جالپى, مامانداردىڭ ايتۋىنشا, ەلىمىزدەگى جاڭا تۋعان نارەستەلەر كوبىنەسە ورتالىق جۇيكە جۇيەسىنىڭ زاقىمدانۋىنان شەتىنەيدى ەكەن جانە وسىنداي جاعدايلاردىڭ 70%-ى گيپوكسيا سالدارىنان بولاتىن كورىنەدى.
ماسەلەن, بالقاش قالاسىنىڭ تۇرعىنى سالتانات رىسپەكتىڭ ءسابيى اۋىر گيپوكسيا – وتتەگى جەتىسپەۋشىلىگىمەن دۇنيەگە كەلىپتى. بالا امنيوتيكالىق سۇيىقتىقتى جۇتىپ, وزدىگىنەن دەم الا الماعان. ەگەر دە, وسى ءبۇلدىرشىن ۇشاقپەن قاراعاندىعا, وبلىستىق كلينيكالىق اۋرۋحانانىڭ پەريناتولوگيا ورتالىعىنا دەر كەزىندە جەتكىزىلمەگەندە, جاعداي مۇلدە باسقاشا وربىگەن بولار ەدى. ويتكەنى مۇندا سىرقات بالالارعا كومەكتەسەتىن جابدىق – تەراپيالىق گيپوتەرميانىڭ اپپاراتتىق كەشەنى بار.
ءاۋ باستا سالتاناتتىڭ ءسابيى قوزعالا الماعان, ءتىپتى كوزىن دە اشپاپتى. تەك جانساقتاۋ بولىمىندەگى گيپوتەرميا اپپاراتىن قوسقاننان كەيىن عانا جاعدايى وڭالا باستاعان. ءبىر اپتادان كەيىن بالا قوزعالىپ, وزدىگىنەن دەم الا باستاپتى. قازىر جاعدايى جاقسى, اناسىمەن بىرگە بالقاشتاعى ۇيىندە امان-ەسەن ءوسىپ جاتىر.
2020 جىلى اتالعان ورتالىقتا ورتا جانە اۋىر دارەجەلى اسفيكسيامەن جۇزگە جۋىق نارەستە دۇنيەگە كەلگەن. ولاردىڭ بارلىعىنا تەراپەۆتىك گيپوتەرميا قاجەت بولعان ەكەن, بىراق اۋرۋحانادا ارنايى جابدىق بولماعاندىقتان, ونى قولدان كەلەتىن ادىستەرمەن جاساۋعا تۋرا كەلىپتى. ال 2021 جىلدىڭ ماۋسىم-قىركۇيەك ايلارىندا وبلىستىق كلينيكالىق اۋرۋحاناداعى تەراپيالىق گيپوتەرميانىڭ باسقارىلاتىن اپپاراتتىق كەشەن كومەگىمەن جاڭا تۋعان بىرنەشە نارەستەنىڭ ءومىرىن ساقتاپ قالۋعا قول جەتكىزىلگەن.
دارىگەر ماماندار جاڭا تۋعان سابيلەردە قانداعى وتتەگىنىڭ جەتىسپەۋشىلىگىنەن تۋىندايتىن ميدىڭ زاقىمدانۋىن بولدىرماۋدى ەڭ باستى قاجەتتىلىك رەتىندە سانايدى. بۇل ءۇشىن ولاردىڭ دەنە تەمپەراتۋراسىن بىرتىندەپ تومەندەتەدى ەكەن, ال بۇل اسقىنۋلاردىڭ الدىن الۋعا كومەكتەسەتىن كورىنەدى. وعان قوسىمشا بالاعا مي قىزمەتىن, تىنىس الۋ جانە جۇرەك جۇمىسىن جاقسارتاتىن ەكپە دارىلەر سالادى.
وكىنىشكە قاراي, كوپتەگەن پەريناتالدى ورتالىقتا گيپوتەرميا ءالى دە «ەسكى» ادىستەرمەن ىسكە اسىرىلادى: نارەستەنى سۋىق سۋ نەمەسە مۇزى بار مەديتسينالىق قولعاپپەن وراپ قويادى. بۇل تاسىلدەن سۋىق تيۋ جانە بالانىڭ دەنساۋلىعىنا باسقا دا جاعىمسىز سالدارى بولۋى مۇمكىن ەكەنىن ايتادى ماماندار. ال قازىرگى بالاداعى بارلىق كورسەتكىشتەردى ولشەيتىن جوعارى دالدىكتەگى جابدىق بولسا, مۇنداي قاۋىپتەردى ازايتادى.
ءبىز جوعارىدا مىسال رەتىندە كەلتىرگەن بالقاشتىق بالا مەن تاعى ءبىر ناۋقاس ءسابيدىڭ ءومىرىن Samruk-Kazyna Trust الەۋمەتتىك جوبالاردى دامىتۋ قورى مەن Ayala قايىرىمدىلىق قورىنىڭ ساقتاپ قالۋعا سەبەپكەر بولعانىن ايتا كەتكەن ءجون. قاراعاندى وبلىستىق اۋرۋحاناسى پەريناتولوگيا ورتالىعىنىڭ باسشىسى گۇلنار گاليەۆانىڭ كومەك قولىن سوزعان قورلارعا ايتار العىسى مول.
