ءىس-شارا پرەزيدەنت ق. ك. توقاەۆتىڭ 2021 جىلى مامىر ايىندا تاجىكستانعا رەسمي ساپارىندا قابىلدانعان ەكى ەلدىڭ سىرتقى ساياسي ۆەدومستۆولارى اراسىنداعى 2021-2023 جىلدارعا ارنالعان ىنتىماقتاستىق باعدارلاماسىنا سايكەس ۇيىمداستىرىلدى.
قازاقستاندىق دەلەگاتسيانى ءسىم سىرتقى ساياسي تالداۋ جانە بولجامداۋ دەپارتامەنتىنىڭ ديرەكتورى ەرلان شاميشەۆ, تاجىك تاراپىن تر ءسىم ستراتەگيالىق زەرتتەۋلەر باسقارماسىنىڭ باستىعى ۆافو نياتبەكزودا باسقاردى.
كەزدەسۋ بارىسىندا ديپلوماتتار اۋعانستانداعى قازىرگى احۋالدىڭ جانە جالپى وڭىردەگى جاعدايدىڭ ودان ءارى دامۋ ستسەناريلەرىن تالقىلادى. قازىرگى زامانعى ترانسشەكارالىق سىن-تەگەۋرىندەر مەن قاۋىپ-قاتەرلەرگە قارسى ءىس-قيمىل ماسەلەلەرى بويىنشا پىكىر الماستى. تاراپتار اۋعانستانداعى بەلگىلى ساياسي وزگەرىس, زاڭسىز كوشى-قون مەن بوسقىندار اعىمىنىڭ, ەسىرتكى ترافيگى مەن راديكالدى ءدىني كوزقاراستاردىڭ تارالۋىنا بايلانىستى ءوڭىر قاۋىپسىزدىگىنە قاتەر توندىرەدى دەگەن پىكىرگە كەلدى.
«بۇل ەلدەگى الەۋمەتتىك قۇلدىراۋ مەن گۋمانيتارلىق اپاتتىڭ قاۋپىن تۋدىرۋى مۇمكىن», دەپ جازىلعان ۆەدومستۆونىڭ ءباسپاسوز حابارلاماسىندا.
كەلىسسوزدەر قورىتىندىسىندا حالىقارالىق كۇن تارتىبىندەگى ءوزارا قىزىعۋشىلىق تۋدىراتىن بارلىق ماسەلەدە ديالوگ پەن پىكىر الماسۋدى جالعاستىرۋ تۋرالى ۋاعدالاستى. تاراپتار ورتاق ۇستانىمدى شوعىرلاندىرۋ ماقساتىندا اۋعانستانداعى جاعدايدى باقىلاۋدى جالعاستىرۋدى جانە ەكى ەلدىڭ حالىقارالىق ارەناداعى باستامالارىن ءوزارا قولداۋعا دايىن ەكەنىن راستادى.
سونىمەن بىرگە, قر ءسىم سىرتقى ساياسي تالداۋ جانە بولجامداۋ دەپارتامەنتىنىڭ ديرەكتورى ەرلان شاميشەۆ تاجىكستان رەسپۋبليكاسى پرەزيدەنتى جانىنداعى ستراتەگيالىق زەرتتەۋلەر ورتالىعىنىڭ وڭىرلىك قاۋىپسىزدىك پروبلەمالارىن زەردەلەۋ باسقارماسىنىڭ باسشىسى حۋرشەد دوديحۋدوەۆپەن كەزدەستى. تاراپتار اۋعانستان مەن وڭىردەگى احۋال جونىندە پىكىر الماستى.
