ونەر • 28 قىركۇيەك، 2021

باعزىدان جەتكەن بابا جىر

84 رەت كورسەتىلدى

قىزىلوردادا ەل تاۋەلسىزدىگىنىڭ 30 جىلدىعى مەن سىر سۇلەيى كەتە ءجۇسىپ ەشنياز­ ۇلىنىڭ تۋعانىنا 150 جىل تولۋىنا ارنالعان «جىرلانسىن، تاۋەلسىزدىك جىر بۇلاعى» اتتى رەسپۋبليكالىق جىرشى-جىراۋلار بايقاۋى ءوتتى. نارتاي بەكەجانوۆ اتىنداعى وبلىستىق مۋزىكالىق دراما تەاترىندا ۇيىمداستىرىلعان بايقاۋعا ەلىمىزدىڭ ءار تۇكپىرىنەن ءداستۇرلى ونەردى دارىپتەپ جۇرگەن ونەرپازدار قاتىسىپ، كورەرمەندى داڭعىل جىراۋدىڭ مول مۇراسىنان سۋسىنداتتى.

جىرشى-جىراۋلار بايقاۋىنىڭ اشىلۋ راسىمىندە وبلىس اكىمى گۇلشارا ابدىقالىقوۆا سايىسقا قاتىسۋشىلارعا ساتتىلىك تىلەدى.

– ەجەلگى ۇزانداردىڭ ءىزى قالعان، ءۇنى ساق­تالعان سىردا ءداستۇرلى جىردىڭ بايراعى بيىك تۇراتىنى بەلگىلى. قوبىز سارىنىنان دۇنيە تىلسىمىن ىزدەگەن قورقىتتان باستاۋ الاتىن باعزى ونەردىڭ رۋحاني قازىناعا اينالۋىنا ولشەۋسىز ەڭبەك ەتكەن شوراياقتىڭ ومارى، بالقى بازار، قاراساقال ەرىمبەت، كەتە ءجۇسىپ، ءدۇر وڭعار، تۇرماعامبەت، نۇرتۋعان مەن نارتايداي دۇلدۇلدەر دۇنيەگە كەلگەن توپى­راقتاعى بۇگىنگى جىر سايىسى ءداستۇرلى مۇرا­نىڭ وشپەيتىندىگىن ايعاقتايدى، – دەدى وبلىس اكىمى.

جىر دوداسىندا باعزى ونەردىڭ الەمدىك دەڭگەيدە ناسيحاتتالۋىنا ۇلەس قوسىپ، جىر كەرۋەنىنە تالاي تالانتتى شوعىردى تاربيەلەپ قوسقان بەلگىلى جىراۋ، قازاقستاننىڭ ەڭبەك سىڭىرگەن قايراتكەرى، قۇرمانعازى اتىنداعى قازاق ۇلتتىق كونسەرۆاتورياسى جانە قازاق ۇلتتىق ونەر ۋنيۆەرسيتەتىنىڭ پروفەسسورى الماس الماتوۆ، قازاقستاننىڭ ەڭبەك سىڭىرگەن قايراتكەرى، ونەرتانۋ عىلىمدارىنىڭ كانديداتى، قازاق ۇلتتىق ونەر ۋنيۆەرسيتەتىنىڭ پرو­فەسسورى ەلمۇرا جاڭابەرگەنوۆا، قا­زاقستاننىڭ ەڭبەك سىڭىرگەن قايراتكەرى، فيلو­لوگيا عىلىمدارىنىڭ كانديداتى، قۇر­مان­عازى اتىنداعى قازاق ۇلتتىق كونسەر­ۆاتو­رياسىنىڭ اعا وقىتۋشىسى ۇلجان باي­بوسىنوۆا، قوعام قايراتكەرى، ونەر جاناشىرى رزاقۇل نۇرتاەۆ، جىرشى-جىراۋ، «مادەنيەت سالاسىنىڭ ۇزدىگى» توسبەلگىسىنىڭ يەگەرى مايرا سارسەنباەۆا قازىلىق ەتتى.

