ورتالىق كوممۋنيكاتسيالار قىزمەتىندە وتكەن بريفينگتە شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان وسىنداي مالىمەتتەر كەلتىردى. ءۇشىنشى مەگاپوليستە ىندەتتىڭ ىقتيمال تولقىنىنا ءۇش ستسەناري بويىنشا دايىندىق جۇرگىزىلگەن. «ا – اعىمداعى جاعداي 1 290 توسەكتىك ورىن. ۆ – ەپيدەميالىق جاعداي ناشارلاسا, توسەكتىك ورىن سانىن 4 016 دەيىن جەتكىزۋ. س – ەپيدەميالىق داعدارىس ورىن السا, 5 416 توسەكتىك ورىن اشۋ جوسپارلانعان. 1 363 توسەكتىك ورىن جاساقتالىپ تۇر. قالالىق دەنساۋلىق ساقتاۋ جۇيەسى ۆ ستسەناريىمەن جۇمىس ىستەۋدە. ەپيدەميالىق جاعدايدىڭ تۇراقتالۋىنا بايلانىستى 25 تامىزدان باستاپ 1 780 توسەكتىك ورىن جابىلدى. قازىرگى تاڭدا 496 ازامات ستاتسيونارلىق ەمدەلۋدە. توسەكتىك ورىن تولىمدىلىعى 36% قۇرايدى, 867 توسەكتىك ورىن بوس. جاڭساقتاۋ بولىمىندە 257 توسەكتىك ورىن بار, وندا 79 ازامات ەم قابىلداۋدا. تولىمدىلىق – 30%. جالپى, قالا ءۇش ستسەناريگە دە دايىن», دەدى ش.مۇقان.
شىمكەنتتىك ناۋقاستىڭ وتتەگى تاپشىلىعىنان قايتىس بولعانى جونىندە اقپارات الەۋمەتتىك جەلىدە تاراعان بولاتىن. جۋرناليستەردىڭ وسى وقيعاعا قاتىستى قويعان ساۋالىنا جاۋاپ بەرگەن قالا اكىمىنىڭ ءبىرىنشى ورىنباسارى بۇل ماسەلەمەن الەۋمەتتىك جەلىگە تاراعان بويدا اينالىسقانىن ايتتى. «بۇل مەكەمەنىڭ باسشىسى بۇكىل شىمكەنتتى وتتەگىمەن قامتاماسىز ەتۋگە جاۋاپتى بولاتىن. بىزدە سول ۋاقىتتا 25 ينفەكتسيالىق ستاتسيونار بولدى. بۇل اقپارات راستالمادى. مەنىڭ ءوزىم ارنايى بارىپ كوردىم. ونىڭ الدىندا دا كورگەنمىن. بۇل ستاتسيونار وتتەگىمەن تولىق قامتاماسىز ەتىلىپ تۇردى. بىزدە شىمكەنت قالاسىندا ءۇش جەردەن وتتەگى الىندى. سونىمەن بىرگە بىلتىر 7 ستاتسيوناردا الدىن الا سۇيىق وتتەگى رەزەرۆۋارىن ورناتقانبىز. سىيىمدىلىعى 8 تونناعا دەيىن بارادى, دەپ جاۋاپ بەردى ش.مۇقان. – كەي ستاتسيوناردا – 50, كەيبىرىندە 200 وتتەگى نۇكتەسى بار. كەلەڭسىز وقيعا ورىن الدى دەگەن ستاتسيوناردا 100-دەن استام نۇكتە بار. ءبىر ادامعا وتتەگى بارماي قالۋى مۇمكىن ەمەس. سەبەبى وتتەگىنى جالعايتىن ستانسا بولەك تۇرادى دا, سول جەردەن وتتەگى كەتكەندە 100 نۇكتەنىڭ بارىنە بىردەي بارادى. ال ەگەر وتتەگى تاۋسىلىپ قالعان بولسا, نۇكتەگە جالعانعان 100 ادامعا بىردەي بارماي قالار ەدى. سوندىقتان بۇل اقپارات راستالمادى». سونداي-اق ول ىندەتتىڭ ورشۋىنە ادامداردىڭ ءوز بەتىنشە ەمدەلۋى سەبەپ بولعانىن ايتتى. «ناۋقاستاردىڭ كوبى 15-16-شى, ءتىپتى 20-شى كۇندەرى اۋرۋحاناعا اۋىر جاعدايدا ءتۇسىپ جاتتى. ولار وسىنداي جەكە پراكتيكاداعى دارىگەرلەردە ەمدەلىپ, اۋىر انتيبيوتيكتەرمەن 1-2 كۋرس ەم قابىلداعان. ال ەم قونباعان سوڭ جەدەل جاردەم شاقىرتقان», دەدى قالا اكىمىنىڭ ورىنباسارى. مۇنداي جاعداي قايتالانباس ءۇشىن دەنساۋلىق ساقتاۋ سالاسىندا مەديتسينالىق اعارتۋ جۇمىستارى كۇشەيتىلمەك.
