قازاقستان • 04 قازان، 2021

مادەني بايلانىس نىعايدى

44 رەت كورسەتىلدى

قازان ايى قازاقستاندا بەلارۋس رەسپۋب­ليكاسىنىڭ مادەنيەت كۇندەرى اياسىندا ەلوردا جۇرتشىلىعى «كەرۋەن» ويىن-ساۋىق جانە ساۋدا ورتالىعىنداعى كينوتەاتردان 10-نان استام بەلارۋس ءفيلمىن تەگىن تاماشالادى.

كينو كۇندەرىنىڭ شىمىلدىعى رەجيسسەر دميتري استراحاننىڭ «ديۆەرسانتتىڭ تاعدىرى» فيلمىمەن اشىلدى.

«ەكى ەل اراسىنداعى ىنتىماقتاستىق قارىم-قا­تى­ناستىڭ ىرگەسى بەرىك. سونىڭ ىشىندە مادەني قا­رىم-قاتىناس تا بار. قازاقستان بەلارۋستە وتەتىن ءىرى ما­دەني-اعارتۋ ءىس-شارالارىنا بەلسەنە قاتىسىپ كەلەدى. ودان بولەك، بىزدە مەملەكەت بيۋدجەتىنەن بەلا­­رۋس ەلىمەن بىرلەسىپ فيلم تۇسىرۋگە قارجى قاراس­تى­رىلعان»، دەدى مادەنيەت جانە سپورت ۆيتسە-ءمينيسترى نۇر­عيسا داۋەشوۆ.

قازاقستانداعى بەلارۋس رەسپۋبليكاسىنىڭ تو­تەن­شە جانە وكىلەتتى ەلشىسى پاۆەل ۋتيۋپين سول ەل­دە العاش رەت 2013 جىلى قازاقستاننىڭ مادە­نيەت كۇندەرى اتالىپ وتىلگەنىن ايتتى. «نۇر-سۇل­تان قا­لا­سىنداعى مادەنيەت كۇندەرىن وتاندىق فيلم­دەرى­مىزدى ۇسىنۋدان باستايمىز. قازاقستاندىق كو­رەر­مەندەرگە تاريحي، كوركەم جانە انيماتسيالىق فيلم­دەر كورسەتىلەتىن بولادى. كينوتۋىندىلار قازاقستاندىقتاردىڭ كوڭىلىنەن شىعادى دەپ ويلايمىز. سول سياقتى فيلمدەردى تاماشالاۋ ارقىلى بەلارۋس حالقىن جاقىنىراق تاني الاسىزدار دەگەن ۇمىتتەمىن»، دەدى ول.

سونداي-اق ەلشىنىڭ ايتۋىنشا، «قازاقفيلم» مەن «بەلارۋسفيلم» بىرلەسىپ «1941 جىلدىڭ جازى» اتتى تاريحي فيلم تۇسىرگەن.

«ەكىنشى دۇنيەجۇزىلىك سوعىس – بەلارۋس پەن قازاق­ستانعا ورتاق قاسىرەت. تيىسىنشە جەڭىس تە – بۇكىل كسرو ەل­دەرىنە ورتاق. وكىنىشكە قاراي، ۇلى وتان سوعىسىنا اتت­انعان ءاربىر ءۇشىنشى بەلارۋس ورالمادى. سوعىس كەزىندە بەل­ارۋس اۋماعىن ازات ەتۋ جولىندا كۇرەسكەن 80-نەن استام قازاق­ستاندىق ءتۇرلى دارەجەدەگى ماراپاتقا يە بولدى. ۇلى وتان سوعىسى تاقىرىبى ورتاق بولعاندىقتان بەلارۋس پەن قازاقستان بىرلەسكەن جوبالاردى قولعا الىپ جاتىر. سونىڭ ءبىرى – بيىل جازدا «قازاقفيلم» مەن «بەلارۋسفيلم» بىرلەسىپ «1941 جىلدىڭ جازى» اتتى فيلم ءتۇسىردى. جۋىردا تۇساۋ­كەسەرى وتەدى دەپ جوسپارلانىپ وتىر»، دەدى پاۆەل ۋتيۋپين. اتالعان فيلم قازاقستاندىق پارتيزان ءادي ءشارىپوۆ تۋرالى بولماق.

بۇدان بولەك، بەلارۋس مادەنيەتى كۇندەرى اياسىندا ۇلتتىق مۋزەيدە بەلارۋس جاس سۋرەتشىلەرىنىڭ كورمەسى اشىلدى. كورمەگە قازىرگى بەلارۋستى بەينەلەيتىن تۋىندىلار قويىلعان. سونىمەن قاتار بەلارۋس ەسترادا جۇلدىزدارىنىڭ قاتىسۋىمەن گالا-كونتسەرت ءوتتى.

سوڭعى جاڭالىقتار

تاعى 1650 قازاقستاندىق ىندەت جۇقتىردى

كوروناۆيرۋس • بۇگىن، 09:00

سوفيادان ولجالى ورالدى

سپورت • بۇگىن، 08:40

ۇقساس جاڭالىقتار