ەكونوميكا • 24 قىركۇيەك، 2021

قىتاي مەن قازاقستان جۇك تاسىمالى ارتقان

24 رەت كورسەتىلدى

جىل باسىنان بەرى دوستىق-الاشاڭقاي جانە التىنكول-قورعاس تەمىرجول شەكارالىق وتكەلدەرى ارقىلى 14،4 ملن توننا جۇك تاسىمالدانعان. بۇل بىلتىرعى جىلدىڭ سايكەس كەزەڭىمەن سالىستىرعاندا 2 پايىزعا ارتىق، دەپ جازادى Egemen.kz

قازاقستان مەن قىتاي شەكارا تەمىر جولدارى ارالاس كوميسسيالارىنىڭ 30-وتىرىسى اياقتالدى. قازاقستان دەلەگاتسياسىن «قازاقستان تەمىر جولى» ۇك» اق باسقارما توراعاسىنىڭ جۇك قوزعالىسى جونىندەگى ورىنباسارى ورالحان قۇلاقوۆ، قىتاي دەلەگاتسياسىن قىتاي تەمىر جولدارى كورپوراتسياسى ء«ۇرىمشى تەمىر جولى» جشق باسقارما توراعاسى گاو تسزيانيان باسقاردى. 

كەڭەس بارىسىندا تاراپتار جۇك تاسىمالى سالاسىنداعى ىنتىماقتاستىق ماسەلەلەرىن تالقىلادى. كوروناۆيرۋس ينفەكتسياسىنىڭ جاھاندىق پاندەمياسى ەكى ەل اراسىنداعى جۇك تاسىمالىنا اسەر ەتكەنى اتاپ ءوتىلدى. 

تاراپتار ەپيدەميولوگيالىق جاعداي جاقسارعان كەزدە جۇك تاسىمالىن ۇلعايتۋعا ىقپال ەتۋگە دايىن ەكەنىن ءبىلدىردى. 2021 جىلى تەمىرجول شەكارالىق وتكەلدەرى ارقىلى 21 ملن توننا، ونىڭ ىشىندە قىتايدان قازاقستانعا - 8،8 ملن توننادان استام، كەرى باعىتتا 12،2 ملن توننا جۇك تاسىمالدانادى دەپ كۇتىلۋدە. 2021 جىلدىڭ 8 ايىندا دوستىق-الاشاڭقاي جانە التىنكول-قورعاس تەمىرجول شەكارالىق وتكەلدەرى ارقىلى 14،4 ملن توننا جۇك تاسىمالدانعان. بۇل وتكەن جىلدىڭ سايكەس كەزەڭىمەن سالىستىرعاندا 2%-عا ارتىق. ونىڭ ىشىندە قىتايدان 8،5 ملن توننا، كەرى باعىتتا 5،9 ملن توننا جۇك تاسىمالدانىپ، وتكەن جىلعا قاراعاندا ءوسىم 24% قۇرادى.

كەڭەس بارىسىندا قازاقستاندىق تاراپ قىتايدىڭ استىق جۇكتەرىن قابىلداماۋىنا الاڭداۋشىلىق ءبىلدىردى. كورشى ەلمەن شەكارادا 1400-گە جۋىق استىق تاسىعىش پەن 300 جابىق ۆاگون قابىلداۋدى سارىلا كۇتىپ تۇر. «قتج» ۇك» اق 1 قازانعا دەيىن استىق جۇكتەرىن قابىلداۋ مەن ءتۇسىرۋدى جۇزەگە اسىرۋدى، سونداي-اق كۇن سايىنعى پويىزدار الماسۋ جوسپارىندا استىق جۇكتەرى بار ءبىر پويىزدى قابىلداۋدى سۇرادى. ءوز كەزەگىندە قىتاي تاراپى الاشاڭقاي ستانتسياسىنداعى جولدى قايتا جوندەۋگە بايلانىستى ۇيىلگەن استىقتى ءتۇسىرۋ مۇمكىن ەمەس ەكەنىن اتاپ ءوتتى.

سونداي-اق، قازاقستاندىق تاراپ قر يمپورتتاۋشىلارىنىڭ شاعىمىن ايتىپ، ارىپتەستەرىنە قىتايدان جۇكتى تولىق كولەمدە جونەلتۋدى سۇرادى.

ء«وز كەزەگىندە  قازاقستان تاراپى بارلىق جۇكتى كىدىرىسسىز قابىلداۋعا دايىن»، دەپ جازادى قتج ءباسپاسوز قىزمەتى.

سوڭعى جاڭالىقتار

جانى جايساڭ جاز-اتا

قوعام • كەشە

دۇبىردەن تۋعان ولەڭ

ادەبيەت • كەشە

ۇقساس جاڭالىقتار