ەكشن جانرىنداعى عىلىمي-فانتاستيكالىق كارتينانىڭ تۇساۋى كەسىلدى
سوڭعى كەزدەرى اياق الىسىن نىقتاپ, كورەرمەن قاۋىمدى كادىمگىدەي ەلەڭدەتىپ وتىرعان «قازاقفيلم» كينوستۋدياسىنىڭ جاڭاشىل جۇمىستارىنا تىلەۋلەس كوڭىلمەن ونداعى قولعا الىنعان ءاربىر جوباعا, ءاربىر جاڭا تۋىندىعا ساتتىلىك تىلەپ, شىققان فيلمدەردىڭ ءبىرىن دە قالت جىبەرمەۋگە تىرىسىپ جۇرگەنىمىز راس. مىنە, جاقىن كۇندەرى «قازاقفيلم» كينوستۋدياسى كەزەكتى, ءتۇسىرىلۋى بولەك تۋىندىسىن – «ەلەس قۋعان سايىپقىران» اتتى عىلىمي-فانتاستيكالىق ەلەمەنتتەرى بار كوركەم ءفيلمدى بىردەن ەكى تىلدە تارتۋ ەتكەلى وتىر. شىنداپ كەلگەندە, جاڭا فيلم ەكشن جانرىن جاقسى كورەتىن كورەرمەندەردىڭ كوڭىلىنەن شىعۋى ءتيىس. بىردەن ايتا كەتۋ كەرەك, بلوكباستەر اۋقىمدى سپەتسەففەكتىلەرىمەن, ساپالى گرافيكاسىمەن ەرەكشەلەنەدى. كارتينانى ءاۋ باستا الەمدىك پروكاتقا شىعارۋ كوزدەلگەندىكتەن, كريستاننا لوكەن («تەرميناتور-3: كولىكتەر كوتەرىلىسى») جانە ارماند اسسانتە («وديسسەيا», «گانگستەر») سياقتى گولليۆۋدتىق جۇلدىزداردىڭ بۇل فيلمگە تۇسۋگە كەلىسىم بەرۋى كەزدەيسوقتىق ەمەس. سول سياقتى, قازاقستاندىق ەكشن اللا پۋگاچەۆانىڭ جيەن نەمەرەسى نيكيتا پرەسنياكوۆ سىندى تانىمال ادامدار مەن ءوز اكتەرلەرىمىز – سانجار ماديەۆ, اسەل ساعاتوۆا, كاميلا ەرمەكوۆالاردى ۇلكەن ەكرانعا شىعارىپ وتىر.
ءفيلمنىڭ پروكاتقا شىعۋىنا وراي وتكىزىلگەن ءباسپاسوز ءماسليحاتىندا ءتۇسىرۋ توبى جان-جاقتى سۇحبات بەرىپ, باستى رولدەردەگى سانجار ماديەۆ پەن نيكيتا پرەسنياكوۆتار قىزىقتى دا قيىن ساتتەر تۋرالى اڭگىمەلەدى.
ال ءتۇسىرۋ الاڭىندا «تيگر» دەگەن لاقاپ اتقا يە بولعان كارتينا رەجيسسەرى مارينا كۋناروۆا ءفيلمدى الەمدىك كينو ايدىنىنا شىعارۋ ءۇشىن ۋما تۋرمان, مونيكا بەلۋچچي سياقتى مەگا-جۇلدىزداردىڭ دا شاقىرىلعانىن ايتادى.
ەڭ قىزىعى, ولار قازاقستاندىق كارتيناعا تۇسۋگە كەلىسىم دە بەرگەن. ءتىپتى, ءار كارتيناسى ءۇشىن 3 ميلليون اقش دوللارىنان كەم سۇرامايتىن ۋما تۋرمان كەڭدىك تانىتىپ, 1 ميلليونعا دا قازاقستاندا جۇمىس ىستەۋگە كەلىسكەن.
– الايدا, قازىرگە ءبىز ءۇشىن بۇل دا قىمباتتاۋ. قارجىمىز ەسەپتەۋلى بولعاندىقتان, الەمدىك دەڭگەيدەگى قالاعان جۇلدىزدارىمىزدى شاقىرا المادىق. مەنىڭشە, الداعى ۋاقىتتا ءبىزدىڭ اكتەرلەر دە گولليۆۋدتىق كارتينالارعا تۇسە باستايدى. ال لوكەن مەن اسسانتەنىڭ كەيىپكەرلەرى – امەريكالىقتار, سوندىقتان دا ءبىز ءۇشىن دە بۇل ءرولدەردى ورىندايتىن اكتەرلەردىڭ امەريكالىقتار بولعانى ماڭىزدى ەدى, – دەيدى رەجيسسەر.
سونىمەن, «قازاقفيلمنىڭ» كارتيناسىنا تۇسكەن امەريكالىق اكتەرلەردى ناستيا تەمكينا مەن ۆلاديمير ەرەميندەر دۋبلياجداعان. وسى ارادا, كوپتەگەن گولليۆۋد جۇلدىزدارىن, ونىڭ ىشىندە ال پاچينونى ورىسشا «سويلەتكەن» ءوزى رەجيسسەر ءوزى اتاقتى اكتەر ۆلاديمير ەرەمين ەكەنىن ەسكە سالا كەتۋگە بولادى.
