قوڭىر ءۇندى الديلەگەن ۇكىلى ۇمىتكەرلەر بابا مۇراسىن جاڭعىرتىپ, ءوزارا باق سىنادى. سايىستىڭ گالا كونتسەرتى «الاتاۋ» ءداستۇرلى ونەر تەاترىندا شىمىلدىعىن ءتۇرىپ, جەڭىمپازدار مەن جۇلدەگەرلەر ەل الدىندا ماراپاتتالدى. بايقاۋ قورىتىندىسى بويىنشا باس جۇلدە 13 جاستاعى بايان جاناحمەتوۆاعا بۇيىردى. ءوز ويىمەن بولىسكەن جاس ونەرپاز, باي تەمبرلى اسپاپتى جوعارى دەڭگەيدە مەڭگەرىپ, قوبىزدىڭ تاساسىنداعى تىلسىم سىردىڭ تەرەڭىنە بويلاعىسى كەلەتىنىن جەتكىزدى.
«ۇلتتىق مادەنيەتىمىزدىڭ جاۋھارىنا بالاناتىن قوبىز اسپابى عاسىردى عاسىرعا جالعاپ, سازدى سارىنىن ۇزبەي, حالقىمىزدىڭ قۋانىشى مەن مۇڭىن جەتكىزىپ كەلەدى. ءىس-شارانىڭ باستى ماقساتى – ۇلتتىق ونەرىمىزدى ناسيحاتتاۋ, عاسىرلار قويناۋىنان سىر شەرتەتىن دالا ءۇنىن جاستارعا تالىمدىك تاعىلىمى مول دۇنيە رەتىندە دارىپتەۋ», دەيدى الماتى قالالىق مادەنيەت باسقارماسى باسشىسىنىڭ ورىنباسارى دانيار اليەۆ.
بايقاۋعا قازىلىق ەتكەن پريما-قوبىزشى عازيزا عابراحيموۆا سوڭعى جىلدارى جاس تالانتتار شوعىرى كوبەيگەنىن جانە ۇلتتىق ورىنداۋشىلاردىڭ دەڭگەيى ءوسىپ كەلە جاتقانىن ايتادى. وعان دالەل بايقاۋدا ونەر كورسەتۋگە ەلىمىزدىڭ تۇكپىر-تۇكپىرىنەن جۇزدەگەن جاس قوبىزشى نيەت بىلدىرگەن. كونەنىڭ كوزىندەي بولعان اسپاپتى دارىپتەۋ رۋحاني جاڭعىرۋدىڭ وزەگى ەكەنىن العا تارتقان ۇيىمداستىرۋشىلار ءىس-شارانى ءداستۇرلى تۇردە وتكىزىپ تۇرۋعا ىنتالى ەكەندەرىن ءبىلدىردى.
الماتى
