ەندى ازاماتتار حقو ارقىلى تىركەلگەن كەزدە تۇرعىن ءۇي يەسى ءوز تەلەفونىنا تىركەلگەن ادامنىڭ دەرەكتەرى كورسەتىلگەن حابارلاما الادى. ەگەر باسپانا يەسى ۇيىندە تۇراتىن ادامدى تىركەۋدەن شىعارعىسى كەلسە, ەكىنشى تاراپقا دا تىركەۋدەن شىعارىلعانى تۋرالى حابارلاما بارادى.
«قازاقستاندىقتار ماعان ۇيلەرىندە بەيتانىس ادامداردىڭ تىركەلگەنى تۋرالى ءجيى جازىپ جاتادى. اتالعان جاڭا سەرۆيس بۇل ماسەلەنى شەشۋگە ءتيىس. ەگەر بىرەۋ ءسىزدىڭ قاتىسۋىنسىز حقو ارقىلى ۇيىڭىزگە بوگدە ادامدى تىركەۋگە تىرىسسا, ءسىز بۇل تۋرالى SMS-حابارلاما ارقىلى بىردەن بىلە الاسىز. سەرۆيس اقىلى تۇردە تىركەۋدى ۇسىناتىن دەلدالدارعا قارسى كۇرەستە كومەكتەسەدى», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين.
«ازاماتتارعا ارنالعان ۇكىمەت» مەملەكەتتىك كورپوراتسياسى ازاماتتارعا تۇرعىلىقتى تىركەۋ قىزمەتىن 2019 جىلدان بەرى كورسەتىپ كەلەدى. بۇعان دەيىن ونىمەن حقو-دا ورنالاسقان كوشى-قون قىزمەتىنىڭ ماماندارى اينالىسقان بولاتىن. ازاماتتاردى تۇرعىلىقتى جەرى بويىنشا eGov پورتالى ارقىلى دا ونلاين تىركەۋگە نەمەسە تىركەۋدەن شىعارۋعا بولادى. ول ءۇشىن تۇرعىن ءۇي يەسى مەن تىركەلگەن ادامنىڭ ەلەكتروندى تسيفرلى قولتاڭباسى (ەتسق) بولۋى كەرەك.
«ەگەمەن-اقپارات»
