«كوروناۆيرۋسپەن كۇرەس ءبىزدىڭ كۇنتارتبىمىزدەگى وزەكتى تاقىرىپتاردىڭ ءبىرى بولىپ قالىپ وتىر.
پاندەميانىڭ ەڭ قيىن كەزەڭىندە شىۇ بويىنشا ارىپتەستەر شىندىعىندا ىنتىماقتاستىقتىڭ «شانحاي رۋحىن» تانىتقانىن زور قۋانىشپەن اتاپ وتەمىن. وسى رەتتە ءوزارا گۋمانيتارلىق كومەك كورسەتىلدى. پاندەمياعا قارسى ءىس-قيمىلدا باتىل بەتبۇرىس حالىقتى جاپپاي يممۋنداۋعا ۇيلەستىرىلگەن قادام جاعدايىندا عانا مۇمكىن بولادى», دەپ توقتالدى قازاقستان پرەزيدەنتى.
وسى ورايدا مەملەكەت باسشىسى كومەككە مۇقتاج تاراپتاردى ەلەۋسىز قالدىرۋعا بولمايتىنىن قاداپ ايتتى. بۇل تۇرعىدا قازاقستاننىڭ سالماقتى ۇسىنىستارى بار.
«QazVac ۆاكتسينامىز سىن تەزىنەن لايىقتى ءوتتى. كلينيكالىق سىناقتار ونىڭ تيىمدىلىگىن دالەلدەدى. ءبىز پرەپاراتتى گۋمانيتارلىق كومەك رەتىندە كورشىلەس ەلدەرگە جەتكىزە باستادىق», دەدى ق. توقاەۆ.
