ءىس-شاراعا قاتىسۋشىلار پاندەميامەن كۇرەس, دەنساۋلىق, قاۋىپسىزدىك, ىنتىماقتاستىق جانە باسقا دا باعىتتار بويىنشا ءوز ويلارىن ءبىلدىرىپ, ۇسىنىس-پىكىرلەرىمەن بولىسكەن.
ء«بىز قاتىسقان پلەنارلىق سەسسيا قازاقستان تاۋەلسىزدىگىنىڭ 30 جىلدىعىنا ارنالدى. وسى جىلدار ىشىندە قازاقستان ەگەمەن ەل رەتىندە تولىق قالىپتاسىپ, ايتارلىقتاي جەتىستىكتەرگە قول جەتكىزدى. شىن مانىندە, ءبىز بار بولعانى ءۇش ونجىلدىقتا وردالى ەلگە اينالدىق. شەكارامىزدى شەگەندەپ, ەكونوميكا مەن ىشكى جانە سىرتقى ساياساتتا جاسامپاز شەشىمدەر قابىلدادىق. تاۋەلسىز مەملەكەت قۇرۋ جولىندا ساليقالى قادامدار جاسادىق. ارينە, ءالى دە بولسا جەتىلدىرەتىن, تولىقتىراتىن تۇستارىمىز بار ەكەنى بەلگىلى. الداعى ۋاقىتتا سونىڭ ءبارىن ەڭسەرىپ, ەلدىگىمىزدى ەڭسەلى ەتە تۇسەمىز دەپ سەنەمىن. وعان ءبىزدىڭ الەۋەتىمىز دە, مۇمكىندىگىمىز دە تولىق جەتەدى», دەدى م. اشىمباەۆ.
سونداي-اق ول قازاقستاننىڭ بۇكىل الەممەن اشىق قارىم-قاتىناس ورناتىپ كەلە جاتقانىن جەتكىزدى.
«قازىرگى تاڭدا ءبىز ءۇشىن تاۋەلسىزدىكتەن اسقان قۇندىلىق جوق. سوندىقتان ەگەمەندىكتى ودان ءارى نىعايتۋ – بارشا قازاقستاندىقتىڭ ابىرويلى مىندەتى. وسى جولدا اشىقتىق پەن تولەرانتتىلىق اسا ماڭىزدى. سول سەبەپتى قازاقستان تاۋەلسىزدىكتىڭ العاشقى كۇنىنەن باستاپ بۇكىل الەممەن اشىق قارىم-قاتىناس ورناتىپ, يننوۆاتسياعا, عىلىم مەن بىلىمگە جانە ءوزارا ىنتىماقتاستىققا باسا ءمان بەرىپ كەلەدى», دەدى سەنات توراعاسى.
ماۋلەن اشىمباەۆ قازاق ەلىنىڭ الەمگە جاھاندىق ماسەلەلەردى تالقىلايتىن وسىنداي الاڭ ۇسىنۋىنىڭ ءوزى اشىقتىقتىڭ جارقىن ۇلگىسى دەپ سانايدى.
«بيىل ءىس-شارا ونلاين فورماتتى قولدانىپ وتكىزىلگەنىنە قاراماستان, ادەتتەگىدەي الەمگە بەلگىلى ءارى بىلىكتى سپيكەرلەر مەن ساراپشىلار جۇمىلدىرىلعان. سوعان بايلانىستى كوپتەگەن وزەكتى ماسەلەنىڭ شەشىمىن تابۋ ءۇشىن وسىنداي جيىنداردىڭ بەرەرى مول دەپ ەسەپتەيمىن», دەپ جازىلعان سەنات تورعاسىنىڭ فەيسبۋكتەگى جازباسىندا.
