داۋرەن مەن دانيار ەلەۋسىنوۆتەردەي ەكى چەمپيوندى بوكسقا باۋلىپ, شارشى الاڭدا ونەر كورسەتۋدىڭ قىر-سىرىن ۇيرەتكەن, قازىردە سول جىگىتتەردىڭ جەكە جاتتىقتىرۋشىسى بولىپ جۇرگەن مارات ەلەۋسىنوۆ جاقىندا 2013 جىلدىڭ «جىل باپكەرى» سىيلىعىن الدى. جاقىندا ءبىز ەلىمىزدىڭ سپورت جانە دەنە شىنىقتىرۋ ىستەرى اگەنتتىگى تاعايىنداعان جۇلدەسىمەن اعامىزدى قۇتتىقتاپ, بىلىكتى باپكەرمەن اڭگىمەلەسۋدى ءجون كوردىك.
-مارات اعا, «جىل باپكەرى» اتاعىمەن قۇتتىقتايمىز!
-راحمەت, باپكەردىڭ ەڭبەگى كورىنىپ, باعالانىپ جاتسا نۇر ۇستىنە نۇر. كىم كىمگە دە ابىروي.
-بوكسقا قالاي كەلدىڭىز؟ اڭگىمەنى سودان باستاساق.
-مەن بوكسپەن اسكەر قاتارىندا ءجۇرىپ اينالىسا باستادىم. اۋىلدا وسكەن بالامىز عوي, بوكستىڭ نە ەكەنىن بىلگەن جوقپىز. اسكەري بورىشىمدى وتەپ كەلگەننەن كەيىن, الماتىداعى حالىق شارۋاشىلىعى ينستيتۋتىنىڭ دايىندىق كۋرسىنا وقۋعا ءتۇستىم. وندا عازيز قۇدايبەرگەنوۆ دەگەن باپكەرمەن تانىستىم. سونىڭ قاراماعىندا بوكسپەن اينالىستىم. كەيىننەن, ءبىر سەبەپتەرمەن وقۋدى تاستاپ كەتىپ, № 1 اۆتوجوندەۋ ۇيىمىندا اۆتوسلەسار بولىپ جۇمىسقا كىرىستىم. سول جەردە جۇمىس ىستەپ, ينستيتۋتتاعى باپكەرىمنىڭ جاتتىعۋ زالىنا بارىپ ءجۇردىم. جاتتىقتىرۋشىم مەنى شەتتەتكەن جوق. كەرىسىنشە, جارىسقا دايىنداپ, ماعان ينستيتۋت بىرىنشىلىگىنە قاتىسۋىما مۇمكىندىك بەردى. وسى مۇمكىندىكتى پايدالانىپ, وقۋدان شىعىپ كەتسەم دە كافەدرامنىڭ اتىنان چەمپيون اتاندىم. سودان كەيىن قالانىڭ بىرىنشىلىگىن ۇتىپ الدىم. ول كەزدە 20 جاستا بولاتىنمىن.
-ءسىز بالقاشتا وليمپيادا چەمپيونى, «ۆەل باركەر» كۋبوگىنىڭ يەگەرى ۆاسيلي جيروۆتىڭ باپكەرى الەكساندر اپاچينسكيدەن ءتالىم الدىڭىز عوي.
-ءيا, سپورتشى جىگىتتەرمەن تانىسىپ, سولار وقيتىن بالقاشتاعى پەداگوگيكالىق ۋچيليششەنىڭ دەنە شىنىقتىرۋ بولىمىنە بارىپ, ەمتيحاندى «جاقسى» دەگەن باعاعا تاپسىرىپ وقۋعا ءتۇستىم. ءسويتىپ, اپاچينسكي باپكەرگە باردىم. سول كىسىدە اينالىسىپ ءجۇرىپ «مەتاللۋرگ» ستاديونىنداعى جاڭادان اشىلعان بوكس ۇيىرمەسىندەگى باسقا جاتتىقتىرشىعا اۋىسىپ كەتتىم. ۋچيليششەنى اياقتاعانشا سول جەردە جاتتىقتىق. ءبىراز جارىستارعا قاتىسىپ, جەڭگەنىمىز دە, جەڭىلگەنىمىز دە بار. مەنىڭ جەتە الماعانىما ەكى ۇلىم جەتسە دە ارمانداپ ءجۇرۋشى ەدىم.
