27 قىركۇيەك كۇنى تاڭەرتەڭ پرەزيدەنت گۋربانگۋلى بەردىمۇحامەدوۆ پەن شەنەۋنىكتەر تاۋەلسىزدىك مونۋمەنتىنە گۇل شوقتارىن قويدى. «حرونيكا تۋركمەنيستانا» مەملەكەتتىك اقپاراتتىق اگەنتتىگىنىڭ حابارلاۋىنشا, راسىمگە ديپلوماتتار مەن شەتەلدىك قوناقتار دا قاتىستى.
سودان كەيىن جاڭا مىنبەردە سالتاناتتى شەرۋ باستالدى.
اتالعان مىنبەر 16 قىركۇيەكتە اشحابادتىڭ وڭتۇستىگىندە اشىلدى. ونى سالۋعا 109,3 ميلليون دوللار جۇمسالعان. قۇرىلىسىن فرانتسۋزدىق Bouygues كومپانياسى جۇرگىزدى, ونىڭ باسشىسى مارتين بۋيگەز بەردىمۋحامەدوۆتى تاۋەلسىزدىكتىڭ 30 جىلدىعىمەن جەكە قۇتتىقتاۋ ءۇشىن تۇركىمەنستانعا ارنايى كەلدى.
بيىلعى تاۋەلسىزدىك كۇنىنە ارنالعان شارانىڭ وتكەن جىلداردان ايىرماشىلىعى - بەردىمۇحامەدوۆ ارنايى جاساقتالعان اق ءتۇستى گەلەندۆاگەن كولىگىمەن مىنبەگە كەلىپ, مەملەكەتتىك قاۋىپسىزدىك كەڭەسىنىڭ حاتشىسى چارمىمىرات امانوۆتان راپورت قابىلدادى.
شەرۋ كەزىندە ءار ءتۇرلى اسكەري قارۋ مەن تەحنيكا كورسەتىلدى.
شەرۋدەن كەيىن الاڭعا زەرگەرلىك بۇيىمدار كيگەن اقالتەكە جىلقىلارى شىعارىلدى. پرەزيدەنت گاراشسىز (تاۋەلسىز) اتتى جىلقىعا ءمىنىپ, قۇرمەت ءبىلدىردى, كورەرمەندەردىڭ قوشەمەتىنە بولەندى. ونى پرەزيدەنتكە قارۋلاس جولداستارى «وتاننىڭ وركەندەۋى, حالىقتىڭ باقىتى مەن اماندىعى جولىنداعى تىنىمسىز ەڭبەگى ءۇشىن تەرەڭ, شىنايى ريزاشىلىقتىڭ بەلگىسى رەتىندە» سىيلاعان.
وسىدان كەيىن «گالقىنىش» ۇلتتىق ات سپورتى ويىندارى توبىنىڭ شاباندوزدارى ونەر كورسەتتى.
مەرەكە «بيلىك پەن باقىت داۋىرىنە, ۇلى اركاداگ پەن تۇركىمەنستانعا ارنالعان» انمەن اياقتالدى. وسىدان كەيىن الاڭ ۇستىندە درون شوۋى مەن مەرەكەلىك وتشاشۋ بولدى.
2018 جىلعا دەيىن تۇركىمەنستاننىڭ تاۋەلسىزدىك كۇنى 27 قازاندا تويلانىپ كەلدى, بىراق 2017 جىلى اقساقالدار كەڭەسىنىڭ وتىرىسىنان كەيىن, بەلگىسىز سەبەپپەن مەرەكەنى ءبىر اي ىلگەرىگە جىلجىتۋ تۋرالى شەشىم قابىلداندى.
