پرەزيدەنت • 28 قىركۇيەك، 2021

پرەزيدەنت بۇۇ باس اسسامبلەياسىنىڭ جوعارى دەڭگەيدەگى پلەنارلىق وتىرىسىندا ءسوز سويلەدى

1782 رەت كورسەتىلدى

قاسىم-جومارت توقاەۆ ءوز سوزىندە كەيبىر ەلدەردە جاسالىپ جاتقان يادرولىق باعدارلامالاردىڭ قارقىن الۋىن ۇنەمى تونەتىن تەررورلىق قاۋىپ-قاتەرمەن بايلانىستىرىپ، اقىرزامان ورناتاتىن قارۋلاردىڭ قولدانىلۋ قاۋپى ارتا تۇسكەنىن اتاپ ءوتتى. قازاقستان پرەزيدەنتى دەگەنمەن بۇل باعىتتا بەلگىلى ءبىر دەڭگەيدە وڭ قادامدار جاسالىپ جاتقانىنا توقتالدى، دەپ حابارلايدى Egemen.kz اقورداعا سىلتەمە جاساپ.

– يادرولىق قارۋعا تىيىم سالۋ تۋرالى شارت كۇشىنە ەندى، يرانمەن اراداعى يادرولىق قارۋعا قاتىستى مامىلەنى قالىپقا كەلتىرۋ جونىندەگى كەلىسسوزدەر قايتا قارالۋدا، شابۋىلداۋعا ارنالعان قارۋلاردى ازايتۋ جونىندەگى جاڭا شارت ۇزارتىلدى، اقش پەن رەسەي اراسىندا ستراتەگيالىق تۇراقتىلىق تۋرالى بىرلەسكەن مالىمدەمە قابىلداندى. ارينە، ءوزارا جويۋعا كەپىلدىك بەرەتىن دوكترينا يادرولىق دەرجاۆالاردىڭ جۋىق ارادا ءوز ارسەنالىنان باس تارتۋى ەكىتالاي ەكەنىن بىلدىرەدى. سوندىقتان 2045 جىلعا دەيىن يادرولىق قارۋدان ازات، بەيبىت ءومىر قالىپتاستىرۋعا ۇمتىلاتىنىمىز تۋرالى مالىمدەي وتىرىپ، كوڭىلدەگىنى ناقتى ىسكە اسىراتىنىمىزعا سكەپتيكتەر كۇمانمەن قاراۋى مۇمكىن. ءبىزدىڭ تاريحي تاجىريبەمىز مۇنىڭ باسقاشا بولاتىنىن كورسەتەدى، – دەدى مەملەكەت باسشىسى.

قاسىم-جومارت توقاەۆ قازاقستاننىڭ سەمەي يادرولىق پوليگونىن جابۋ تۋرالى شەشىم قابىلداپ، يادرولىق قۋاتى جاعىنان ءتورتىنشى سانالاتىن ارسەنالىنان باس تارتقانىنا بيىل 30 جىل تولعانىن ەسكە سالىپ ءوتتى.

– ون بەس جىلدان كەيىن ورتالىق ازيا مەملەكەتتەرى ءوز وڭىرلەرىن يادرولىق قارۋدان ازات ايماق دەپ جاريالادى. بۇل – تولىقتاي سولتۇستىك جارتى شاردا ورنالاسقان العاشقى يادروسىز ءوڭىر. يادرولىق قارۋ ساياسي تاڭداۋ بولعاندىقتان جاعداي مەن ستراتەگيالىق ادىستەر تەز وزگەرۋى مۇمكىن. قازاقستاننىڭ يادرولىق سىناقتارعا جان-جاقتى تىيىم سالۋ تۋرالى شارتتىڭ تەزىرەك كۇشىنە ەنۋىنە قول جەتكىزۋگە بەل بايلاعانىن تاعى دا ناقتىلايمىن. قازاقستان ادامزاتتىڭ دامۋى جولىندا يادرولىق قارۋدان باس تارتۋ جونىندەگى باسىمدىعىن ودان ءارى پايدالانا بەرەتىنىن بۇل باعىتتاعى وڭ قادام رەتىندە اتاپ وتكىم كەلەدى، – دەدى پرەزيدەنت.

مەملەكەت باسشىسى يادرولىق قارۋدى تاراتپاۋ جونىندەگى شارت يادرولىق ەنەرگيانى ازاماتتىق ماقساتقا زاڭدى ءتۇردى پايدالانۋ مەن يادرولىق قارۋدى تاراتۋدىڭ ارا-جىگىن اجىراتاتىنىن ايتتى. پرەزيدەنتتىڭ ايتۋىنشا، يادرولىق قۋات بىرتە-بىرتە تومەن كومىرتەكتى ەنەرگيانىڭ ماڭىزدى كوزىنە اينالۋدا. قازاقستاندا ءوز اتوم ونەركاسىبىن دامىتۋ ءۇشىن كەشەندى تەحنيكالىق-ەكونوميكالىق نەگىزدەمە جاسالىپ جاتىر.

– يادرولىق قارۋدان ازات، بەيبىت ءومىر قالىپتاستىرۋ مەنىڭ ۇكىمەتىمنىڭ ساياساتىنداعى باسىمدىق بولىپ قالا بەرەدى. بۇل ۇمتىلىس سوڭعى وتىز جىل ىشىندە قازاقستاندى يادرولىق قارۋعا قارسى جاھاندىق قوزعالىستىڭ جاقتاۋشىسى ەتتى. سونىمەن قاتار ءبىزدىڭ ۇلتتىق تۇتاستىعىمىزدىڭ ءبىر بولىگىنە اينالدى. ءبىز قارۋسىزدانۋ جانە يادرولىق قارۋدى تاراتپاۋ جولىنداعى كۇش-جىگەرىمىزدى الداعى ۋاقىتتا سىزدەرمەن بىرلەسە جۇمساۋعا دايىنبىز، – دەپ مالىمدەدى قاسىم-جومارت توقاەۆ.

سوڭعى جاڭالىقتار

جانى جايساڭ جاز-اتا

قوعام • كەشە

دۇبىردەن تۋعان ولەڭ

ادەبيەت • كەشە

ۇقساس جاڭالىقتار