«قولما-قول اقشاعا اينالدىراتىن» كومپانيالار تاۋار ساتپايدى جانە قىزمەت كورسەتپەيدى, بىراق قاراجاتتى قولما-قول اقشاعا اينالدىرىپ, باسقا فيرمالارعا اقشالاي سىياقىعا جالعان قۇجات جاساۋمەن اينالىسادى.
بۇل زاڭسىز ارەكەتتەر قر قك 216-بابى بويىنشا قارالادى. ول ءۇشىن 7 جىل مەرزىمگە باس بوستاندىعىنان ايىرۋعا دەيىنگى قىلمىستىق جاۋاپكەرشىلىك قاراستىرىلعان.
قارجىلىق مونيتورينگ اگەنتتىگىنىڭ ماڭعىستاۋ وبلىسى بويىنشا اۋماقتىق دەپارتامەنتى ەكى رەت ماتەريالدىق سىياقى ءۇشىن جالعان شوت-فاكتۋرا جازىپ بەرۋدىڭ جولىن كەستى.
ءبىرىنشى جاعدايدا كاسىپكەر ءا.قوسبارماقوۆ جاڭاوزەن قالاسىندا «وزەن-اقجول» جشس جانە قوسبارماقوۆ ادىلەت امانكەلدى ۇلى» جك اتتى ەكى كومپانيا قۇردى. جۇك تاسىمالى جانە قىزمەت كورسەتۋ بويىنشا نەگىزگى قىزمەتتىڭ ورنىنا ەكى كاسىپورىن اتىنان 3,1 ميلليارد تەڭگەدەن استام سوماعا 7 كومپانياعا جالعان بۋحگالتەرلىك قۇجاتتاردى جازىپ بەرگەن.
وسىعان ۇقساس دەرەك اقتاۋ قالاسىندا دا انىقتالدى. ازاماتتار ي.اگاتاەۆ پەن م. ابىلەۆ ء«بورى اقتاۋ» جشس قۇرىپ, ءبىر توپ تۇلعامەن الدىن الا ءسوز بايلاسۋ ارقىلى 1,5 ميلليارد تەڭگەدەن استام سوماعا شوت-فاكتۋرالار جازىپ بەرگەن.
«وسى كومپانيالاردىڭ زاڭعا قايشى ارەكەتىنىڭ ناتيجەسىندە مەملەكەتكە تولەنبەگەن سالىقتار تۇرىندە 767 ميلليون تەڭگەدەن استام سوماعا زالال كەلتىرىلدى.
بارلىق كىنالى ادام ءارتۇرلى مەرزىمگە سوتتالدى», دەپ حابارلايدى قر قما ءباسپاسوز قىزمەتى.
