اعىلشىن جازۋشىسى دجوردج مۋر دەگا تۋرالى ماقالا جازۋدى ويلاپ, شەبەرحاناسىنا كەلگەندە داڭقتى سۋرەتشى: «مەنى جايىما قالدىرىڭىز! ءسىز مەنىڭ كيىمىلگىشتەگى كويلەكتەرىمدى ساناۋعا كەلدىڭىز بە؟», دەپ دۇرسە قويا بەرەدى. قاپيادا مۇنداي ءسوز كۇتپەگەن قالامگەر: «جوق, مىرزا, ءبارى ءسىزدىڭ ونەرىڭىز ءۇشىن...», دەيدى ساسقالاقتاپ. سوندا دەگا: ء«سىز ەشقاشان كورمەگەن كارتينالاردىڭ ارتىقشىلىعىن قالاي تۇسىندىرە الاسىز؟ ونەردى ءتۇسىنۋ ءۇشىن ءسوز قاجەت ەمەس», دەپ شىعارىپ سالادى.
بىربەتكەي سۋرەتشىنىڭ بۇل ادەتى كۇنى بۇگىنگە دەيىن ءسوز بولىپ كەلەدى. ويلى سونەتتەر جازىپ, جاس اقىن-جازۋشىلاردى جانىنا ءۇيىر ەتكەن سۇڭعىلا سۋرەتكەر جالعىزدىقتى جاقسى كورگەن. ونىڭ دۇشپانى – سۇلۋلىق. «بارلىق قاسىرەت – ايەلدەن» دەپ تۇسىنگەن. ول ول ما, ادەبيەتپەن اۋەستەنۋ سۋرەتشىلەرگە كەدەرگى كەلتىرەتىنىن ايتادى. «ارتىق ءسوز سۋرەتشىگە بوس اۋرەشىلىكتى جۇقتىرادى. ول قوعامدىق تالعامدى ينەنىڭ جاسۋىنداي بولسا دا جاقسارتپايدى. وقىرمان كارتينانى گازەتتەن وقىعان ماقالادان كەيىن اسەرلەنىپ ساتىپ المايدى, ونەردەن حابارى بار الدەبىر دوسىنىڭ: «ون جىلدان كەيىن بۇل كارتينانى ەكى ەسە قىمبات بولادى» دەگەن ءبىر اۋىز ءسوزى ءۇشىن ساتىپ الادى», دەيدى بۇكپەسىز سويلەپ.
ءبىز مىسالعا الىپ وتىرعان وسى وقيعا سۋرەتشىنىڭ قانداي ادام بولعانىنان حابار بەرىپ تۇرعانداي. بۇل – ونىڭ شىعارماشىلىق مىنەزى. سەنبەسەڭىز, «جۇلدىز» كارتيناسىنا كوز سالىڭىزشى. ستاتيكالىق سۋرەتتە بالەرينانىڭ داڭق تولقىنى مەن جۇرتشىلىقتىڭ قوشەمەتىنە تولى ءساتىن قالاي قاعىپ العان دەسەڭىزشى. كەيىپكەرى ءوز ونەرىنىڭ ءلاززاتىنا قانىققان جانە اۋەننىڭ ءالديى مەن كورەرمەننىڭ ىقىلاسىنان كوككە ۇشىپ كەتەردەي قالىقتاپ تۇر.
ءبيشى قىز بەيمالىم جاراتىلىس سەكىلدى كولەڭكەسى كورىنبەيدى. ساحنادا شىر اينالعان ەلەستەي... ينتەرەردىڭ اينالاسىنداعى بولشەكتەردى سىزباستان بۇرىن, سۋرەتشى ءبيشىنى جەردەگى شىندىقتان ءبولىپ العانداي. ارت جاعىنداعى بالەرينالار كۇزگى ورماندا اداسىپ جۇرگەندەي پەردە ىشىندە ب ۇلىڭعىرلاۋ بەينەلەنگەن.
دەگاستىڭ بالەتكە ارنالعان بارلىق تۋىندىسىندا ايەلدىڭ تاباندىلىعى مەن باتىلدىعىنا جاناشىرلىق جاسىرىنىپ جاتىر. ونىڭ سومداعان بەينەلەرىنىڭ ىشىندە ەڭبەك, باقىتسىزدىق, جاراقات, كەيدە ءولىم تۇرعانىن اڭدايسىز. مۇندا باقىتتىڭ كوز جاسى مەن بالەت پريماسىنىڭ ازابى بار.
ونىڭ دوسى – جالعىزدىق, دۇشپانى – سۇلۋلىق. سول سۇلۋلىققا ءوش بولا ءجۇرىپ, ونى ماڭگىلىك كەيىپكەرىنە اينالدىرا الدى.
