التىنشى رەت ۇيىمداستىرىلىپ وتىرعان وتىرىستا قاتىسۋشىلار ازاماتتىق قوعامنىڭ دامۋ ءۇردىسى مەن ەلىمىزدەگى مەديا سالاسىنىڭ بولاشاعى تۋرالى ءسوز قوزعادى.
كەزدەسۋگە قازاقستاننىڭ اقپارات جانە قوعامدىق دامۋ ءمينيسترى ايدا بالاەۆا, كلۋب مۇشەلەرى جانە ارنايى شاقىرىلعان ساراپشىلار قاتىستى.
وتىرىستى اشقان ماۋلەن اشىمباەۆ مەملەكەت باسشىسى قاسىم-جومارت توقاەۆتىڭ ازاماتتىق جانە ساياسي سالاداعى نەگىزگى باستاماسى «حالىق ۇنىنە قۇلاق اساتىن مەملەكەت» تۇجىرىمداماسى اياسىندا بيلىك پەن قوعامنىڭ تۇراقتى ديالوگىن جولعا قويۋعا جانە مەملەكەتتى باسقارۋعا ازاماتتىق قوعامنىڭ قاتىسۋىن ارتتىرۋعا ارنالعان جۇيەلى رەفورمالار قولعا الىنعانىنا نازار اۋداردى.
سەنات سپيكەرى قازىرگى تاڭدا ەلىمىزدە قوعامدىق-ساياسي سالادا كەزەڭ-كەزەڭىمەن جۇرگىزىلىپ جاتقان رەفورمالار جالعاسىپ وتىرعانىن ايتتى.
«مەملەكەت باسشىسىنىڭ بيىلعى جولداۋىندا ماڭىزدى مىندەتتەر بەلگىلەندى. بىرىنشىدەن, اۋىلدىق جەرلەردە ازاماتتىق باستامالاردى قولداۋدىڭ ءتيىمدى تەتىگىن ازىرلەۋ مىندەتى قويىلدى. ەكىنشىدەن, مەملەكەت باسشىسى دەپۋتات مانداتىن ءبولۋ كەزىندە ايەلدەر مەن جاستار ءۇشىن 30 پايىزدىق كۆوتانى مىندەتتى تۇردە ەسكەرۋ تۋرالى نورمانى زاڭمەن بەكىتۋدى تاپسىردى. ۇشىنشىدەن, ەرەكشە قاجەتتىلىگى بار ازاماتتارعا دا كۆوتا بەلگىلەۋ كەرەكتىگى ايتىلدى. مۇنداي قادامدار حالىقتىڭ ءارتۇرلى توپتارىنىڭ ازاماتتىق قۇقىقتارىن ەسكەرەتىن ينكليۋزيۆتى قوعام قۇرۋعا ىقپال ەتەرى ءسوزسىز», دەدى سەنات توراعاسى.
كلۋب وتىرىسىندا تالقىلانعان ماڭىزدى ماسەلەلەردىڭ ءبىرى مەديا سالاسىنا قاتىستى بولدى. ماۋلەن اشىمباەۆ پاندەميا كەزەڭىندە مەدياكوممۋنيكاتسيانىڭ ەرەكشە ءرول اتقارعانىن نازارعا الدى.
«پاندەميا كەزەڭىندە ناقتى مالىمەتتەر مەن تەكسەرىلگەن اقپاراتتاردىڭ تاپشىلىعى بايقالدى. سوندىقتان ادامدار اقپارات كوزدەرىنە مۇقيات ءمان بەرىپ, بەدەلدى مەديالارعا عانا باسىمدىق بەردى. بۇدان ساپالى جاڭالىقتار تاراتاتىن جۋرناليستيكا پايدا كوردى. ناتيجەسىندە, الەمنىڭ جەتەكشى قۇرالدارىنىڭ وقىرماندارى كوبەيىپ قانا قويماي, ولاردىڭ اقىلى اقپارات قورى دا ارتا تۇسكەن», دەدى پالاتا توراعاسى.
سونىمەن قاتار ماۋلەن اشىمباەۆتىڭ ايتۋىنشا, رەسمي اقپارات كوزدەرىنە دەگەن سەنىمسىزدىك فەيك-نيۋسدەردىڭ جانە ءارتۇرلى كونسپيرولوگيالىق تەوريالاردىڭ كوبەيۋىنە اكەلىپ سوقتىرعان.
«قازىرگىدەي اقپاراتتار اعىنىندا اداسىپ قالماۋ ءۇشىن ادامعا اق پەن قارانى اجىراتاتىن ارنايى ءبىلىم كەرەك. بۇل رەتتە جاڭا زامان ادامى ءۇشىن مەدياساۋاتتىلىقتىڭ ماڭىزى زور ەكەنى ءسوزسىز. مەنىڭشە, وسى ترەندتى ەسكەرىپ, قازاقستاندا الەمگە عىلىمي كوزقاراس قالىپتاستىراتىن سالالىق جۋرناليستيكانى دامىتۋعا جانە عىلىمدى دارىپتەيتىن قوعامدىق پىكىردىڭ كوشباسشىلارىن دايىنداۋعا كوڭىل بولگەن ءجون. بۇل مەديا سالاسىنىڭ ساپاسىن ارتتىرۋعا مۇمكىندىك بەرەدى», دەپ قورىتىندىلادى ماۋلەن اشىمباەۆ.