قىسقاسى, وتاندىق پروكاتقا جولداما العان «ەلەس قۋعان سايىپقىران» ءفيلمى مامىر-ماۋسىم ايلارىنا قاراي كوپتەگەن ەلدەردە كورسەتىلە باستايدى. فيلم پروديۋسەرى ەرنار مالىكوۆ سانتا مونيكاداعى ءىرى كينوبازاردا كارتينانى پروكاتقا الۋعا قىزىعۋشىلىق تانىتقان كومپانيالار مۇنداي ەكشندى ايەل ادام تۇسىرگەنىن بىلگەندە ۇلكەن تاڭدانىس بىلدىرگەندەرىن ايتادى.
فانتاستيكالىق ەلەمەنتتەرى بار, شىتىرمان وقيعالىق ۇدەدەگى جانرلىق فيلمدە قازىرگى كومپيۋتەرلەنگەن زامانانىڭ بولاشاقتا ادام ومىرىنە تيگىزەر ىقپالى باستى تاقىرىپقا شىققان. فيلم جەلىسى بويىنشا عىلىمي تەحنولوگيالارمەن اينالىساتىن «Global Sەcuriti» اتتى كورپوراتسيا الەمدەگى قىلمىسپەن كۇرەسۋ ماقساتىندا GS-كود ويلاپ تابادى. بىراق, بۇل – ويلاپ تابىلعان تەحنولوگيانىڭ قوعامعا قاجەتتى ءبىر قىرى عانا. ونى ويلاپ تابۋشىلاردىڭ تۇپكى ماقساتى – «ەلەس» جۇيەسىن ەنگىزۋ ارقىلى ادام ساناسىن باسقارۋ جانە وسى جولمەن ءتۇرلى قيتۇرقى ارەكەتتەرىن ورىنداتۋ ەدى. وزدەرىنىڭ تۇپكى ماقساتىن جۇزەگە اسىرماق بولعان توپ وكىلدەرى تيمۋر اتتى پوليتسەي جىگىتتىڭ سۇيگەن قىزىن قىلمىسقا يتەرمەلەيدى. ال تيمۋر سۇيىكتىسىن جالعان جالادان اراشالاپ قالۋ ءۇشىن ولىمگە باس تىگەدى. كەيىن اڭعال جىگىت اڭداماي ءجۇرىپ, قىلمىس الەمىنىڭ «قۋىرشاعى» بولعانىن تۇسىنەدى. بىراق وتە كەش. سەبەبى, «ەلەس قۋامىن» دەپ ءجۇرىپ, جۇمىسىنان, دوستارىنان ءبىرجولاتا ايىرىلىپ تىنعان جىگىتتىڭ ەندىگى ماقساتى – كەك الۋ. اشىنعان جان دەگەنىنە جەتە مە, تەرىس پيعىلدى ادامداردىڭ ارەكەتىن اشكەرەلەپ, كۇللى ادامزاتتى ءتونىپ كەلە جاتقان قاتەردەن قۇتقارا ما؟
«ەلەس قۋعان سايىپقىران» ءفيلمى بۇگىنگى قازاق كينوسىنىڭ جاڭاشا ىزدەنىس ءورىسىن تاعى ءبىر مارتە دالەلدەي تۇسكەندەي. وپەراتورلىق شەبەرلىك, ديناميكاعا قۇرىلعان سيۋجەت, قازىرگى كومپيۋتەرلىك گرافيكانىڭ جەتىستىكتەرى مەيلىنشە پايدالانىلعان. ەكشن جانرى بولعاندىقتان مۇندا ۇر دا جىق كورىنىستەر جەتەرلىك. بىراق, بارلىق قويىلىمدار, كاسكادەرلىك تريۋكتەر, كاسىبي دەڭگەيدە ورىندالعان. تۇتاستاي الىپ قاراعاندا, زاماناۋي كينو تالاپتارىنا ساي, كورەرمەندەردiڭ بۇگiنگi تاڭداعى سۇرانىسىن ەسەپكە الا وتىرىپ, گولليۆۋدتىق فورماتتا تۇسىرىلگەن زاماناۋي فيلم دەپ پايىمداۋىمىزعا بولادى.
ءفيلمنىڭ پروكات جەلىسى حالىقارالىق دەڭگەيدە قامتىلۋى ءۇشىن گولليۆۋد جانە رەسەي جۇلدىزدارى شاقىرىلىپتى. باستى رولدەردىڭ ءبىرى – ەرجۇرەك پوليتسەيدى سومداعان سانجار ماديەۆ. حاكەردىڭ رولىندەگى رەسەيلىك ءانشى اللا پۋگاچەۆانىڭ جيەن نەمەرەسى نيكيتا پرەسنياكوۆ ەكەنىن جوعارىدا ايتتىق.
باستى كەيىپكەرلەرگە بوگەت جاساپ, ولاردىڭ جولىن كەسكەن ءراش ەسىمدى ارۋدىڭ ءرولىن اكتريسا كريستاننا لوكەن سومداعان.
كينو الەمىندە تالانتتى ستسەناريشى رەتىندە تانىلعان مارينا كۋناروۆانىڭ العاشقى رەجيسسەرلىك جۇمىسى «999» اتتى دراما جانرىندا تۇسىرىلگەن تولىقمەتراجدى كوركەم فيلم. جاس تا بولسا بۇل رەجيسسەردىڭ قيىن دا كۇردەلى ەكشن جانرىنا باتىل قادام جاساۋى جانە دە ونى ءوز دەڭگەيىندە اتقارا ءبىلۋى قۋانارلىق جاي.
ايناش ەسالي,
«ەگەمەن قازاقستان».
الماتى.