-باپكەرلىكتى باستاعان كەزدەگى ەڭ العاشقى جەتىستىگىڭىز ەسىڭىزدە مە؟
-ارينە, ءالى ەسىمدە. 1985 جىلى بالقاشتاعى ۋچيليششەنى اياقتاعاننان كەيىن اۋىلعا قايتتىم. باتىس قازاقستان وبلىسى كازتالوۆكا اۋدانىنداعى اۋىلعا ورالدىق. سول جەردە مەكتەپتە دە تاربيە جونىندەگى مۇعالىمى بولىپ ءجۇرىپ, اۋىل بالالارىنا بوكس سەكتسياسىن اشتىم. كورشىلەس رەسەيدىڭ ساراتوۆ وبلىسىنداعى جارىسقا بالالارىمدى اپارىپ ءجۇردىم. سوندا التى بالام جەڭىمپاز بولىپ اتاندى. وسى جەتىستىكتەن كەيىن اۋدان باسشىلىعى دا بوكسقا كوڭىل بولە باستادى. سودان كەيىن ءبىزدىڭ وبلىسىمىزدا جىلدا وتەتىن جارىستارعا شاقىرتۋ الا باستادىم. جارىستا ءبىزدىڭ بالالار ەكى التىن, ەكى كۇمىس, ءبىر قولا مەدال جەڭىپ الدى. ال جارىستان ورالعاننان كەيىن بۇكىل اۋىل بولىپ, توي جاسادىق. مىنە, سونداي قىزىق كەزدەر دە بولدى.
-كەڭەس وكىمەتى ىدىراپ, قيىن-قىستاۋ زامان بولعان كەزدە, سپورت تا ءبىراز كۇيزەلىسكە ۇشىرادى ەمەس پە؟ سول كەزدى قالاي وتكەردىڭىز؟
-ءيا, كەڭەس وكىمەتى تاراعاندا جاعدايىمىز شىنىمەن قيىن بولدى. سول كەزدە مۇعالىمدىكتى قويىپ, كوممەرتسيامەن اينالىسىپ كەتتىم. ماسكەۋدەن حالىق تۇتىناتىن تاۋارلاردى الىپ كەلىپ, سونى ساتتىق. بىراق, كەيىننەن 1998 جىلى اۋىلدان ورال قالاسىنا كوشىپ كەلدىك. ا.س.پۋشكين اتىنداعى پەداگوگيكالىق ينستيتۋتىنا وقىتۋشى بولىپ جۇمىسقا تۇردىم. سول جەردە بوكس ۇيىرمەسىن اشىپ, ستۋدەنتتەردى جاتتىقتىردىم. دەگەنمەن, ايلىق جەتپەيدى. سوندىقتان, قوسىمشا مەكتەپتە دەنە تاربيەسى ءپانى مۇعالىمنىڭ قىزمەتىن قاتار اتقارىپ ءجۇردىم.
