ەسكە سالساق, «دومبىراشىلار وداعى» رەسپۋبليكالىق قوعامدىق بىرلەستىگى 10 تامىزدا قۇرىلدى. قوعامدىق بىرلەستىكتىڭ نەگىزگى ماقساتى ۇلتتىق ونەردى كەڭىنەن دارىپتەپ, جاستاردىڭ ءداستۇرلى ونەرگە قىزىعۋشىلىعىن وياتىپ, ۇلتتىق قۇندىلىعىمىزدى دامىتۋ جولىندا ەڭبەك ەتۋ بولىپ وتىر. ال بىرلەستىكتىڭ شارتى بويىنشا مۇشەلىككە تەك ءداستۇرلى انشىلەر, جىرشىلار مەن تەرمەشىلەر قابىلدانادى. دومبىراشىلار وداعى حالقىمىزدىڭ ءداستۇرلى ءان ونەرىن, كۇي ونەرىن جانداندىرۋ, جاس بۋىن وكىلدەرىنىڭ شىعارماشىلىعىن قولداۋ ءۇشىن قۇرىلعان. وسى ماقساتتا ءتۇرلى بايقاۋلار, باعدارلامالار مەن كونتسەرتتەر, ەكسپەديتسيالار ۇيىمداستىرىلادى.
وداقتىڭ اشىلۋ راسىمىندە الماتى قالاسىنىڭ ونەر وكىلدەرىنە «دومبىراشىلار وداعى» رەسپۋبليكالىق قوعامدىق بىرلەستىگىنىڭ كۋالىكتەرى مەن سەرتيفيكاتتارى تابىستالدى. جيىنعا رامازان ستامعازيەۆ, ساۋلە جانپەيىسوۆا, نۇرجان جانپەيىسوۆ, ۇلجان بايبوسىنوۆا, گۇلميرا ءنالىباي جانە «دومبىرا» ۇلتتىق تەلەارناسىنىڭ باسشىسى قانات ەرجىگىتوۆ قاتىسىپ, ءسوز سويلەدى. ولار بىرلەستىكتىڭ ماقساتىن, جاسايتىن جۇمىستارىن, قازىرگى تاڭدا ءداستۇرلى ونەرگە قاتىستى ماسەلەلەردىڭ شەشىمىن قاراستىرۋ جولدارىن تالقىلادى. سونىمەن قاتار «دومبىرا» ۇلتتىق تەلەارناسىنىڭ تىكەلەي جەرسەرىكتىك حابار تاراتاتىن OTAU TV قىزمەتىنە قوسۋ, ۇلتتىق ونەردى شالعاي مەكەندەگى حالىققا دا كورسەتۋ ماسەلەسى قوزعالدى.
