اناتولي حراپاتىي كوشەسىندە ورنالاسقان جاڭا مەكتەپ 1200 وقۋشىعا ارنالعان.
وقۋ ورنىنىڭ رەسمي اشىلۋ سالتاناتىنا ەلوردا اكىمىنىڭ ورىنباسارى اسحات ورالوۆ جانە ەلىمىزدىڭ كورولدىك گۋمانيتارلىق قورىنىڭ باس حاتشىسى, دوكتور مۇستافا ءال-سايد باستاعان باحرەين كورولدىگىنىڭ دەلەگاتسياسى قاتىستى.
«بيىل ەلىمىز ءۇشىن ەرەكشە جىل. ەل تاۋەلسىزدىگىنىڭ 30 جىلدىعىن اتاپ وتۋدەمىز. مەرەيتوي قارساڭىندا ەلوردادا ۇلكەن جانە اۋقىمدى مەكتەپتىڭ قۇرىلىسى اياقتالىپ, وقۋ پروتسەسى باستالدى. وقۋشىلار مەن پەداگوگتاردى ءداستۇرلى فورماتتا وقۋ جىلىنىڭ باستالۋىمەن قۇتتىقتايمىز. پاندەمياعا بايلانىستى وقۋشىلار 1,5 جىلدان استام ۋاقىت قاشىقتان وقۋعا ءماجبۇر بولدى. قازىر وقۋشىلاردىڭ جوعارى دەڭگەيدە ءبىلىم الۋى ءۇشىن بارلىق جاعداي جاسالعان. ءبىز ارقاشان وسىنداي يدەيالار مەن الەۋمەتتىك جوبالاردى قولداۋعا دايىنبىز. بولاشاقتا باۋىرلاس ەلدەرمەن وسىنداي جوبالاردى ودان ءارى جۇزەگە اسىرۋدى جوسپارلاپ وتىرمىز», دەدى اسحات ورالوۆ.
جاڭا مەكتەپ عيماراتىندا 62 كابينەت جانە 11 زەرتحانا بار. مۇندا ەڭبەك كابينەتتەرى, قىش شەبەرحاناسى, 418 ورىندىق اسحانا, سپورت جانە اكت زالدارى, كوۆوركينگ ايماعى, لينگۆيستيكالىق كابينەتتەر جانە ت.ب. جابدىقتالعان.
مەكتەپ قازاق جانە ورىس تىلىندە وقىتادى. نەگىزگى وقىتۋ تىلدەرىنەن بولەك اراب, فرانتسۋز جانە نەمىس تىلدەرى دە وقىتىلادى.
عيماراتتىڭ ءۇشىنشى قاباتىندا 5 ەلدىڭ – قازاقستان, باحرەين كورولدىگى, ۇلىبريتانيا, فرانتسيا, گەرمانيا مادەنيەتىن دارىپتەيتىن مەكتەپ مۇراجايى ورنالاسقان. سونىمەن قاتار, مەكتەپ كىتاپحاناسىندا 5 ەلدىڭ كوركەم ادەبيەتى بار.
«وقۋشىلارىمىزدىڭ اراب, اعىلشىن, نەمىس, فرانتسۋز سياقتى شەت تىلدەرىن قوسىمشا وقۋىنا مۇمكىندىگى بار. ءبىزدىڭ كوپتىلدىلىك تۇجىرىمدامامىزدىڭ نەگىزىندە مەكتەپتىڭ ديزاينى دا راسىمدەلگەن. ءبىرىنشى قابات قازاق حاندىعى ستيلىنە بەزەندىرىلگەن, ەكىنشى قابات – باحرەين كورولدىگى, ءۇشىنشى قابات – فرانتسۋز ءتىلى, ءتورتىنشى قابات – نەمىس ءتىلى. ماقساتىمىز – بالالاردىڭ تولەرانتتى بولۋى جانە شەتەلدە وقۋ مۇمكىندىگىنە يە بولۋى, سول سياقتى باسقا ەلدەردىڭ مادەنيەتىنە دەگەن سۇيىسپەنشىلىگىن دامىتۋ. بىراق وسكەلەڭ ۇرپاقتىڭ ءوز ەلىنىڭ پاتريوتى بولۋىنا باسا كوڭىل بولىنەدى. مەكتەپ وقۋ ۇردىسىنە قاجەتتى بارلىق زاتتارمەن تولىق جابدىقتالعان, ۇلدار مەن قىزدارعا ارنالعان كوركەم ەڭبەك كابينەتتەرى بار. ونىڭ ىشىندە – تىگىن شەبەرحاناسى, اسپازدىق داعدىلاردى يگەرۋگە ارنالعان اس ءۇي, ستانوكتارى بار مەتالل جانە اعاش وڭدەۋ شەبەرحاناسى, قىش جانە ت.ب. بار», دەدى №91 مەكتەپ-گيمنازياسى ديرەكتورىنىڭ وقۋ-تاربيە ءىسى جونىندەگى ورىنباسارى گۇلنار احمەتوۆا.
قازىر مەكتەپتە 1 370 بالا وقيدى. وقىتۋ – تەگىن.
«2021 جىلى نۇر-سۇلتاندا بارلىعى 15 مەكتەپ پايدالانۋعا بەرىلەدى, بۇل 40 مىڭنان استام وقۋشى ورنىن قۇرايدى. ولاردىڭ كوپشىلىگى اشىلدى», دەپ جازادى قالا اكىمىنىڭ رەسمي سايتى.
