«وزدەرىڭىز بىلەتىندەي, ەلوردانى «نۇر-سۇلتان – جايلى قالا» ماستەر-جوسپارى اياسىندا دامىتىپ جاتىرمىز. تۇرعىن ءۇي جاعدايى — جايلى ءومىر ءسۇرۋدىڭ ماڭىزدى بولىكتەرىنىڭ ءبىرى. قالادا ءومىر ءسۇرۋ ساپاسىن ارتتىرۋ ءۇشىن گازداندىرۋ جۇمىسى ءجۇرىپ جاتىر: وتكەن جىلىتۋ ماۋسىمىنان باستاپ بىرقاتار ەلدى مەكەن گازعا كەزەڭ-كەزەڭىمەن قوسىلا باستادى.
اگروقالاشىق ەلدى مەكەنى تۇرعىندارىمەن كەزدەسىپ, اۋماقتى دامىتۋ ماسەلەلەرىن تالقىلادىق, سونىڭ ىشىندە گازداندىرۋ بارىسى دا تالقىلاندى. قالانى تولىق گازداندىرۋ 2023 جىلى اياقتالادى. «كوكتال-1», «كوكتال-2», «تەمىرجولشىلار», «اگروقالاشىق» ەلدى مەكەندەرىنىڭ تۇرعىندارى گازعا قوسىلدى.
بيىل كۇزدە وڭتۇستىك-شىعىس, پرومىشلەننىي, اگروقالاشىق (قوسىلماعان بولىگى) ەلدى مەكەندەرىنىڭ تۇرعىندارى گازعا قوسىلا الادى. سونداي-اق «قازترانسگاز ايماق» اق كۇيگەنجار, ميچۋرينو, ينتەرناتسيونالنىي ەلدى مەكەندەرىندە گازبەن جابدىقتاۋ جەلىلەرىنىڭ قۇرىلىسىن جۇرگىزۋدە. اتالعان ەلدى مەكەندەردى جىل سوڭىنا دەيىن گازبەن قامتاماسىز ەتۋ جوسپارلانىپ وتىر. «قازاقاۋىل» (قاراوتكەل) شاعىن اۋدانى بويىنشا جوبالاۋ-سمەتالىق قۇجاتتاما ازىرلەنۋدە.
وسىلايشا, جۇيەلى نەگىزدە گاز تاراتۋ جەلىلەرىن سالۋ بويىنشا اۋقىمدى جۇمىستار جالعاسىپ جاتىر. نەبارى ەكى جىلدىڭ وزىندە ەلوردادا 645 كم ىشكى كۆارتالدىق گازبەن جابدىقتاۋ جەلىلەرى سالىندى. جىل سوڭىنا دەيىن تاعى 17 كم گاز تاراتۋ جەلىسىن سالىنادى.
«گازداندىرۋ – ەلباسىنىڭ اۋقىمدى جوباسى. جوبا قالا تۇرعىندارىنىڭ ءومىر ءسۇرۋ ساپاسىن ارتتىرىپ, قالا ەكولوگياسىن ايتارلىقتاي جاقسارتۋعا مۇمكىندىك بەرەدى. وسى باعىتتا جىلۋ ەلەكتر ورتالىقتارىن جاڭعىرتۋ جۇمىستارىن جۇرگىزىپ جاتىرمىز: وسى جىلدىڭ سوڭىنا دەيىن قالعان سۋ جىلىتۋ قازاندىقتارىن گازعا اۋىستىرامىز, جەو-3 بويىنشا جوباعا تۇزەتۋ جۇرگىزىلدى, قۇرىلىس-مونتاجداۋ جۇمىستارى, ونىڭ ىشىندە سۋ جىلىتۋ قازاندىعى دا قالپىنا كەلتىرىلدى. ەگەر جەو-3 6,5 ملن شارشى مەتر تۇرعىن ءۇيدى, ونىڭ ىشىندە الەۋمەتتىك نىسانداردى, اكىمشىلىك عيماراتتاردى جىلۋمەن قامتۋعا مۇمكىندىك بەرسە, وندا سۋ جىلىتۋ قازاندىقتارىنىڭ قۋاتى جەو-3 قۋاتىنان 2 ەسە اسادى. قازاندىقتار ءبىرىنشى كەزەكتە تاپشىلىق بولجاناتىن ۋچاسكەلەردى جىلۋمەن قامتاماسىز ەتەدى. بۇل ماسەلەلەر مەملەكەت باسشىسىنىڭ باقىلاۋىندا», دەپ جازدى ەلوردا اكىمى.
