«شاحتەر» ءوز الاڭىندا «قايراتتى» قابىلدادى. بۇل ويىندا كورەرمەندەر العاشقى گولدىڭ كىرۋىن تىم ۇزاق كۇتتى. تەك 76-مينۋتتا عانا يدريس ۋماەۆ ەسەپ اشتى. بىراق قاراعاندىلىقتاردىڭ قۋانىشى ۇزاققا سوزىلمادى. ماتچتىڭ اياقتالۋىنا ءبىر مينۋت قانا قالعاندا رادا دۋگاليچ تارازى باسىن تەڭسەلتىپ كەتتى – 1:1.
«اقتوبە» كوش سوڭىندا كەلە جاتقان تالدىقورعاننىڭ «جەتىسۋىنىڭ» قاقپاسىنا جاۋاپسىز ەكى دوپ سالدى – 2:0. بۇل گولداردىڭ ەكەۋى دە ءبىرىنشى تايمدا سوعىلدى.
پەتروپاۆلوۆسكىدە وتكەن «قىزىلجار» مەن «تۇران» اراسىنداعى باسەكەنىڭ تاعدىرىن قوناقتاردىڭ 76-مينۋتتا سوققان جالعىز دوبى شەشتى – 0:1.
«استانا» نۇر-سۇلتاندا «تارازدىڭ» تاس-تالقانىن شىعاردى – 3:0. ءبىر كەرەمەتى, دۋبل اۆتورى اتانعان تيگران بارسەگيان ءوز گولدارىن 1 جانە 7-مينۋتتا سوقسا, 21-مينۋتتا مارين توماسوۆ مەرگەندىك تانىتتى.
وسى تۋرداعى وزگە كەزدەسۋلەردىڭ ناتيجەلەرى مىناداي: «اقجايىق» – «قايسار» 1:1, «اتىراۋ» – «توبىل» 0:1 جانە «ورداباسى» –«كاسپي» 1:1.
جارىس كەستەسىندە «استانا» ءالى دە كوش باستاپ كەلەدى. ەلوردالىق كلۋب 50 ۇپايدى ەنىشىلەپ وتىر. ەكىنشى ورىنداعى «توبىلدىڭ» باستى قارسىلاسىنان ءبىر ۇپايى كەم. قورجىنىندا 41 ۇپايى بار «قايرات» ءۇشىنشى ساتىعا جايعاستى.
