اقتوبە وبلىسىنىڭ سىبايلاس جەمقورلىققا قارسى قىزمەتىنىڭ حابارلاۋىنشا, بيىلعى جىلى 3 اقتوبەلىككە جالپى سوماسى 482 590 تەڭگەنى قۇرايتىن سىياقى تاعايىندالعان. ولار انتيكورعا اۋىرلىعى ورتاشا قىلمىستار تۋرالى حابارلاعان.
«ارينە, بۇل بيزنەس جاساۋدىڭ كوزى ەمەس. ءاربىر كەلىپ تۇسكەن اقپارات مۇقيات تەكسەرىلەدى. بىرجولعى كوتەرمەلەۋ ازامات بەرگەن اقپارات شىندىققا سايكەس بولعان جاعدايدا نەمەسە سىبايلاس جەمقورلىققا قارسى ءىس-قيمىلدا وزگە دە جولمەن كورسەتىلگەن جاردەمى جەمقورلىق قۇقىق بۇزۋشىلىقتى انىقتاۋعا, جولىن كەسۋگە, اشۋعا جانە تەرگەۋگە ىقپال ەتكەن بولسا جانە ايىپتى ادامعا قاتىستى سوتتىڭ اكىمشىلىك جازا قولدانۋ تۋرالى قاۋلىسى, قىلمىستىق ءىس بويىنشا زاڭدى كۇشىنە ەنگەن ايىپتاۋ ۇكىمى بولعان نەمەسە قىلمىستىق ءىس اقتالمايتىن نەگىزدەر بويىنشا توقتاتىلعان جاعدايدا عانا تولەنەدى», دەپ اتاپ وتتى وبلىستىق انتيكوردا.
پارانىڭ, كەلتىرىلگەن زالالدىڭ سوماسى نە ۇسىنىلعان جەڭىلدىك, كورسەتىلگەن قىزمەت قۇنى 1000 اەك-تەن اسپايتىن نەمەسە زالالى جوق سىبايلاس جەمقورلىق بويىنشا تاعايىندالاتىن بىرجولعى اقشالاي سىياقى سوماسى 30-100 اەك اراسىندا بەلگىلەنەدى. ياعني, بۇل بۇگىنگى ولشەمدەرگە سايكەس 87 510 تەڭگەدەن 291 700 تەڭگەگە دەيىنگى سومانى قامتيدى.
ماسەلەن, سىبايلاس جەمقورلىق تۋرالى اكىمشىلىك ىستەر بويىنشا - 30 اەك, ونشا اۋىر ەمەس سىبايلاس جەمقورلىق قىلمىستارى بويىنشا - 40 اەك, اۋىرلىعى ورتاشا قىلمىستىق ىستەر بويىنشا - 50 اەك, اۋىر قىلمىستىق ىستەر بويىنشا - 70 اەك جانە اسا اۋىر قىلمىستار بويىنشا 100 اەك مولشەرىندەگى سىياقى قاراستىرىلعان.
ال ەگەر 1000 اەك-تەن اساتىن بولسا بەرىلەتىن سىياقى اتالعان سومانىڭ 10% قۇرايدى, بىراق 4000 اەك-تەن (11 668 000 تەڭگەدەن) اسپايدى.
جەمقورلىق تۋرالى حابارلاعان ازامات بىرجولعى سىياقىدان باس تارتقان جاعدايدا, گراموتامەن ماراپاتتالۋى مۇمكىن.
ء«وز كەزەگىندە, سىبايلاس جەمقورلىققا قارسى قىزمەت ازاماتتاردى جەمقورلىقتىڭ كەز كەلگەن كورىنىستەرى بويىنشا 1424 رەسپۋبليكالىق كول-ورتالىعىنا حابارلاۋعا شاقىرادى. قوڭىراۋ شالۋ تەگىن», دەپ جازىلعان حابارلامادا.