-ۇلكەن ۇلىڭىز داۋرەن بوكسقا قالاي كەلدى؟
-ەڭ ءبىرىنشى باستاعان داۋرەن. ول 12 جاسىنان بوكسپەن اينالىستى. ينستيتۋتتا ستۋدەنتتەردىڭ جاتتىعۋلارىنان كەيىن داۋرەننىڭ سىنىپتاستارىن جيناپ الىپ, 20 شاقتى بالانى دايىندادىم. داۋرەندى جارىستارعا جىبەرە باستادىم. 2000 جىلى تاراز قالاسىندا جاسوسپىرىمدەر اراسىنداعى قازاقستان چەمپيوناتى ءوتتى. ول جارىس سەرىك قوناقباەۆتىڭ ماسكەۋ وليمپياداسىنىڭ كۇمىس جۇلدەگەرى اتانعانىنا 20 جىل تولۋىنا ارنالدى. سول بىرىنشىلىككە داۋرەن مەن ونىڭ براز سىنىپتاسارىن الىپ باردىم. بىراق, جارىس باستالعالى جاتقاندا انام قايتىس بولعانىن ەستىپ, ۇيگە قايتىپ كەتتىم. داۋرەن ءۇشىنشى ورىن,تاعى ءبىر وقۋشىم ەكىنشى ورىن الدى. بۇل جامان ناتيجە ەمەس. بۇرىن سوڭدى ورالدان بوكس سپورتىنان قازاقستان چەمپيوناتىندا ورىن العاندار بولماعان. وسىدان كەيىن ءبىزدىڭ بوكس ۇيىرمەسىنە كوڭىل بولىنە باستادى. 2001 جىلى اتباساردا جاسوسىرىمدەردىڭ ەل چەمپيوناتى ءوتىپ, سول جارىستا داۋرەن چەمپيون اتاندى. 2002 جىلى سپارتاكيادادا چەمپيون بولدى. 2003 جىلى جاستار اراسىندا قازاقستان چەمپيوناتىندا كۇمىس جۇلدەگەر اتاندى. ۇلتتىق قۇراماعا الىندى. 2004 جىلى جاستار اراسىندا ەل چەمپيونى اتاندى. سول جىلى الەم چەمپيوناتى بولۋى كەرەك ەدى. الايدا سەۋلدەگى جارىسقا داۋرەن بىلاي تۇرسىن, ەكىنشى, ءۇشىنشى ورىن العان بوكسشىلار ەمەس, ۇشتىككە كىرمەي جۇرگەن بالا كەتتى. داۋرەن بارا الماي قالدى. 2004 جىلى ەرەسەكتەرگە اۋىستى. سول جىلى ەرەسەكتەر اراسىندا وتكەن قازاقستان چەمپيوناتىنا قاتىسىپ, فينالدا 22:21 ەسەبىمەن باقىت سارسەكباەۆقا جول بەردى. ۇلتتىق قۇراماعا الىندى. 2005 جىلى اتىراۋدا قازاقستان چەمپيونى اتاندى.
-داۋرەن ءبىر جىلدارى افينا وليمپياداسىنىڭ چەمپيونى باقتيار ارتاەۆقا مىقتى قارسىلاس اتانىپ ءجۇردى عوي. بىرنەشە رەت فينالدىق جەكپە-جەكتە كەزدەسىپ ەدى.
-2006 جىلى استانادا پرەزيدەنت كۋبوگى ءوتىپ, فينالدا داۋرەن باقتيار ارتاەۆپەن كەزدەستى. وسى كەزدەسۋدە باقتيار جەڭىسكە جەتتى. سول جىلى ەكەۋى شىمكەنتتە وتكەن قازاقستان چەمپيوناتىنىڭ فينالىندا تاعى دا كەزدەسىپ, ارتاەۆ ءسال باسىمدىقپەن ۇتتى. وسىدان كەينى داۋرەن 75 كيلودا ارتاەۆتان كەيىن ۇلتتىق قۇرامادا ەكىنشى ءنومىرلى بوكسشى بولدى. ءبىز ءۇشىن وليمپيادا چەمپيونى ارتاەۆتان كەيىن ەكىنشى ءنومىرلى بوكسشى بولۋ ۇلكەن ابىروي بولدى. سونىڭ ءوزىن ۇلكەن ماقتان تۇتتىق. ستۋدەنتتەر اراسىنداعى وتكەن الەم چەمپيوناتىندا چەمپيون اتاندى.
$12009 جىلى قازاقتان چەمپيونى اتانىپ, ازيا چەمپيوناتىندا قولا جۇلدە الدى.
