كەزدەسۋلەر بارىسىندا سەنات سپيكەرى قازاقستاندا ۇلتارالىق جانە كونفەسسياارالىق توزىمدىلىك, سونداي-اق, ءوزارا تۇسىنىستىك پەن ديالوگ ەلىمىزدەگى قوعامدىق كەلىسىمدى ساقتاۋدىڭ اسا ماڭىزدى شارتى سانالاتىنىن اتاپ ءوتتى.
«ەلىمىزدە 18 ءدىن مەن كونفەسسيانى ۇستاناتىن 100-دەن استام ەتنيكالىق توپ وكىلدەرى بەيبىت ءومىر سۇرۋدە. ەتنوسارالىق بەيبىتشىلىك پەن كەلىسىم, وزگە ءدىني كوزقاراستارعا دەگەن قۇرمەت قازاقستاندىق مادەنيەت پەن مەنتاليتەتتىڭ اجىراماس بولىگىنە اينالدى», دەدى ماۋلەن اشىمباەۆ.
كاۆكاز مۇسىلماندارى باسقارماسىنىڭ توراعاسى شەيح-ۋل-يسلام اللاشۇكىر پاشا-زادەمەن سۇحبات كەزىندە تاراپتار دىنارالىق ديالوگ يدەيالارىن جاھاندىق دەڭگەيدە ىلگەرىلەتۋدە الەمدىك جانە ءداستۇرلى دىندەر ليدەرلەرىنىڭ سەزى مەن باكۋ ءدىن ليدەرلەرى فورۋمىنىڭ ماڭىزى زور ەكەنىن ايتتى. سونداي-اق ولار بۇل ەكى الاڭنىڭ ىنتىماقتاستىعىن نىعايتۋ ماسەلەلەرىن تالقىلادى.
انگليكان شىركەۋىنىڭ وكىلى, دوركينگ قالاسىنىڭ ەپيسكوپى دجو بەيلي ۋەللسپەن كەزدەسۋ كەزىندە ماۋلەن اشىمباەۆ فورۋمنىڭ گەوگرافياسى مەن كونفەسسيالىق وكىلدىگىن كەڭەيتۋ بويىنشا اتقارىلىپ جاتقان جۇمىستارعا نازار اۋداردى. سۇحبات بارىسىندا ەكى تاراپ حاتشىلىقتىڭ ءحىح وتىرىسىندا قابىلداناتىن شەشىمدەر الەمدىك جانە ءداستۇرلى دىندەر ليدەرلەرىنىڭ VII سەزىن جاڭا دەڭگەيگە كوتەرەتىنىنە سەنىم ءبىلدىردى.
ايتا كەتەيىك, اتالعان كەزدەسۋلەر ەرتەڭ نۇر-سۇلتان قالاسىندا وتەتىن الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ ءحىح وتىرىسى اياسىندا ۇيىمداستىرىلدى.
