ەكولوگيا • 17 قىركۇيەك، 2021

قازاقستاندا ەۋرازيالىق ەكولوگيالىق قور قۇرىلدى

باستامانى قر پارلامەنتى ءماجىلىسىنىڭ دەپۋتاتى، ECOJER قاۋىمداستىعى كەڭەسىنىڭ توراعاسى ءلاززات رامازانوۆا ورتالىق ازيا ەكولوگيا مينيسترلەرىنىڭ «C5+1» كەزدەسۋىندە ايتتى، دەپ حابارلايدى Egemen.kz.

بوتاكوز باقبەرگەن

ءىس-شارا اقش پرەزيدەنتىنىڭ ارنايى وكىلى دجون كەرريدىڭ توراعالىعىمەن ونلاين رەجيمىندە ءوتتى.

«قازاقستان بۇگىندە كليماتتىق وزگەرىستەردىڭ سالدارىن سەزىنۋدە. ولاردى بارىنشا ازايتۋ ءۇشىن ECOJER قاۋىمداستىعى جاسىل قارجى ورتالىعىمەن بىرلەسىپ «استانا» احقو بازاسىندا ەۋرازيالىق ەكولوگيالىق قور قۇردى. ول كوگالداندىرۋ، بيوالۋانتۇرلىلىكتى ساقتاۋ جانە اۋماقتاردىڭ شولەيتتەنۋىنە قارسى كۇرەس جونىندەگى جوبالاردى دامىتاتىن بولادى»، دەپ مالىمدەدى ءلاززات رامازانوۆا.

ول قازاقستاندا قۇرعاقشىلىق ۇلعايىپ، جاپپاي كوگالداندىرۋ شەشۋشى ءرول اتقاراتىنىن اتاپ ءوتتى. ەروزياعا قارسى جانە جەلدەن قورعايتىن ورمان ەكپەلەرى كليماتتىڭ وزگەرۋىنە بەيىمدەلۋگە جانە حالىقتىڭ ءومىر ءسۇرۋ ساپاسىن جاقسارتۋعا ىقپال ەتەدى. ورمان ەكپەلەرى پارنيكتىك گازدى ءسىڭىرىپ قانا قويمايدى، سونىمەن قاتار تۇراقتى لاندشافتتاردىڭ پايدا بولۋىنا ىقپال ەتەدى: ولار سۋ رەجيمىن رەتتەيدى، توپىراقتىڭ جاعدايىن جاقسارتادى، ولاردى اۋىلشارۋاشىلىعىنا ساقتايدى، سونىمەن قاتار وسىمدىكتەر مەن جانۋارلارعا قونىس اۋداراتىن دالىزدەر جاسايدى.

«قازاقستاننىڭ باستامالارى كورشى ەلدەرگە قىزىقتى بولۋى مۇمكىن دەپ سەنەمىن. ارال جانە كاسپي تەڭىزدەرىن، تەرەڭ تەڭىز وزەندەرىن، تيان-شان مۇزدىقتارىن ساقتاۋ بۇكىل ورتالىق ازيا ەكولوگيالىق قوعامداستىعىنىڭ مىندەتى بولۋعا ءتيىس. ءدال وسى باعىتتا ەلدەرىمىز كۇش بىرىكتىرۋى قاجەت»، دەپ مالىمدەدى كەزدەسۋدە ءلاززات رامازانوۆا.

ECOJER باسشىسى ەكونوميكانىڭ «تۇراقتى دامۋ رەلستەرىنە» كوشۋ قاجەتتىلىگىن اتاپ ءوتتى.

ء«بىزدىڭ ەلىمىز كومىرتەكتى ەنەرگورەسۋرستارعا باي، الايدا قازاقستاندا دەكاربونيزاتسيا بولماي قويمايتىنىن شىندىق كورسەتىپ وتىر. كومىرتەكتى بەيتاراپتىققا قول جەتكىزۋ ءۇشىن سالانى وزگەرتۋ عانا ماڭىزدى ەمەس. تۇراقتى جانە ۇتىمدى تۇتىنۋ قاعيداتتارىنا، ەكولوگيالىق ءىزدى ازايتۋعا جانە رەسۋرستاردى ۇنەمدەۋگە سۇيەنە وتىرىپ، بۇكىل قوعامنىڭ مىنەز-ق ۇلىق مادەنيەتىن وزگەرتۋ قاجەت»، دەپ اتاپ ءوتتى دەپۋتات.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز