«بيىل تارازدا قۇقىق بۇزۋشىلىقتىڭ الدىن الۋ ماقساتىندا مەملەكەتتىك-جەكەمەنشىك سەرىكتەستىك اياسىندا «سەرگەك» كەشەنىنىڭ بەينەباقىلاۋ كامەرالارى ورناتىلادى. جوبا اياسىندا 450 نىساندا قوعامدىق ءتارتىپتى باقىلايتىن 1250 كامەرا, جول قوزعالىسىن قاداعالايتىن 48 كامەرا ورناتۋ قاراستىرىلعان. ىلكى جوباعا سايكەس, بۇگىندە قالاداعى اۋەجايدان تۇڭعىش پرەزيدەنت ساياباعىنا دەيىنگى ون نىساندا كامەرالار ورناتىلعان. بۇل شارالاردى 2022 جىلدىڭ ءبىرىنشى توقسانىندا اياقتاۋ جوسپارلانىپ وتىر», دەدى جامبىل وبلىسى اكىمدىگىنىڭ جولاۋشىلار تاسىمالى جانە اۆتوموبيل جولدارى باسقارماسىنىڭ باسشىسى باقىتجان جانىبەكوۆ.
ب.جانىبەكوۆ كۇرە جولداردى ساقتاپ قالۋ جانە ولاردا اۋىر جۇك تاسيتىن كولىكتەردىڭ باقىلاۋسىز قوزعالىسىن بولدىرماۋ ءۇشىن ارنايى قاداعالاۋ شارالارى ۇيىمداستىرىلىپ, تەكسەرۋ رەيدتەرى وتكىزىلىپ جۇرگەنىن اتاپ ءوتتى. بيىلعى جىلدىڭ باسىنان بەرى رەيد بارىسىندا اۋىر جۇك تاسيتىن 4 608 كولىك قۇرالى تەكسەرىلگەن. 943 اكىمشىلىك حاتتاما تولتىرىلىپ, 23,2 ملن تەڭگە ايىپپۇل سالىنعان, دەپ اتاپ ءوتتى سپيكەر.