جىر دوداسىنا اقتوبە قالاسىنان دەمەۋ­باي جولىمبەتوۆ، ماڭعىستاۋدان امانگەلدى ساڭكىباەۆ، كەرەكۋ وڭىرىنەن بوكەن جىگەر، الماتى قالاسىنان باقىت توعجانوۆا، قىزىل­وردا قالاسىنان ءادىلحان قۋاڭباەۆ، بولات بايمۇراتوۆ، سەرىك جاقسىعۇلوۆ، جاق­سان جانىبەك، ماليكا الدامجاروۆا، ارال اۋدانىنان ايبەك تاڭىربەرگەنوۆ پەن بەكسۇلتان ورىنباسار، شيەلىدەن مۇحامەدالى بەكپەيىسوۆ، قارماقشى اۋدانىنان الىشەر مىرزاعاليەۆ قاتىسىپ، ءجۇسىپ ەشنياز ۇلىنىڭ بۇرىن-سوڭدى كوپ ورىندالماي جۇرگەن ايتىس، تەرمەلەرى مەن ء«شاھزادا»، «سۇرمەرگەن»، «مەكەر قاتىن» داستاندارىن ورىندادى.

 قازىلار القاسىنىڭ توراعاسى الماس الماتوۆ سىر سۇلەيىنىڭ مول مۇراسىن ناسيحاتتاۋدا ءۇش بۋىن وكىلدەرىنىڭ باسىن قوسقان بۇگىنگى ءىس-شارا ايماقتىڭ مادەنيەت سالاسىنداعى ايتۋلى باستاماسىنىڭ ءبىرى بولعاندىعىن اتاپ ءوتتى.

– بۇرىن ورىنداۋشىلارىمىز كونتسەرتتىك جۇيە بويىنشا 4-5 مينۋت قانا ونەر كورسەتىپ، مۇمكىندىگىن تولىق كورسەتە الماي جاتاتىن. بۇل جولى ساحناعا شىققاندارعا جارتى ساعات ۋاقىت بەرىلدى. الدا جىرشى-جىراۋلاردىڭ الدىنا قوياتىن ماقسات، مىندەتتەر كۇردەلەنە بەرمەك. مىسالى، اقتوبە وبلىسىندا «قىرىم­نىڭ قىرىق باتىرىن» 30 جىرشى-جىراۋ

60 سا­عات جىرلادى. ونەر يەسىن كەمەلدەندىرىپ، شەبەرلىگىن شىڭداي تۇسەتىن وسىنداي باستاما سىردا دا قولعا الىنىپ جاتىر، – دەدى جىراۋ.

وسى كۇنى «جىرلانسىن، تاۋەلسىزدىك جىر بۇلاعى» اتتى رەسپۋبليكالىق بايقاۋ ءوز ما­رەسىنە جەتتى. قازىلار القاسىنىڭ شەشى­مىمەن باس جۇلدە ارالدىق ايبەك تاڭىر­بەرگەنوۆكە تابىستالدى. ءبىرىنشى ورىن قىزىل­وردالىق سەرىك جاقسىعۇلوۆقا بەرىلسە، ءىى ورىن­دى اقتوبەلىك دەمەۋباي جولىمبەتوۆ جەڭىپ الدى. ءىىى ورىندى پاۆلودار قالاسىنان بوكەن جىگەر، قىزىلوردا قالاسىنان جاقسان جانىبەك جانە ارال اۋدانىنان بەكسۇل­تان ورىن­باسار ءوزارا ءبولىستى. قالعان قاتىسۋ­شىلارعا ىنتالاندىرۋ سىيلىعى بۇيىردى.

سوڭعى جاڭالىقتار

جانى جايساڭ جاز-اتا

قوعام • كەشە

دۇبىردەن تۋعان ولەڭ

ادەبيەت • كەشە

ۇقساس جاڭالىقتار