«بارشاڭىزعا ءمالىم, شاعىن جانە ورتا بيزنەستى جان-جاقتى قولداۋ — مەملەكەتتىك ساياساتتىڭ باسىم باعىتتارىنىڭ ءبىرى. سول ءۇشىن ءبىز ءتيىستى زاڭنامانى جەتىلدىرىپ, سالىق اۋىرتپالىعىن ازايتتىق, اكىمشىلىك راسىمدەردى قىسقارتىپ, كرەديتتىك رەسۋرستارعا قولجەتىمدىلىكتى ارتتىردىق. سونىڭ ارقاسىندا ەلىمىزدە شاعىن جانە ورتا كاسىپكەرلىك سۋبەكتىلەرى جىل ساناپ ارتىپ, ەكونوميكانىڭ وسى سەكتورىندا ەڭبەك ەتەتىن ازاماتتار كوبەيدى. قازىرگى تاڭدا شاعىن جانە ورتا بيزنەس سالاسىندا جۇمىس ىستەيتىن ادامداردىڭ سانى 4 ميلليونعا, ال ونىڭ جالپى ىشكى ونىمدەگى ۇلەسىن 35 پايىزعا جەتكىزۋ ءۇشىن ءبىراز شارۋا اتقارىلىپ جاتىر. بۇل مىندەت «نۇر وتان» پارتياسىنىڭ «وزگەرىستەر جولى: ءار ازاماتقا لايىقتى ءومىر» اتتى باعدارلاماسىندا ناقتى كورىنىس تاپتى», دەپ اتاپ وتەدى قر تۇڭعىش پرەزيدەنتى نۇرسۇلتان نازارباەۆ.
سونداي-اق 2016 جىلى ەلىمىزدە جاپپاي كاسىپكەرلىكتى دامىتۋ جونىندە باستاما كوتەرگەنىن ەسكە سالىپ وتەدى.
«بۇگىندە بۇل باستاما وسى ماقساتقا قول جەتكىزۋدىڭ ماڭىزدى قۇرالىنا اينالىپ وتىر. وندا اۋىل-ايماقتار مەن شاعىن قالالاردا ءوز ءىسىن باستاعان كاسىپكەرلەردى قولداۋعا ەرەكشە كوڭىل ءبولۋ كەرەگى ايتىلعان. باستامانىڭ تاعى ءبىر نەگىزگى باعىتى – جاڭادان كاسىپ اشقان بيزنەسمەندەردى قولداۋ شارالارىن قارجىلىق ساۋاتتىلىققا وقىتۋ جۇيەسىن ەنگىزۋ ەدى. ءسويتىپ, «اتامەكەن» ۇلتتىق كاسىپكەرلەر پالاتاسى «باستاۋ بيزنەس» جوباسىن قولعا الدى. ول ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋعا ارنالعان «ەڭبەك» باعدارلاماسىنىڭ ماڭىزدى بولىگىنە اينالدى», دەدى قر تۇڭعىش پرەزيدەنتى. نۇرسۇلتان نازارباەۆ.
