دوڭگەلەك ۇستەل بارىسىندا مەملەكەت باسشىسى ق.توقاەۆتىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىنىڭ قۇقىق قورعاۋ اسپەكتىلەرى تالقىلانىپ, قىلمىستىق-پروتسەستىك زاڭنامانى جەتىلدىرۋ, قۇقىق قورعاۋشىلاردىڭ قۇقىقتارىن قورعاۋدى كۇشەيتۋ, بالالارعا قارسى قىلمىستىڭ الدىن الۋ جانە سىبايلاس جەمقورلىقتىڭ الدىن الۋ تەتىكتەرى قارالدى.
پرەزيدەنت جانىنداعى ادام قۇقىقتارى جونىندەگى كوميسسيا, نۇرسۇلتان نازارباەۆ قورى, اباي اتىنداعى قازۇپۋ-دىڭ سوربوننا-قازاقستان ينستيتۋتى, «استانا» حالىقارالىق قارجى ورتالىعى (احقو), «اكسەلەراتور دوبرا. Izgilik elshisi» ۇلتتىق ەرىكتىلەر قوزعالىسى, «الماتى ادالدىق الاڭى» جوبالىق كەڭسەسى بىرلەسە ۇيىمداستىرعان شاراعا پرەزيدەنت جانىنداعى ادام قۇقىقتارى جونىندەگى كوميسسيانىڭ توراعاسى, نۇرسۇلتان نازارباەۆ قورى اتقارۋشى ديرەكتورىنىڭ ورىنباسارى يگور روگوۆ, ۇعا كوررەسپوندەنت-مۇشەسى, احقو اكادەميالىق كەڭەسىنىڭ مۇشەسى باقىتجان ءابدىرايىم, اباي اتىنداعى قازۇپۋ باسقارما توراعاسى-رەكتورى دارحان ءبىلالوۆ, سىبايلاس جەمقورلىققا قارسى ءىس-قيمىل اگەنتتىگى الماتى قالاسى بويىنشا دەپارتامەنتى باسشىسىنىڭ ءبىرىنشى ورىنباسارى دانيار تاۋمۇرات, پرەزيدەنت جانىنداعى ۇقسك مۇشەسى, سوربوننا-قازاقستان ينستيتۋتىنىڭ ديرەكتورى, «الماتى ادالدىق الاڭى» جوبالىق كەڭسەسىنىڭ جانە «اكسەلەراتور دوبرا: Izgilik elshisi» ەرىكتىلەر قوزعالىسىنىڭ جەتەكشىسى اينۇر ءسابيتوۆا قاتىستى. سونداي-اق شاراعا ونلاين-رەجىمدە قازاقستان پرەزيدەنتى اكىمشىلىگىنىڭ قاۋىپسىزدىك جانە قۇقىقتىق ءتارتىپ ءبولىمىنىڭ مەڭگەرۋشىسى الەكسەي كالايچيدي, ادىلەت ءمينيسترىنىڭ ورىنباسارى ناتاليا پان جانە ءال-فارابي اتىنداعى قازۇۋ, ل.ن.گۋميلەۆ اتىنداعى ەۇۋ-ءدىڭ «اكسەلەراتور دوبرا: Izgilik elshisi» زاڭ كلينيكاسىنىڭ وكىلدەرى مەن ەرىكتىلەرى, سونداي-اق زاڭ سالاسىنداعى ساراپشىلار ونلاين-رەجىمدە ءۇن قوستى.
دارحان ءبىلالوۆ ۇيىمداستىرۋشىلارعا العىسىن ءبىلدىرىپ, ەل پرەزيدەنتىنىڭ ءبىلىم جانە عىلىم جۇيەسىن جەتىلدىرۋ جونىندەگى تاپسىرمالارىن ىسكە اسىرۋدىڭ ماڭىزدىلىعىن اتاپ ءوتتى. «بۇل باعىتتار مەملەكەتىمىزدىڭ ودان ءارى دامۋى مەن ساپالى ءبىلىم بەرۋ, ادام قۇقىقتارىن قورعاۋ, ۇلتتىق بىرلىكتى نىعايتۋ ءۇشىن ماڭىزدى. ول ءۇشىن ءاربىر قازاقستاندىق جولداۋدا قويىلعان مىندەتتەردى ىسكە اسىرۋعا جاۋاپكەرشىلىكپەن قاراۋى ءتيىس. اباي اتىنداعى قازاق ۇلتتىق پەداگوگيكالىق ۋنيۆەرسيتەتى ۇجىمى ءوز جاۋاپكەرشىلىگىن سەزىنە وتىرىپ, وسى باعىتتا جۇيەلى جۇمىستار جۇرگىزۋدى جوسپارلاپ وتىر», دەدى ۋنيۆەرسيتەت رەكتورى.