شىمكەنت قالاسىندا جىل باسىنان بەرى كوروناۆيرۋس جۇقتىرعان 34 416 ناۋقاس انىقتالدى. ەمدەلىپ شىققان ناۋقاستار سانى – 32 682, ال 1 294 ناۋقاس ەم قابىلداۋدا. كوروناۆيرۋس سالدارىنان جىل باسىنان بەرى 110 ادام كوز جۇمعان. باستاپقى مەديتسينالىق كومەك كورسەتۋ بويىنشا 36 ەمحانادا 211 ءموبيلدى بريگادا جاساقتالعان. ولار ءۇي جاعدايىندا ەم قابىلداپ جاتقان 798 ناۋقاسپەن جانە كوروناۆيرۋس جۇقتىرعاندارمەن قارىم-قاتىناستا بولعان 3 506 ادامعا مەديتسينالىق قىزمەت كورسەتۋدە. ستاتسيونارلاردا ءدارى-دارمەك جەتكىلىكتى, ەكى ايلىق قور جاساقتالعان جانە ول ۇدايى تەكسەرىلىپ, تولتىرىلىپ وتىرادى. بيىل 1 قاڭتاردان باستاپ 30 قىركۇيەككە دەيىن 38 379 نىسان مونيتورينگ جۇمىستارىمەن قامتىلعان. مونيتورينگ قورىتىندىسى بويىنشا 2 462 جاۋاپتى تۇلعاعا حاتتاما تولتىرىلىپ, ايىپپۇل سالىندى. سوتتىڭ شەشىمىمەن 21 نىساننىڭ جۇمىسى ۋاقىتشا توقتاتىلعان. Ashyq جوباسى بويىنشا شىمكەنتتە 8 571 نىسان جۇمىس ىستەيدى. «قىزىل» جانە «سارى» ستاتۋسى بولا تۇرىپ نىساندارعا بارعان جەكە تۇلعالار تۋرالى 2 421 حابارلاما ءتۇستى. شىمكەنت قالاسى بويىنشا انىقتالعانى – 2 089. باسقا وبلىستاردان كەلىپ انىقتالعان جەكە تۇلعالار – 332. ولار بويىنشا سانيتارلىق-پروفيلاكتيكالىق ءىس-شارالار اتقارۋ ءۇشىن اۋماقتىق دەپارتامەنتتەرگە حاتتار جولداندى. بۇل جۇمىس جالعاسۋدا», دەدى ش.مۇقان.
قالادا 45 ەگۋ نىسانى بار. ءبىرىنشى كومپونەنتپەن 526 689, 2-كومپونەنتپەن – 426 388 ادام ەگىلدى. جالپى, ۆاكتسينالاۋعا جاتاتىن كونتينگەنتتىڭ 98,3% ەكپەنىڭ 1-كومپونەنتىن العان. ايدىڭ سوڭعى كۇنى, ياعني 30 قىركۇيەكتە كۆي-ءدىڭ 79 جاعدايى تىركەلىپ, 42 ادام ينفەكتسيالىق ستاتسيونارعا جاتقىزىلسا, 37-ءى ءۇي باقىلاۋىنا الىنعان.
شىمكەنت