-داۋرەن تۋرالى ايتتىڭىز. قازىرگى تاڭدا ۇلتتىق قۇرامانىڭ كاپيتانى بولىپ جۇرگەن دانياردى قالاي بوكسقا باۋلىدىڭىز؟ ونىڭ بوكسقا دەگەن ىنتاسىن قالاي بايقادىڭىز؟ -بوكسقا نەگىزىنەن 10 جاستان الىنادى. ال بىراق دانيار ەرتە اينالىسىپ كەتتى. 8 جاسىنان باستاپ, داۋرەنگە جاتتىعۋ جۇرگىزىپ جاتقان كەزدە زالعا كەلىپ جۇرەدى. ءىلىنىپ تۇرعان قاپتى ۇرادى. ءبىر كۇنى 1989 جىلى تۋعان,بوكسپەن التى ايداي اينالىسىپ جۇرگەن بالالارعا سپاررينگ جاساتىپ جاتقانمىن. بويى كىشىرەك بالا بولعان. ءبىر كەزدە دانيار قاسىما كەلىپ: «اكە, مەن مىنا بالامەن شارشى الاڭعا شىعايىنشى», دەدى. وي, بالام قوي, ونىڭ سەنەن جاسى ۇلكەن, التى اي شۇعىلدانىپ ءجۇر, سەن ءالى اينالىسىپ جۇرگەن جوقسىن دەدىم. جالىنىپ, شىعايىنشى دەپ بولماي قويدى. جارايدى دەپ شىعاردىم. قاراسام, دانيار سوققى وتكىزبەيدى. ارتقا شالقايعاندا, قارسىلاسىنىڭ قولى جەتپەي قالادى, قارسى سوققى جاساپ ۇلگەرىپ جاتتى. وسىنى كورگەننەن كەيىن, اينالىسىپ جاتقان توپقا قوسىپ قويدىم. -كوپ ۇزاماي العاشقى جەتىستىكتەرگە دە جەتە باستادى ما؟ -2004 جىلى جاسوسپىرىمدەر اراسىندا قازاقستان چەمپيوناتىنا قاتىسىپ, چەمپيون بولدى. ەڭ ءبىرىنشى رەت باپكەرلەردىڭ كوزىنە تۇسكەن ەدى. 2006 جىلى ءوز سالماعىندا قازاقستان چەمپيونى اتاندى. جاسوسپىرىمدەر قۇراماسىنا الىندى. ازيا چەمپيوناتىنان التىن مەدال الىپ كەلدى. ودان كەيىن كادەتتەر اراسىندا الەم چەمپيوناتىندا توپ جارىپ, الەم چەمپيوناتىنىڭ ۇزدىك بوكسشىسى اتانىپ كەلدى. دانيار 2007 جىلى كادەتتەر اراسىنداعى الەم چەمپيوناتىندا قولا الدى. 2008 جىلى جاستار اراسىنداعى الەم چەمپيوناتىندا كۇمىس جۇلدەگەر اتاندى. -كەز كەلگەن ادام ءوزىن-ءوزى جەتىلدىرۋمەن اينالىسۋ كەرەك. سولاي عوي. -ارينە, مىندەتتى تۇردە ءبىر ورىندا تۇرا بەرمەي, ءبىلىمىڭدى, بىلىكتىلىگىڭدى جەتىلدىرۋ قاجەت. ماسەلەن, جارىستارعا بارىپ, وقۋ-جاتتىعۋ جيىندارىندا جۇرگەندە تاجىريبەسى مول نۇرعالي سافيۋللين, دامير بۋدانبەكوۆ سياقتى كىسىلەردىڭ ىستەگەنىن كورىپ كوپ نارسە ۇيرەنەسىن. تاجىريبە سونداي كەزدە جيناقتالادى. -مارات اعا, ەكى ۇلىڭىزدى كىشكەنتايىنان جاتتىقتىرىپ كەلەسىز. ءارى