ي.روگوۆ ەلىمىزدىڭ كونستيتۋتسياسىندا قازاقستاننىڭ ءوزىن دەموكراتيالىق, قۇقىقتىق, زايىرلى, الەۋمەتتىك مەملەكەت رەتىندە تانىتاتىنى ايقىن كورسەتىلگەنىن, ونىڭ ەڭ جوعارى قۇندىلىقتارى ادام, ونىڭ ءومىرى, قۇقىقتارى مەن بوستاندىقتارى ەكەنىن اتاپ ءوتتى. «تاۋەلسىزدىكتىڭ 30 جىلىندا رەسپۋبليكادا كوپ جۇمىس اتقارىلدى. مەنىڭ ويىمشا, ق.توقاەۆتىڭ جۇرگىزىپ وتىرعان ساياساتى ءبىزدىڭ تۇڭعىش پرەزيدەنتىمىز بەلگىلەگەن دامۋ ۆەكتورىنىڭ جالعاسى بولىپ تابىلادى», دەدى ول.
ب.ءابدىرايىم ازاماتتاردىڭ قۇقىقتارىن قورعاۋ ماسەلەلەرىمەن اينالىساتىن احقو, ەكى قۇقىقتىق ينستيتۋتتىڭ قىزمەتى تۋرالى جانە قازىرگى تاڭدا ادام قۇقىعى قىزمەتىنىڭ قانداي اسپەكتىلەرى ماڭىزدى بولىپ تابىلاتىنى تۋرالى ەگجەي-تەگجەيلى اڭگىمەلەدى. بولاشاق زاڭگەرلەر مەن ستۋدەنتتەرگە بار مۇمكىندىكتەردى پايدالانىپ, تەك ۇلتتىق زاڭنامانى عانا ەمەس, باسقا دا ەلدەردىڭ زاڭنامالارىن زەردەلەۋگە كەڭەس بەردى.
مەملەكەت باسشىسى ءوز جولداۋىندا اتاپ وتكەندەي, بارلىق ايتىلعان باستامالار مەن ستراتەگيالىق مىندەتتەردى ىسكە اسىرۋ ءۇشىن مەملەكەتتىك اپپارات پەن قوعام تاراپىنان ورتاق كۇش-جىگەر قاجەت. بۇل رەتتە بارلىق دەڭگەيلەردە, ونىڭ ىشىندە جاستاردىڭ – ۆولونتەرلەر مەن ستۋدەنتتەردىڭ بەلسەندى قاتىسۋىمەن قوعامدىق ديالوگ داميتىن بولادى.
ءوز كەزەگىندە اينۇر ءسابيتوۆا ازاماتتىق قوعامنىڭ بەلسەندىلىگىن ارتتىرۋعا ىقپال ەتەتىن, ونىڭ باسىم بولىگىن – جاستاردى ۆولونتەرلىككە تارتاتىن «اكسەلەراتور دوبرا: Izgilik elshisi» جوباسىنىڭ قىزمەتى تۋرالى ايتىپ, ۆولونتەرلەردىڭ حالىققا كومەك كورسەتۋدەگى ءرولىن اتاپ ءوتتى.
ءىس-شاراعا قاتىسۋشىلار پىكىرسايىس فورماتىندا مەملەكەت باسشىسىنىڭ جولداۋىن ەگجەي-تەگجەيلى تالقىلاپ, وندا قازاقستاننىڭ ودان ءارى دامۋىنىڭ, ەكونوميكالىق وركەندەۋى مەن ەل حالقىنىڭ ءومىرىن جاقسارتۋدىڭ ەڭ وزەكتى ماسەلەلەرى كوتەرىلگەنىن ءسوز ەتتى.
الماتى