– قىزمەتكەرلەر ءۇشىن مۇنداي جابدىق – جۇمىس كەزىندەگى ۇلكەن كومەك. بۇرىن بۇل ۇدەرىستى اتقارۋ وتە اۋىر بولاتىن. ءبىز ءبارىن قولمەن جاساپ كەلدىك: سۋدى سالقىنداتىپ, تەمپەراتۋرانى دۇرىس دياپازوندا ۇستاپ تۇرۋدى قاداعالادىق. ەندى ءبارى اۆتوماتتاندىرىلعان. ءبىزدىڭ كىشكەنتاي پاتسيەنتتەرىمىز ءۇشىن, اسىرەسە اسفيكسيا كەزىندە ورتاشا اۋىر جاعدايعا تاپ بولعان نارەستەلەر ءۇشىن گيپوتەرميا اپپاراتىنداعى تەراپيانىڭ ناتيجەسى وتە جاقسى. اۋىر اسفيكسيادان امان قالعان بالالاردىڭ ورتالىق جۇيكە جۇيەسى زاقىمدالادى. بىراق اۆتوماتتى گيپوتەرميانىڭ كومەگىمەن ءبىز نەۆرولوگيالىق بەلگىلەردى بارىنشا ازايتىپ, سابيلەرگە تولىققاندى سالاماتتى ءومىر سۇرۋگە مۇمكىندىك بەرەمىز, – دەيدى ول.
دارىگەرلەر گيپوكسيانىڭ نارەستەلەردە وتە ءجيى كەزدەسەتىن دياگنوز ەكەنىن ايتادى. مۇنىڭ سەبەپتەرى ءارتۇرلى بولۋى مۇمكىن: انانىڭ ءارتۇرلى اۋرۋلارى, رەزۋس-كونفليكت, پلاتسەنتانىڭ مەرزىمىنەن بۇرىن قارتايۋى, كىندىكتىڭ اينالۋى, تەمەكى شەگۋ, قولايسىز ەكولوگيا. وسىنداي ءتۇرلى سەبەپتەردىڭ كەسىرىنەن گيپوكسياعا شالدىعۋشى بالالاردىڭ كوبەيىپ كەلە جاتقانى الاڭداتادى. سوندىقتان ماماندار ەلىمىزدەگى بارلىق پەريناتالدىق ورتالىقتارى اۆتوماتتى باسقارىلاتىن گيپوتەرميا اپپاراتتارىمەن جابدىقتالۋى ءتيىس دەپ سانايدى.
Ayala قايىرىمدىلىق قورىنىڭ پرەزيدەنتى ايدان سۇلەيمەنوۆا بوسانۋداعى اسقىنۋلاردان كەيىن فۋنكتسيونالدى جانە ينتەللەكتۋالدىق تۇرعىدان ساۋ بولىپ قالعان ءاربىر بالا – بۇل مەملەكەت, دارىگەرلەر, قورلار, قوعام تاراپىنان جاسالعان وراسان زور ەڭبەكتىڭ ناتيجەسى ەكەنىن ماقتانىشپەن ايتادى.
– ءبىز, 15 جىلدان بەرى قازاقستانداعى ءسابي ءولىمى مەن مۇگەدەكتىكتى ازايتۋ ءۇشىن ەلدەگى اۋرۋحانالاردىڭ جانساقتاۋ بولىمشەلەرىنە ەڭ زاماناۋي جابدىقتار ورناتىپ كەلەمىز. ناتيجەسى – امان قالعان جۇزدەگەن مىڭ سابيلەر, – دەيدى ول.
جالپى, Ayala قايىرىمدىلىق قورى ەلىمىزدە ەڭ وزىق مەديتسينالىق ادىستەمەلەردى ەنگىزۋگە كومەكتەسەدى. ناقتىراق ايتقاندا, سوڭعى بەس جىلدا قور پەريناتالدىق ورتالىقتاردى اۆتوماتتى باسقارىلاتىن گيپوتەرمياعا ارنالعان اپپاراتپەن جابدىقتاۋ ءۇشىن بەلسەندى جۇمىس ىستەپ كەلەدى. ءىرى دەمەۋشىلەردىڭ قولداۋىمەن نۇر-سۇلتان قالاسىنداعى «انا مەن بالا» ۇلتتىق عىلىمي ورتالىعىندا, الماتى قالاسىنداعى پەريناتولوگيا جانە بالالار كارديوحيرۋرگياسى ورتالىعىندا, اتىراۋ, تۇركىستان, سەمەي قالالارىنداعى پەريناتالدىق ورتالىقتاردا اپپاراتتىق كەشەندەر ورناتقان.
قاراعاندى وبلىسى
