مۋزەي قورىنا 23 دانا ءدىني سيپاتتاعى كونە قولجازبالار مەن تاريحي كىتاپتارىن, سونداي-اق ياساۋي كەسەنەسى بەينەلەنگەن جارتىعاسىرلىق تاريحى بار كىلەمشەنى تارتۋ ەتكەن اقساقال ءحىح عاسىرعا ءتان قۇندى دۇنيەلەر اتا-بابالارىنان قالعانىن جانە ءوزى ءبىلىم الىپ جۇرگەن كەزەڭدە ۇستازدارى بەرگەنىن ايتادى.
سونداي-اق الياكبار ارتىق ۇلى تاريحي دەرەكتەرى مول مۇرالاردى قورىق-مۋزەي قورىنا تابىستاپ, بولاشاققا اماناتتاۋدى ءجون ساناعانىن جەتكىزدى. اقساقال تابىس ەتكەن جازبا ەسكەرتكىشتەرى قاتارىندا الىشەر ءناۋايدىڭ ەڭبەكتەرى, سوفى اللاياردىڭ «ماسلاكۋل مۋتتاقين» (تاقۋالار جولى), «مۋحتاسار ال-ۋيقايا», مۇحاممەد (س.ا.ۋ.) پايعامبارىمىزدىڭ حاديستەرى تۋرالى, «دالايل حايريات» (جاقسىلىق دالەلدەرى), يسلام شارتتارى, اراب ءتىلىنىڭ سينتاكسيسى, «فيكھ» سىندى كىتاپتار مەن قولجازبالار بار. مۋزەي ديرەكتورىنىڭ مىندەتىن اتقارۋشى ەرسىن بوتاباي ۇلى مۋزەي قورىنا تاپسىرىلعان باعا جەتپەس قۇندى كىتاپتار ءۇشىن الياكبار اقساقالعا زور العىسىن جەتكىزدى.
تۇركىستان وبلىسى
