اباي قۇنانباي ۇلىنىڭ «قاراسوزدەرى» مەن تاڭدامالى پوەزياسىنىڭ نورۆەگ تىلىندەگى اۋدارمالارىنىڭ باسپاگەرى وسحيلد كۇلوس ءسوز سويلەپ, اقىن ولەڭدەرىن وقىپ بەردى. كەشەن قوناقتارىنا ەكىنشى دۇنيەجۇزىلىك سوعىس كەزىندە نورۆەگيانىڭ سولتۇستىگىن ازات ەتۋگە قازاقستاندىق جاۋىنگەرلەردىڭ قاتىسقانى جانە لاگەرلەردە تۇتقىندا بولعانى تۋرالى ايتىلدى. اسىرەسە, ۆزۆود كومانديرى مۇقاش سافارعاليەۆ, ساربازدار عاني قىشمەتوۆ, تەمىربەك كەڭەسباەۆ پەن يمانزادا قاباقوۆ تۋرالى اڭگىمەلەر قىزىعۋشىلىق تۋدىردى.
ەلشى ەركىن احينجانوۆ پاندەميا تەز ارادا اياقتالسا, قازاقستاننىڭ تانىمال ونەر شەبەرلەرىنىڭ نورۆەگيادا, سونىمەن قاتار نورۆەگيالىق ورىنداۋشىلاردىڭ قويىلىمدارى قازاقستاندا ۇيىمداستىرىلاتىنىن اتاپ ءوتتى.
ايتا كەتەيىك, قازاقستان ەلشىلىگى مەن «راۋشانگۇل سارايىنىڭ» كەيىنگى جىلدارى مادەني بايلانىسى ارتىپ كەلەدى.
«قازاقستان ەلشىلىگىن جانە نورۆەگ-قازاق مادەني ورتالىعىن «راۋشانگۇل سارايىندا» قارسى الۋ – ءبىز ءۇشىن ۇلكەن قۋانىش. بۇل كەشەندە «سوۆەتتىك ورىس مۇناراسى» ينستاللياتسياسى بار. ءمۇسىن – فاشيستىك رەجىم كەزىندە ءومىرىن قيعان جانە نورۆەگيادا ينفراقۇرىلىم سالعان كەڭەس وداعىنىڭ بارلىق تۇتقىندارىنا ارنالعان ەسكەرتكىش. ولار تەمىر جول جانە باسقا دا قۇرىلىس نىساندارىندا اۋىر جۇمىس ىستەدى. كوپتەگەن ادامدار سول سوعىس جىلدارى قازا تاپتى. ارالارىندا قازاقتار بولعان. ءتىرى قالعاندار دا بولدى, ءتىپتى كەيبىرەۋى نورۆەگيادا قالىپ, وتباسىن قۇردى», دەدى كەشەننىڭ مۋزىكالىق جەتەكشىسى مارتين رومبەرگ.