اكە, ءارى باپكەرىسىز. سىزدەن ارتىق قوس سپورتشىنى ەشكىم بىلمەيدى. ەكەۋىنىڭ شارشى الاڭداعى قيمىلدارىن سيپاتتاپ بەرسەڭىز. -ەكەۋى ەكى ءتۇرلى. دانيار تەحنيكالىق جاعىنان شەبەر بولاتىن بولسا, داۋرەن كۇشكە يەك ارتادى. ەكەۋىنىڭ مانەرى ەكى بولەك. دانياردى تۋرا داۋرەن سياقتى جاتتىقتىراتىن بولسام, دانياردان بۇگىنگىدەي بوكسشى شىقپاي قالۋشى ەدى. داۋرەن قۋاتتى, دانيارعا قاراعاندا بۇلشىق ەتتەرى وزگەشە. دانيار سوققى وتكىزبەي, قيمىلداعاندى جاقسى كورەدى. داۋرەن ءوزى ءبىر سوققى وتكىزسە, ەكى سوققىمەن جاۋاپ قايتارعاندى ۇناتادى. ۋاقىتىنان بۇرىن قارسىلاسىن قۇلاتىپ تاستاۋدى قالايدى. دانيار وتە سەزىمتال, قارسىلاسى ۇرماي جاتىپ قالاي ۇرايىن دەپ جاتقانىن بايقاپ ۇلگەرەتىن قاسيەتى بار, قابىلەتى جوعارى. -ءسىز قانداي باپكەرسىز؟ قاتالسىز با؟ -(ويلانىپ بارىپ) قاتالدىعىم دا بار؟ قاتال بولاتىن جەردە قاتالمىن. تالاپ قوياتىن جەردە تالاپ قويامىن. قازىر كوشەدە بالانى قىزىقتىراتىن نارسە كوپ. تالاپ ەتپەسەڭ, ءسال قاتال بولماساڭ, بالانى جوعالتىپ الاسىن. قالادا قىدىراتىن جەر كوپ. تۇنگى كلۋب دەگەندەي. سونداي جەرلەرگە بارماۋعا شەك قويۋعا تۋرا كەلدى. ەكەۋى دە ودان اۋلاق. ونداي جەرلەرگە بارمايدى. -ۇلتتىق قۇراما كوماندانىڭ باپكەرىسىز. قازىر قانداي دايىندىق ءجۇرىپ جاتىر؟ -اقپاننىڭ بەسىندە استانادا وقۋ-جاتتىعۋ جيىنى باستالادى. بىرلەسكەن جاتتىعۋعا رەسەي, انگليا قۇرامالارى كەلەدى. سوسىن ەلوردادا ءتورت قۇرامانىڭ ماچتىق كەزدەسۋلەرى وتەدى. وعان جاڭا اتالعان ءۇش قۇرامادان باسقا وزبەكستان بوكسشلارى قاتىسادى. تاۋلى ايماقتا جاتتىعۋ جيىنىن جاساپ كەلدىك. -ەلەۋسىنوۆتەر اۋلەتىندە ەكى بوكسشى, ءبىر باپكەر بار. جاتتىعۋدان ۇيگە كەلگەندە, بوكس تۋرالى سويلەسىزدەر مە؟ الدە باسقا تاقىرىپتاردى اڭگىمەگە ارقاۋ ەتەسىزدەر مە؟ -كوبىنە بوكس. ورالدا ساكەن دەگەن دوسىم بار. سول جولداسىم بالالارىنا: «مارات اعانىڭ ۇيىنە بارامىز, جۇرىڭدەر» دەسە, بالاسى بارمايمىز دەپ ايتادى ەكەن. «ءوي جۇرىڭدەر. داۋرەن, دانيارلارمەن وينايسىڭدار» دەسە بالالارى: «ولار وينامايدى, ولار تەك بوكستاسا بەرەدى» دەيدى ەكەن (ك ۇلىپ). -قىزىقتى وقيعانى ەسكە تۇسىرە الاسىز با؟ - داۋرەن ءتورت جاسىندا قولىن سورپا كۇيدىرىپ العان ەدى. سودان كەيىن ءوزىمىز ونى كيىندىرىپ, جۇرەتىنبىز. سوعان ۇيرەنىپ كەتكەن قوي. جاتتىعۋعا باراتىن بولسا, سومكەسى دايىن تۇرادى. اناسى نە كەرەك, ءبارىن دايىنداپ قوياتىن. سوعان ابدەن ۇيرەنىپ العان. ءبىر كۇنى, جاتتىعۋعا قولىنا بايلايتىن ءبينتسىز كەلىپ تۇر. «ءبينتىڭ قايدا؟» دەپ سۇراسام, «وي, انام سالۋعا ۇمىتىپ كەتپى» دەيدى (كۇلەدى). -دانيار مەن داۋرەندى, ءوزىڭىزدى سپورت سۇيەر قاۋىم جاقسى بىلەدى. ال قوس چەمپيوننىڭ اناسى, وتباسىنىڭ وزگە دە مۇشەلەرى تۋرالى ايتىپ بەرسەڭىز؟ -ەكى ۇلىمنىڭ قول جەتكىزگەن جەتىستىگىنە جۇبايىم عاليانىڭ قوسقان ۇلەسى زور. تاماقتارىن, جاتتىعۋ كيىمدەرىن دايىندايدى. ءتىپتى بينتتەرىنە دەيىن جۋىپ, ازىرلەپ قويادى. سول بالالاردىڭ جاعدايىن جاساپ وتىرۋ ءۇشىن, مۇعالىمدىك قىزمەتىنەن دە كەتتى. قازىر ءۇيدىڭ شارۋالارىمەن اينالىسادى. الماتى وبلىسىنىڭ تۋماسى, ءوزىم باتىس قازاقستان وبلىسىنانمىن. الماتىدا جۇرگەندە تانىستىق. بيىل قۇدا قالاسا, وتاسقانىمىزعا 30 جىل بولادى. قىزىمىز بار. ەسىمى - دينارا. قازىر تۇرمىستا. بيگە اۋەس بولدى. ءتۇرلى بايقاۋلارعا قاتىسىپ, جۇلدەلەر الىپ ءجۇردى. جوعارعى وقۋ ورنىندا حورەوگرافيا بويىنشى ءبىلىم الدى. 2007 استاناعا كوشىپ كەلدىك. قىزىمىز وسىندا مەملەكەتتىك «ناز» بي انسامبلىندە جۇمىس ىستەدى. قازىر ىشكى اسكەردىڭ انسامبلىندە. داۋرەن 2010 جىلى ۇيلەندى. ەكى نەمەرەمىز بار, ۇلكەنى ۇل 3 جاستا, كىشىسى قىز. 5 ايلىق. -عاليا اپايىمىز, ۇلداردىڭ شارشى الاڭداعى ونەرلەرىن تاماشالاي ما؟ -وسى استانادا بولاتىن جارىستاردى قالت جىبەرمەيدى. جانكۇيەر بولىپ وتىرادى. بوكسشىلاردىڭ اتى-ءجونىن, جەتىستىكتەرىنىڭ ءبارىن بىلەدى. باستى جانكۇيەرىمىز دەۋگە دە بولادى. -نەمەرە ءتاتتى عوي, اعا. اتا بولعان قالاي ەكەن؟ بوكسشى بولامىن دەي مە؟ -وقۋ-جاتتىعۋ جيىنىنان كەلگەننەن كەيىن, سونى ساعىنىپ كەلەمىن. الىستا جۇرگەندە تەلەفونمەن سويلەسەمىن. نەمەرە وتە ىستىق بولادى ەكەن. ءابىلمانسۇر نەمەرەمنىڭ ويىنى دا بوكس. دانياردىڭ 14-15 جاستا كيگەن بوكسشىنىڭ اياق كيىمىن, ۇستىندەگى كيىمىن كيىپ الىپ, بوكس زالىنا بارادى. ونى شەشپەيدى. جىلاپ سومكەسىنە سالىپ الادى. اندا بارىپ كيەمىن دەيدى. زالدا قولىن بينتپەن وراپ الىپ جۇرەدى, سوققى جاسايدى. بوكسشى بولام دەسە, ەش قارسىلىعىم جوق. بوكس تا ونەر عوي. دانيار ايتقانداي, بوكس ول توبەلەس ەمەس, ول ناعىز ونەر. -مارات اعا, وكىنەتىن, «قاپ, اتتەڭ» دەيتىن كەزدەرىڭىز بار ما؟ -(كوپ ويلانىپ بارىپ) بار عوي..... داۋرەندى جاتتىقتىرعاندا بىلاي ىستەۋىم كەرەك ەدى, بىلاي جاساۋىم كەرەك ەدى دەپ, كەيىن سول كەزدە جىبەرگەن قاتەلىكتەرىمدى دانياردى جاتتىقتىرعاندا جىبەرمەۋگە, تۇزەتۋگە تىرىساسىن. داۋرەن سول كەزدە قازاقستان چەمپيونى بولا تۇرا, جاستار اراسىنداعى الەم چەمپيوناتىنا قاتىسا المادى. سول كەزدە ءبىر ارەكەت جاساۋىم كەرەك پە ەدى دەپ ويلايسىن. بىراق, اللاعا شۇكىر. بۇيىرعان كەتپەيدى دەيدى عوي. بۇيىرماعان نارسە, ءتىپتى قالاي تىرىسساڭ دا بولمايدى. -باپكەر تەك سپورتتىڭ قىر-سىرىن ءوز تاربيەلەنۋشىسىنىڭ بويىنا ءسىڭىرىپ قانا قويماي, ءار كەزدە قولداي كورسەتەتىن پسيحولوگ تا بولۋ كەرەك قوي؟ -ارينە. جەڭىلىستەن كەيىن ەش ۋاقىتتا داۋرەنگە دە, دانيارعا دا ۇرىسقان ەمەسپىن. «ءبارى جاقسى, ءبارى دۇرىس بالام. ەشتەڭە ەتپەيدى, كەيىن اناليز جاسايمىز» دەپ بالالاردى جۇباتامىز. -بالالارىڭىزدىڭ قاتتى ۋايىمداپ, قينالعان ساتتەرى بولعان شىعار, اعا؟ -دانياردىڭ قاتتى قينالعان ءساتى وليمپيادادا قول سوزىم جەردە مەدالدان ايىرىلىپ قالعان كەزى. شيرەك فينالدا يتاليان بوكسشىسىنا جول بەرگەن ەدى. بىراق ءبىر جىلدان كەيىن, الماتىداعى الەم چەمپيوناتىندا ەسەسىن قايتاردى. جارىستاردىڭ ءبارىن تاسپاعا جازىپ الۋعا تىرىسامىز. قارسىلاستارىن قيمىلىن, وزدەرىنىڭ جۇرگىزگەن بوكسىن ۇشەۋىمىز وتىرىپ قارايمىز. ساراپتاما جاسايمىز. -وسىنداي ساراپتاما جاساۋ ءبىزدىڭ ۇلتتىق قۇرامادا تاجىريبەدە بار ەمەس پە؟ الماتىداعى الەم چەمپيوناتىنا سولاي ازىرلىك جاسادىڭىزدار ما؟ -بۇل تەك الماتىدا وتكەن الەم چەمپيوناتىنىڭ الدىندا عانا ەمەس, ۇلتتىق قۇراماعا باس باپكەر بولىپ مىرزاعالي ايتجانوۆ كەلگەننەن بەرى قولعا الىنعان دۇنيە. بارلىق وقۋ-جاتتىعۋ جيىندارىندا, بوس ۋاقىت كەزىندە تەوريالىق ساباق وتكىزىلەدى. ءار سالماقتاعى بارلىق سپرتشىلاردى قاراپ شىعىپ, قاتەلىكتەرىن, ۇتىمدى جاقتارىن تالقىدان وتكىزەمىز. ءار سپورتشىعا كورسەتىپ, ۇيرەتەمىز. ۇرىس تاكتيكاسىن ءتۇسىندىرىپ, وعان قالاي قارسى تۇرۋ كەرەكتىگى ايتىلادى. -باپكەردىڭ ءبىر كۇنىن الىپ قاراساق. كۇن ءتارتىبىڭىز قانداي؟ -وقۋ-جاتتىعۋ جيىنىنان بوس كەزىمدى الاتىن بولساق, قىستىكۇنى قار جاۋسا, ەرتە تۇرىپ اۋلاداعى قاردى كۇرەيمىز, جازدا باۋ-باقشامەن اينالىسامىن. بوس ۋاقىتىمدى نەمەرەلەرىمە ارنايمىن, سولارمەن وتكىزەمىن. ەندى كوبىنە وقۋ-جاتتىعۋدا جۇرگەندىكتەن, ول جاقتا كۇن ءتارتىبى قاتاڭ بولاتىنى بەلگىلى. تاڭعى 7:45-تە ساپقا تۇرامىز, مىندەتتى تۇردە سپورتشىلارمەن بىرگە ءانۇران ورىندايمىز. سوسىن تاڭعى جاتتىعۋلار. جاتتىعۋ جاساپ, جاياۋ سەرۋەندەيمىز. -باپكەرلىكتەن جالىققان كەزدەرىڭىز بولدى ما؟ -جوق. الدا ءالى جەتپەگەن بەلەستەر, ورىندالماعان ماقساتتار بار. سولاردى ورىنداماي جاتىپ, سولارعا جەتپەي جاتىپ, شارشاساڭ قالاي وعان جەتەسىڭ؟! -ەگەر 30 جىلعا ارتقا ورالىپ, الدىڭىزدا تاڭداۋ تۇرسا, وسى باپكەرلىك جولدى قايتا تاڭدار ما ەدىڭىز؟ -تاڭدار ەدىم. سول كەزدە جىبەرگەن قاتەلىكتەردى بولدىرماي, وسى جولدى تاڭدار ەدىم. ۇستاز بولۋ تۇقىمىمىزدا بار. اكەم 43 جىل ۇستاز بولعان كىسى. بالۋان بولعان ادام, جاستىق شاعىندا كۇرەسكەن. سودان بىرەۋدىڭ قابىرعاسىن سىندىرىپ, ول اكەمىزدى سوتقا بەرگەن (كۇلدى) سودان ەشكىممەن كۇرەسپەيمىن دەپ ۋادە بەرگەن. -كىتاپ وقيسىز با؟ -وقۋ-جاتتىعۋ جيىنىنا كەتكەندە كىتاپ وقيمىز. دانيار دا كىتاپتار الىپ كەتەدى. وسى سوڭعى وقۋ-جاتتىعۋ جيىنىندا شاكارىم قۇدايبەردى ۇلىنىڭ ولەڭدەر جيناعىن وقىدىم. دانيار «اباي جولى» كىتابىن وقىپ جۇرگەن. -اعا, ءوزىڭىزدىڭ بويىڭىزدا ءبىز بىلمەيىن قانداي قاسيەتتەرىڭىز بار؟ -بۇرىندارى ازداپ دومبىرا شەرتىپ, گيتارادا ويناپ, ءان ايتاتىنمىن. ءوزىم سولاقايمىن, دومبىرانى دا, گيتارانى دا سولاقاي شەرتەتىنمىن. قازىر ونى قويىپ ءجۇرمىن. -مارات اعا, ۋاقىت ءبولىپ, بىزگە سۇحبات بەرگەنىڭىزگە كوپ راحمەت. -سىزدەرگە دە كوپ راحمەت! اڭگىمەلەسكەن, جىگەر ازبەرگەنوۆ. دەرەككوز: confederation.kz
