كەزدەسۋ بارىسىندا پارلامەنتارالىق ىنتىماقتاستىقتى دامىتۋدىڭ كەلەشەگى, ناقتى ايتقاندا, ەكى ەلدە جۇرگىزىلىپ جاتقان رەفورمالاردى قۇقىقتىق قامتاماسىز ەتۋدەگى زاڭ شىعارۋ جۇمىستارى بويىنشا تاجىريبە الماسۋ ماسەلەلەرى ءسوز بولدى.
«ازەربايجان – قازاقستاننىڭ ستراتەگيالىق سەرىكتەسى. ءبىزدىڭ تاريحىمىز ورتاق, تامىرىمىز ءبىر. ەلىمىز بەن حالقىمىزدى عاسىرلارعا جالعاسقان بەرىك دوستىق جانە ورتاق مادەنيەت پەن ءداستۇر بايلانىستىرادى. ەكى ەلدىڭ پارلامەنتىندە ىنتىماقتاستىق توپتارى قۇرىلدى. زاڭ شىعارۋ جۇمىسىندا ەلىمىزدە جۇرگىزىلىپ جاتقان رەفورمالاردى قۇقىقتىق قامتاماسىز ەتۋ باعىتى بويىنشا تاجىريبە الماسۋدىڭ ماڭىزى زور. پاندەمياعا بايلانىستى جاعدايدىڭ تۇراقتالۋىنا قاراي سالالىق كوميتەتتەردىڭ كونسۋلتاتسياسىن جانە وزەكتى ماسەلەلەر بويىنشا بىرلەسكەن «دوڭگەلەك ۇستەلدى» جيىرەك ۇيىمداستىرۋعا بولادى», دەدى ماۋلەن اشىمباەۆ.
سونداي-اق سەنات سپيكەرى قازاقستان پارلامەنتىنىڭ دەپۋتاتتارى ازەربايجاندىق ارىپتەستەرىمەن تمد پاا, ەقىۇ پا جانە پارلامەنتارالىق وداق سياقتى حالىقارالىق پارلامەنتتىك الاڭداردا ءوزارا ءتيىمدى ىنتىماقتاستىقتى نىعايتۋعا باسا ءمان بەرەتىنىن اتاپ ءوتتى. سۇحبات بارىسىندا ماۋلەن اشىمباەۆ ارىپتەسىن كەلەسى جىلى الماتىدا وتەتىن تمد پاا كەڭەسىنىڭ مەرەيتويلىق سەسسياسىنا قاتىسۋعا شاقىردى.
سونىمەن قاتار كەزدەسۋدە ەكونوميكا, ساۋدا, كولىك, ەنەرگەتيكا, ونەركاسىپ, اۋىلشارۋاشىلىعى جانە مادەني-گۋمانيتارلىق باعىتتار بويىنشا ەكىجاقتى ءوزارا ءىس-قيمىلدى كەڭەيتۋ ماسەلەلەرى تالقىلاندى.
شارا سوڭىندا سەنات توراعاسى قازاقستان مەن ازەربايجان پارلامەنتتەرى اراسىنداعى ءوزارا بايلانىس ەكى مەملەكەتتىڭ ىنتىماقتاستىعىن نىعايتۋ اياسىندا كەڭەيە تۇسەتىنىنە سەنىم ءبىلدىردى.
