كوشى-قون قىزمەتكەرلەرى «ۋچاسكە» جەدەل الدىن الۋ ءىس-شاراسى كەزىندە جەكە باسىن كۋالاندىراتىن قۇجاتتارسىز تۇراتىن, سونداي-اق 1974 جىلعى ۇلگىدەگى كسرو پاسپورتىن ۋاقتىلى الماستىرماعان ادامداردى انىقتاۋ جۇمىسى ءجۇرىپ جاتىر.
بۇل ادامدار جەكە باسىن كۋالاندىراتىن قۇجات بولماۋىنا بايلانىستى دەنساۋلىق ساقتاۋ, ءبىلىم بەرۋ قىزمەتىن الۋدا, قاجەتتى جاردەماقى مەن زەينەتاقىنى رەسىمدەۋدە شەكتەۋلى. سونىمەن قاتار رەسمي جۇمىسقا ورنالاسۋعا مۇمكىندىگى جوق.
جىل باسىنان بەرى 1974 جىلعى ۇلگىدەگى كسرو پاسپورتىمەن جۇرگەن 150-دەن استام ادام انىقتالدى.
«وسىلايشا, التاي اۋدانىنىڭ پوليتسيا بولىمىنە 49 جاستاعى ازامات جۇگىنىپ, ول 1988 جىلى ۋكراينادا بەرىلگەن 1974 جىلعى ۇلگىدەگى كسرو پاسپورتىمەن جۇرگەنىن ايتقان. ەر ادام قازاقستانعا 90-شى جىلدارى كەلىپ, وسكەمەن قالاسىندا اسكەري قىزمەتىن وتەگەن. جاڭا بۇقتىرما كەنتىندە جۇمىس ىستەپ, ءومىر سۇرگەن. 25 جىلدان استام ۋاقىت بويى قۇجاتتاردى جولداسا دا ۋكراينادان جاۋاپ كەلمەگەن», دەدى شقو پد باستىعى ساعات ماديەۆ.
كوشى-قون قىزمەتكەرلەرى قازاقستان رەسپۋبليكاسىنىڭ كونسۋلدىعى ارقىلى ۋكراينادان قاجەتتى قۇجاتتاردى سۇراتۋعا جاردەم كورسەتكەن. 17 قىركۇيەكتە ازاماتقا قر ازاماتىنىڭ جەكە كۋالىگى راسىمدەلدى.
«وسىعان بايلانىستى قانداي دا ءبىر سەبەپتەرمەن جەكە باسىن كۋالاندىراتىن قۇجاتتارى جوق ازاماتتارعا قازاقستان رەسپۋبليكاسى ازاماتىنىڭ نەمەسە ازاماتتىعى جوق ادامنىڭ جەكە كۋالىگىن رەسىمدەۋ ءۇشىن تۇرعىلىقتى جەرى بويىنشا كوشى-قون قىزمەتىنە جۇگىنۋگە كەڭەس بەرەمىز», دەپ جازادى Polisia.kz.
