بىشكەك پوليتسيا ءبولىمى دانيار يبراەۆقا قاتىستى قىلمىستىق ءىستىڭ جابىلماعانىن جانە ءالى دە تەرگەۋ ءجۇرىپ جاتقانىن اتاپ ءوتتى. يبراەۆ مەملەكەتارالىق ىزدەۋدە. ءىس ماتەريالدارى كۇدىكتىنى ەكستراديتسيالاۋمەن اينالىساتىن قىرعىز رەسپۋبليكاسىنىڭ باس پروكۋراتۋراسىنا بەرىلدى. سەبەبى ول بولگاريادا ۇستالعان. ەندىگى ماسەلە ەلگە الدىرتۋ.
ەستەرىڭىزگە سالا كەتەيىك, بۇعان دەيىن بىشكەك پوليتسياسى «سترويمير» سەرىكتەستىگىنىڭ 1992 جىلى تۋعان باس ديرەكتورى دانيار ساماتبەك ۇلى يبراەۆتىڭ «2018 جىلدىڭ جەلتوقسانىنان 2019 جىلعا دەيىن قۇرىلىس ارماتۋراسىن جەتكىزەمىز» دەپ جەتى ادامنان اقشا الىپ كەتكەنىن حابارلاعان بولاتىن. شىعىننىڭ جالپى سوماسى 507 ميلليون 352 مىڭ 49 سوم بولدى.
2019 جىلدىڭ 24 جەلتوقسانىندا دانيار يبراەۆ سىرتتاي الاياقتىق جاسادى دەگەن كۇدىككە الىندى. سول كۇنى بىشكەكتىڭ سۆەردلوۆ اۋداندىق سوتى سىرتتاي بۇلتارتپاۋ شاراسىن تاعايىندادى. 2019 جىلدىڭ 26 جەلتوقسانىندا وعان ينتەرپولدى قوسقاندا حالىقارالىق ىزدەۋ جاريالاندى. 2020 جىلدىڭ 28 اقپانىندا ول سوفيادا (بولگاريا) ۇستالدى. ىزدەۋدە جۇرگەن ادامدى قىرعىزستانعا ەكستراديتسيالاۋ پروتسەسى باستالدى.
