاماسى اياسىندا ۇشۋ-قونۋ جولاعىنىڭ كۇردەلى جوندەلۋىنە بايلانىستى جابىلدى. ۇشۋ-قونۋ جولاعىن ۇزارتۋ جانە كەڭەيتۋ بويىنشا جۇمىستار جۇرگىزىلدى.
– مەردىگەرلەر ۇشۋ-قونۋ جولاعىنداعى اسفالت-بەتون جابىنىن تولىعىمەن الماستىرىپ, ونى ۇلعايتۋ جۇمىستارىن جۇرگىزدى. ەندى ۇزىندىعى 2 800 مەتر, ەنى 60 مەتر. مۇنداي پارامەترلەر اۋەجايعا حالىقارالىق رەيستەردىڭ ۇلكەن لاينەرلەرىن قابىلداۋعا مۇمكىندىك بەرەدى. سونداي-اق جولاققا جارىق سيگنالدىق جابدىقتىڭ جاڭا زاماناۋي جۇيەسى ورناتىلدى, – دەيدى «وسكەمەن اۋەجايى» اق پرەزيدەنتى نيكولاي كورولەنكو.
اۋەجاي باسشىسىنىڭ ايتۋىنشا, سوڭعى رەت وسىنداي اۋقىمدى جۇمىستار وبلىس ورتالىعىنىڭ اۋە ايلاعىندا 1996 جىلى جۇرگىزىلىپتى. 25 جىلعا جۋىق كۇردەلى جوندەۋ جۇرگىزىلمەگەن ايلاق ابدەن ەسكىرگەن. سوندىقتان دا جوندەۋ جۇمىستارى جەدەل تۇردە قاجەت بولدى. بارلىق جۇمىستار اياقتالعان سوڭ ارنايى كوميسسيا قابىلدادى. قۇرامىنا جول قۇرىلىسى ماماندارىمەن قاتار, ازاماتتىق اۆياتسيا كوميتەتىنىڭ وكىلدەرى دە بولدى.
ايتا كەتسەك, تەكسەرۋ جۇمىستارى 15-21 قىركۇيەك ارالىعىندا جارىق سيگنالدىق جانە اەروناۆيگاتسيالىق جابدىقتار جۇيەسىنەن باستالدى. قازىرگى ۋاقىتتا Air Astana, SCAT جانە Qazaq Air اۆياكومپانيالارىنىڭ ءۇش باعىتتاعى, ياعني نۇر-سۇلتان, الماتى جانە قاراعاندى رەيستەرى جاڭارتىلۋدا. جاقىن ارادا باعىتتار سانى دا, وبلىس ورتالىعىنا جانە ودان ۇشاتىن اۆياكومپانيالار سانى دا ارتادى.
ال اۋەجايدىڭ جۇك الەۋەتىن ارتتىرۋ ءۇشىن بيىل 30 توننالىق جۇك تەرمينالى مەن سىيىمدىلىعى 100 توننا ۋاقىتشا ساقتاۋ قويماسىنىڭ قۇرىلىسىن اياقتاۋ جوسپاردا بار. مۇنداي شارالار وتكىزۋ قابىلەتىن جاقسارتۋدى قامتاماسىز ەتەدى جانە جۇك اۆياتاسىمالدارىن دامىتۋعا مۇمكىندىك بەرەدى.
