«ساعادات قوجاحمەت ۇلى نۇرماعامبەتوۆ – ەل اسكەرىنىڭ ماقتانىشى ءارى ارميانىڭ ىرگەتاسىن قالاۋشى. ول قر قارۋلى كۇشتەردىڭ بارلىق جاۋىنگەرىنە تاباندىلىقتىڭ, باتىلدىقتىڭ جانە وتان الدىنداعى انتىنا شىن بەرىلگەن تۇلعانىڭ ۇلگىسى. ءبىز ونىڭ كىتاپتارىن, ەستەلىكتەرىن, مايدانداعى ەرلىگى مەن بەيبىت ۋاقىتتاعى جانقيارلىق ەڭبەگىن ءبىلىپ وستىك. ول وزىنە ءتان قايسارلىق, ماقسات قويعىشتىق جانە اسكەري انتقا ادالدىق سەكىلدى قاسيەتىنىڭ ارقاسىندا قازاقستان اسكەرى مۇراسىن ساقتاپ قانا قويماي, ونى دامىتتى», دەدى دەسانتتىق-شابۋىلداۋ اسكەرلەرى قولباسشىسىنىڭ تاربيە جانە يدەولوگيالىق جۇمىستار جونىندەگى ورىنباسارى رادجان جانىسوۆ.
شاراعا گارنيزون باسشىلىعى مەن اسكەري قىزمەتشىلەرى, قارۋلى كۇشتەردىڭ ارداگەرلەرى, اسكەري-تەحنيكالىق مەكتەپتىڭ كۋرسانتتارى مەن وقىتۋشىلارى جانە حالىق قاھارمانىنىڭ قىزى ايسۇلۋ ساعاداتقىزى نۇرماعامبەتوۆا قاتىستى.
