ءداستۇرلى كىتاپ مەرەكەسى بۇل جولى دا رۋحاني قاۋىشۋ الاڭىنا اينالدى. دۇكەندەر مەن باسپالار وتكىزگەن جارمەڭكە جۇرتشىلىق ءۇشىن كوپتەن اڭساعان كىتابىن قولجەتىمدى باعامەن الۋعا مۇمكىندىك تۋدىردى. ارنايى قۇرىلعان «جازۋشىلار شاتىرىندا» جاڭا جيناقتاردىڭ تۇساۋى كەسىلىپ, جازۋشى مەن وقىرمان ءوزارا پىكىر الماستى. تۋىندىلار تالدانىپ, تۋىندىگەرلەر شىعارماشىلىق جوسپارىمەن ءبولىستى.
«كەرەمەت ءبىر كىتاپتى وقي وتىرىپ, ءبىز ارقاشان «بۇل تۋىندىنىڭ اۆتورى كىم؟ ونىڭ كەلبەتى قانداي؟ ول نە تۋرالى ايتادى؟» دەگەن ويعا قالامىز. وسى جەردە اۆتور تۋرالى عالامتورداعى شاعىن انىقتاما قىزىعۋشىلىعىمىزدى قاناعاتتاندىرماعاندىقتان, سۇيىكتى جازۋشىمىزبەن شىنايى جۇزدەسۋ ارماندارىمىزدىڭ بىرىنە اينالاتىنى راس. بۇگىن وسى ويىمىز جۇزەگە اسىپ سۇيىكتى قالامگەرلەرمەن كەزدەسىپ, اڭگىمەلەستىك. شىعارمالارىنا قاتىستى سۇراقتارىمىزدى قويدىق. بۇل فەستيۆالدى جىل سايىن اسىعا كۇتەمىز», دەيدى س.اسفەندياروۆ اتىنداعى مەديتسينا ۋنيۆەرسيتەتىنىڭ ستۋدەنتى ارۋجان اسىلبەكقىزى.
فورۋم قوناقتارى كسەنيا روگوجنيكوۆا مەن ەلەنا كلەپيكوۆانىڭ شىعارماشىلىعى تۋرالى ەرەكشە قىزىعۋشىلىقپەن تىڭدادى. «كارانتيندىك ادامدار» دەپ اتالاتىن كىتاپ جەڭىل تىلمەن اسەرلى جازىلعان. ول بالالارعا كارانتين كەزەڭىندە ءوزىن قالاي ۇستاۋ كەرەكتىگىن ۇيرەتەدى, ۆيرۋستار دەگەن نە جانە ولاردان قالاي قورعانۋ قاجەتتىگى تۋرالى اقىل-كەڭەس بەرەدى. وسىنداي تاپتىرماس بالالار تۋىندىسى قالاي جارىق كورگەنى تۋرالى اۆتورلار فەستيۆال بارىسىندا ايتىپ بەردى.
شاراعا قاتىسقان بەلگىلى ەكوبەلسەندى اجار جاندوسوۆا ەكولوگيانىڭ قورعاۋشىسى عانا ەمەس, باسپاگەر, جازۋشى ءارى كىتاپحانا ەرىكتىسى رەتىندە جاندوسوۆ كەنتىندە قازاقستانداعى العاشقى مەملەكەتتىك ەمەس كىتاپحانانىڭ قالاي اشىلعانى تۋرالى اڭگىمەلەپ بەردى.
BAURZHAN قورى ۇيىمداستىرعان KITAPFEST فورۋمىنا ارنايى كەلگەن مەگاپوليس اكىمى باقىتجان ساعىنتاەۆ الماتىدا جاس وقىرماندار سانى كوبەيگەنىن, بۇل ءۇردىس ودان سايىن قانات جايۋى ءۇشىن بارلىق جاعداي جاسالاتىنىن جەتكىزدى. اقىلىنا اقى سۇرامايتىن اسىل قازىنا – كىتاپ. جوبا اۆتورلارى كىتاپ مەرەكەسى جىل سايىن اۋقىمىن كەڭەيتە بەرەتىنىن ايتادى.
الماتى
