قوعام • 28 قىركۇيەك، 2021

الماتى اۋەجايىن قايتا جوندەۋگە 780 ميلليون دوللار بولىنەدى

19 رەت كورسەتىلدى

الماتى حالىقارالىق اۋەجايىن كەڭەيتۋ جانە جاڭعىرتۋ ينۆەستيتسيالىق باعدارلاماسىنىڭ جالپى قۇنى 780 ميلليون دوللارعا باعالاندى. قارجىنى حالىقارالىق نەسيە بەرۋشىلەر جانە ينۆەستورلار بولەدى، دەپ حابارلايدى Egemen.kz.

ەۋرازيالىق دامۋ بانكىنىڭ (ەادب) ءباسپاسوز قىزمەتى مالىمەتىنشە، كرەديتورلار سينديكاتىنىڭ الماتى حالىقارالىق اۋەجايىن كەڭەيتۋ مەن جاڭعىرتۋدى قارجىلاندىرۋ شارتتارى تۋرالى كەلىسىمگە قول قويعان. كرەديتورلار تىزىمىنە ەۋرازيالىق دامۋ بانكى، ەۋروپالىق قايتا قۇرۋ جانە دامۋ بانكى (ەقدب)، حالىقارالىق قارجى كورپوراتسياسى جانە DEG نەمىس ينۆەستيتسيالىق كورپوراتسياسى كىرەدى. ەادب اۋەجايدى 40 ميلليون دوللارعا جاڭعىرتۋدى قارجىلاندىرادى، ال جوبانىڭ جالپى قۇنى 780 ميلليون دوللارعا باعالانعان.

اۋەجايدىڭ جاڭا يەلەرى - TAV Kazakhstan كومپانياسى ىسكە اسىراتىن جاڭعىرتۋ جوباسىنا جاڭا تەرمينال سالۋ جانە جۇمىس ىستەپ تۇرعان اۋەجايدى جاڭعىرتۋ، وتكىزۋ قابىلەتىنىڭ شەكتەۋلەرىن جويۋ، مارشرۋتتاردى دامىتۋ، رەيستەر سانىن ۇلعايتۋ، كليەنتتەرگە قىزمەت كورسەتۋ ساپاسىن ارتتىرۋ بويىنشا جۇمىستار كىرەدى.

«2019 جىلى پاندەمياعا دەيىن الماتى اۋەجايى اۋە كولىگىمەن تاسىمالداۋدىڭ جالپى سانىنان جولاۋشىلاردىڭ 64 پايىزدان استامىن جانە جۇكتەردىڭ 84 پايىزدان استامىن تاسىمالدادى. ونى جاڭعىرتۋ بۇكىل ەلدىڭ ورنىقتى ەكونوميكالىق وسۋىنە جانە حالىقارالىق كولىك-لوگيستيكالىق ينفراقۇرىلىمنىڭ دامۋىنا ىقپال ەتەتىن بولادى. سونىمەن قاتار، جوبا 1000-نان اسا جاڭا جۇمىس ورىندارىن قۇرۋعا مۇمكىندىك بەرەدى، بۇل دا جوعارى الەۋمەتتىك مانگە يە. بۇل جوبا ەاەو كەڭىستىگىندەگى حالىقارالىق دامۋ بانكتەرى ارىپتەستىگىنىڭ ارتىقشىلىقتارىن كورسەتەدى»، دەدى ەۋرازيالىق دامۋ بانكى باسقارما توراعاسىنىڭ ورىنباسارى امانگەلدى يسەنوۆ.

ەسكە سالايىق، 2020 جىلدىڭ كوكتەمىندە TAV Airports Holding تۇرىك حولدينگى الماتى حالىقارالىق اۋەجايى اكتسيالارىنىڭ ءجۇز پايىزىن ساتىپ العان بولاتىن. مامىلە 415 ميلليون دوللارعا باعالانعان.

 

سوڭعى جاڭالىقتار

پاگانيني

ونەر • كەشە

وتىز جىلدىققا وي قورىتقان

قازاقستان • كەشە

ۇقساس جاڭالىقتار