وڭىردە 18 ماقتا وڭدەۋ زاۋىتىنىڭ 206 قابىلداۋ بەكەتى جۇمىس ىستەيدى. بيىل 110 مىڭ گەكتار القاپقا ماقتا داقىلى ەگىلگەن. ەگىستىكتىڭ گەكتارىنان 25,2 تسەنتنەردەن, جالپى 276,1 مىڭ توننا ءشيتتى ماقتا جيناۋ جوسپارلانىپ وتىر. «اق التىننىڭ» 90 پايىزى تەحنيكانىڭ كومەگىمەن جينالادى. وبلىستىق اۋىل شارۋاشىلىعى باسقارماسىنىڭ مالىمەتىنە قاراعاندا, بيىلعى قۋاڭشىلىققا قاراماستان ماقتالى اۋدانداردىڭ شارۋالارى اعىن سۋدى ارتىعىمەن الىپتى. تىڭايتقىش پەن تۇقىمدىق شيتتەن تارشىلىق كورمەي, جەڭىلدەتىلگەن باعادا بەرىلەتىن جانار-جاعارماي دا جەتكىلىكتى بولعان. ديقاندار مەملەكەتتىك دەڭگەيدە جاسالعان كەلىسىم بويىنشا كورشى وزبەكستاننان كەلەتىن اعىن سۋدىڭ ارتقانىن ايتۋدا. شارۋالار ءار گەكتاردان ورتا ەسەپپەن 30 تسەنتنەردەن ءونىم الىپ, 500 مىڭ تەڭگەگە دەيىن پايدا تابادى.
«مەملەكەت باسشىلارىنىڭ ەكىجاقتى ىنتىماقتاستىق تۋرالى كەلىسىمىنىڭ ناتيجەسىندە وسىنداي ءونىم الىنىپ, تاۋار وندىرۋشىلەردىڭ الەۋمەتتىك ەكونوميكالىق جاعدايى ارتۋدا. ماقتاارال جانە جەتىساي اۋداندارى سۋدى ترانسشەكارالىق «دوستىق» كانالى ارقىلى الادى», دەيدى اۋىل شارۋاشىلىعى باسقارماسىنىڭ باسشىسى نۇربەك بادىراقوۆ.
اۋدانداردا جۇمىس ساپارىمەن بولعان وبلىس اكىمى ومىرزاق شوكەەۆ اعىن سۋدى ارتتىرۋ ماقساتىندا قولعا الىنعان سۋ ارنالارىن مەحانيكالىق تازالاۋ جۇمىستارىمەن تانىستى. وبلىستىق بيۋدجەت ەسەبىنەن جەتىساي اۋدانىنداعى بارلىق 241 شاقىرىمدى قۇرايتىن 121 قاشىرتقىعا مەحانيكالىق تازالاۋ جۇمىستارى جۇرگىزىلۋدە. بۇل ءوز كەزەگىندە سۋارمالى جەرلەردىڭ اعىن سۋمەن قامتاماسىز ەتىلۋىن جاقسارتادى. جەراستى سۋىن تومەندەتىپ, ەگىستىكتىڭ تۇزدانۋىنىڭ الدىن الىپ, ماقتا داقىلىنىڭ ونىمدىلىگىن ارتتىرادى. سونىمەن قاتار شارۋالاردى ساپالى تىڭايتقىشتارمەن, تۇقىممەن قامتاماسىز ەتىپ, ونىمدىلىكتى ارتتىرۋ ماقساتىندا وزبەكستان رەسپۋبليكاسىنىڭ «Rasayana» جشس-مەن جۇمىس قولعا الىندى. اتالعان كومپانيا اۋىل شارۋاشىلىعى تاۋار وندىرۋشىلەرىنە ونىمدىلىگى جوعارى «Aminosid» تىڭايتقىشتارى مەن ماقتانىڭ «سۇلتان» ەليتالىق تۇقىمدارىن جەتكىزۋمەن اينالىسادى. بۇل تاجىريبە ماقتانىڭ تۇسىمدىلىگىن 40-60 تسەنتنەرگە جەتكىزۋگە بولاتىنىن كورسەتىپ وتىر.
وبلىستا بۇگىندە 1,1 ملن توننا كوكونىس, 1,7 ملن توننا باقشا ونىمدەرى, 290 مىڭ توننا كارتوپ جانە 61 مىڭ توننا جەمىس-جيدەك جينالدى. جىل سوڭىنا دەيىن كۇزگى ءونىمنىڭ جالپى كولەمى 3,5 ملن تونناعا جەتكىزىلەدى. وڭىردە ءارتاراپتاندىرۋ ناتيجەسىندە مال ازىقتىق داقىلداردىڭ كولەمى 2,6 مىڭ گەكتارعا ارتىپ, 215,4 مىڭ گەكتارعا, باقشا داقىلدارى 8,9 مىڭ گەكتارعا ارتىپ, 70,6 مىڭ گەكتارعا ورنالاستىرىلعان. سايكەسىنشە, ماقتانىڭ ەگىس كولەمى 16,2 مىڭ گەكتارعا كەمىگەن. سونداي-اق ءداندى داقىلدار – 300 مىڭ گەكتار, مايلى داقىلدار – 85 مىڭ, كوكونىس – 43 مىڭ, كارتوپ 15 مىڭ گەكتار كولەمىندە ءوسىرىلدى. وبلىستاعى 238 مىڭ گەكتار استىقتان 238,3 مىڭ توننا ءدان قامباعا قۇيىلسا, 46,1 مىڭ گەكتار داندىك جۇگەرىنىڭ تۇسىمدىلىگى گەكتارىنا 57 تسەنتنەر بولىپ, 118 مىڭ توننا, ال 83,5 مىڭ گەكتار ماقسارى داقىلىنان 5,3 تسەنتنەردەن 36,4 مىڭ توننا ءونىم جينالدى. سوڭعى جىلدارى ەڭبەك ونىمدىلىگىن ەسەلەپ ارتتىرۋ باعىتىندا وبلىستىڭ كليماتتىق ەرەكشەلىگىن پايدالانا وتىرىپ, ء«بىر القاپتان جىلىنا 2-3 ءونىم الۋ» جوباسى ىسكە اسىرىلىپ وتىر. بيىل 9 مىڭ گەكتاردا 2 مىڭعا جۋىق جوبا جۇزەگە اسىرىلۋدا. بۇگىندە ءبىرىنشى ونىمنەن – 160 مىڭ, ەكىنشى ونىمنەن 60 مىڭ توننادان استام ءونىم جينالدى. جالپى كولەمى 1 424,6 گەكتار جىلىجايدا 145 مىڭ توننادان استام ءونىم ءوندىرىلدى. كۇزگى جيىن-تەرىن جۇمىستارى جالعاسۋدا.
تۇركىستان وبلىسى
