تاپسىرمالاردى ورىنداۋعا تالپىنىس زور

كەشە ورتالىق كوممۋنيكاتسيالار قىزمەتىندە وتكەن كەزەكتى بريفينگتە كولىك جانە كوممۋنيكاتسيالار ءمينيسترى اسقار جۇماعاليەۆ قاتىستى. وندا ول جولداۋدا ايتىلعان تاپسىرمالاردى ىسكە اسىرۋ جوسپارلارى جونىندە باياندادى. «جاقىندا ەلباسى كولىك ين­فراقۇرىلىمىن دامىتۋدىڭ 2020 جىلعا دەيىنگى مەملەكەتتىك باعدارلاماسىن بەكىتتى. بۇل­ قازاقستاننىڭ كولىك ينفراقۇ­رى­لىمىن دامىتۋدىڭ العاشقى كەشەندى باعدارلاماسى», دەگەن مينيستر باعدارلاما بويىنشا ەلىمىزدىڭ كولىك جۇيەسى باسەكەلەستىگى ارتاتىنىن اتاپ ءوتتى. ونىمەن قوسا وڭىرلەر اراسىنداعى ينفرا­قۇرى­لىمدىق بايلانىس قامتاماسىز ەتىلەدى, رەسپۋبليكانىڭ كولىك جۇيەسى الەمدىك جۇيەگە ينتەگراتسيالانادى. سونداي-اق, ول قازاقستان ارقىلى ترانزيتتىك تاسىمال 2020 جىلعا قاراي 2 ەسەگە, ال 2050 جىلعا قاراي 10 ەسەگە ارتاتىنىن مالىمدەدى. جالپى, باعدارلاما بارىسىندا جۇزەگە اسىرىلاتىن جۇمىستاردىڭ ناتيجەسىندە جۇك جانە جولاۋشى اينالىمى 1,5 ەسە, ال ترانزيتتىك جۇك كولەمى 2 ەسەگە ارتپاق. «ەلباسى جولداۋىندا رەسپۋب­ليكانىڭ ترانزيتتىك الەۋەتىن 2030 جىلعا دەيىن دامىتۋعا بايلانىستى تاعى بىرقاتار تاپسىرمالار بەرگەن بولاتىن. سول ءۇشىن ءبىز قازىر شارالار جوسپارىن ازىرلەپ جاتىرمىز. وندا ترانزيتتىك الەۋەتتى ارتتىرۋعا, ينفراقۇرىلىمدىق شەك­تەۋلەردى جويۋعا, سونىمەن بىرگە, حالىقارالىق ساۋدا جا­ساۋ بارىسىنداعى اكىمشىلىك كەدەر­گىلەردى جويۋ جانە دە لوگيستيكا مەن ديستريبۋتسيانىڭ قازىرگى زامانعى وتاندىق ورتالىقتارىن دامىتۋ شارالارى ەسكەرىلەدى», دەدى مينيستر. ەلباسى جولداۋىندا شەكارالارىمىزدا كولىك قۇرالدارىنىڭ شوعىرلانىپ قالۋ ماسەلەسىن ءبىرجولا شەشۋدى تاپسىرعان دەپ توقتالعان ا.جۇماعاليەۆ بۇل ءۇشىن كەدەندىك وڭدەۋ مەرزىمىن قىسقارتۋ, شەكارالىق وتپەلەردىڭ وتكىزۋ قابىلەتىن ارتتىرۋ, ەكسپورت-يمپورت وپەراتسيالارىن وڭايلاتۋ قاجەتتىگىن باسا ايتتى. اتالمىش ماسەلەنى شەشۋ ءۇشىن قازاقستاننىڭ شەكاراسىندا ورنالاسقان كەدەندىك وتكىزۋ بەكەتتەرىن بايلانىستىرا كولىكتىك-لوگيستيكالىق ورتالىقتارىن سالۋ جوسپارلانۋدا. سونىمەن قوسا, كەدەندىك باقىلاۋ جانە كەدەندىك دەكلاراتسيا, جۇك وڭدەۋ جانە قوسىمشا قىزمەت كورسەتۋ, لوگيستيكالىق قىزمەت كورسەتۋ ماسەلەلەرىن تىكە­لەي وتكىزۋ بەكەتتەرىندە جاساۋدى, سونىمەن بىرگە, پوست-كەدەن با­قىلاۋ جۇيەسىن ەنگىزۋ ماسەلەسى قا­راستىرىلىپ جاتىر ەكەن. مۇنىمەن قاتار, مينيسترلىك ساۋدا راسىمدەرى مولدىرلىگىن ارتتىرۋ ماقساتىندا اۆتوماتتاندىرۋدى قولعا الىپتى. وتكەن جىلى سىبايلاس جەمقور­لىق­تى جويۋ ماقساتىمەن 13 اۆتوماتتى سالماق ولشەۋ اركالارىن ورناتىپتى, كولىكتىك باقىلاۋدىڭ 11 تۇراقتى بەكەتىن جاپقان. بۇل تاسىمالداۋشىلاردىڭ لاۋازىمدى تۇلعالارمەن تىكەلەي جۇزدەسۋىن بولدىرمايدى جانە جۇك قوزعالىسىنىڭ جىلدامدىعىن ارتتىرادى. بيىلعى جىلى وسىنداي اركالار سانى 31-گە جەتەدى, ال كەلەشەكتە تاعى 80 اركا سالىنادى دەپ جوسپارلانۋدا. جۇك اعىنىن ارتتىرۋ ماقساتىن­دا ازاماتتىق اۆياتسيا جانە تەمىرجول سالالارىن اۆتوماتتاندىرۋ جونىندە ءبىراز شارالار جوسپارلانعان. ال تەمىرجول تاسىمالى سالاسىندا «كەلىسىمدى جانە كوممەرتسيالىق جۇمىس» اۆتوماتتى باسقارۋ اقپاراتتىق جۇيەسىن ەنگىزۋ قولعا الىنۋدا. ول «ءبىر تەرەزە» ءپرينتسيپى بويىنشا ءوتىنىمدى وڭدەۋ مەرزىمىن 3 تاۋلىكتەن 3 مينوتكە دەيىن قىسقارتادى. ايتىلعان شارالار بيزنەس-قوعامداستىعىنان اكىمشىلىك كەدەرگىلەردى الىپ تاستاۋعا, كەدەندىك وپەراتسيالاردى جىلدامداتۋعا, قازاقستاندىق تاسىمالداۋشىلاردىڭ الەمدىك رىنوكتاعى باسەكەلەستىك قابىلەتىن ارتتىرۋعا, جالپى, سىرتقى ەكونوميكالىق قىزمەت مۇشەلەرىنە قولايلى جاعداي تۋدىرۋعا مۇمكىندىك اشادى. ا.جۇماعاليەۆ بايانداماسىنىڭ قورىتىندىسىندا ەلباسى تاپسىرمالارىنا وراي قولعا الاتىن شارالار لەگى مۇنىمەن شەكتەلمەيتىنىن ايتىپ ءوتتى. ياعني اتقارىلعان جۇمىس از ەمەس, ال الدا اتقارىلار جۇمىستار ودان دا كوپ. دينارا بىتىكوۆا, «ەگەمەن قازاقستان».