بۇل دەرەكتەر پرەزيدەنت قاسىم-جومارت توقاەۆتىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىن جۇزەگە اسىرۋ بويىنشا وتكەن وبلىس اۆتيۆىندە كەلتىرىلدى. جيىندا وبلىس اكىمى ومىرزاق شوكەەۆ جولداۋداعى جەتى باستى باسىم باعىت پەن ناقتى اتقارىلاتىن جۇمىستاردى ايقىندادى. «تۇركىستان وبلىسى بارلىق باعىتتاعى دامۋ كورسەتكىشتەرى بويىنشا جوعارى ناتيجەلەرگە قول جەتكىزۋدە. اتاپ ايتقاندا, «قاراپايىم زاتتار ەكونوميكاسى» باعدارلاماسى بويىنشا 41,7 ملرد تەڭگە بولاتىن 307 جوبا ماقۇلدانىپ, رەسپۋبليكادا كوش باستاپ تۇر. «بيزنەستىڭ جول كارتاسى» باعدارلاماسى شەڭبەرىندە كاسىپكەرلەرگە ۇلكەن قولداۋ كورسەتىلۋدە. بيىل بۇل باعىتقا 7,7 ملرد تەڭگە ءبولىنىپ, وتكەن جىلمەن سالىستىرعاندا 3,8 ەسە ارتتى. تۇرعىن ءۇي قۇرىلىسىن دامىتۋعا مەملەكەت تاراپىنان قولداۋ قوماقتى. الداعى 5 جىلدا 4 ملن شارشى مەتردەن استام تۇرعىن ءۇيدى پايدالانۋعا بەرۋ جوسپارلانۋدا», دەدى وبلىس اكىمى. مال ازىقتىق قورىن قامتاماسىز ەتۋ تۇراقتى باقىلاۋدا. وبلىستا قاجەتتى 3,9 ملن توننا مال ازىعىن دايىنداۋعا تولىق مۇمكىندىك بار. ەگىستىكتى ءارتاراپتاندىرۋ بويىنشا مال ازىعى داقىلدارىنىڭ كولەمى 2,6 مىڭ گەكتارعا ۇلعايىپ, 215,4 مىڭ گەكتارعا ورنالاستىرىلدى. ءۇش اۋىسىمدى مەكتەپ سانىن جويۋ جانە بالالارعا ساپالى ءبىلىم بەرۋدى ۇيىمداستىرۋ ماقساتىندا وبلىستا 78 مەكتەپتىڭ قۇرىلىسى جۇرگىزىلۋدە. ول مەكتەپتەر قۇرىلىسىنا 18,9 ملرد تەڭگە قارالعان. بيىل 44 مەكتەپتىڭ قۇرىلىسى اياقتالادى. بەس جىلدا 134 جاڭا مەكتەپ سالۋ جوسپارلانۋدا. بۇدان بولەك, مەملەكەت-جەكەشەلىك ارىپتەستىك تەتىگى ارقىلى ءتورت اۋداندا زامان تالابىنا ساي تەرەڭدەتىلگەن ءبىلىم بەرەتىن 4 مەكتەپ سالىنادى.
«وبلىستا جالپى سىيىمدىلىعى 8,7 ملرد تەكشە مەتر 42 سۋ قويماسى بار. اۋىل شارۋاشىلىعى تاۋار وندىرۋشىلەرىن كەپىلدى اعىن سۋمەن قامتاماسىز ەتۋ ءۇشىن قوسىمشا سىيىمدىلىعى 68 ملن تەكشە مەتر بولاتىن 2 سۋ قويماسىن سالۋ جوسپارلانعان. سولتۇستىك وڭىرلەرگە حالىقتى قونىستاندىرۋ جۇمىستارى وبلىستا 2016 جىلدان بەرى جۇرگىزىلىپ كەلەدى. بۇگىندە 1,5 مىڭعا جۋىق تۇرعىن, ياعني 302 وتباسى قونىس اۋداردى. جالپى, ەلىمىز بويىنشا قونىس اۋدارعانداردىڭ ىشىنەن تۇركىستان وبلىسىنىڭ ۇلەسى – 30%. ەندى الدىمىزدا وبلىستىڭ وسى كورسەتكىشتەرىن ەسەلەپ, جولداۋداعى ايقىندالعان باعىتتاردى ىسكە اسىرۋ مىندەتى تۇر», دەدى ومىرزاق ەستاي ۇلى.
وڭىردە جۇرگىزىلىپ جاتقان قۇرىلىس نىساندارىنىڭ ساپاسى جانە بەلگىلەنگەن مەرزىمدە اياقتالۋى باقىلاۋعا الىنعان. مىسالى, وڭىردە Nur Otan پارتياسىنىڭ سايلاۋالدى باعدارلاماسى اياسىندا سالىنىپ جاتقان, جاڭا وقۋ جىلىندا پايدالانۋعا بەرىلمەگەن 6 مەكتەپتىڭ قۇرىلىسىن كەشىكتىرگەن مەردىگەرلەرگە ەسكەرتۋ جاسالعان. وبلىستىق قۇرىلىس باسقارماسى باسشىسىنىڭ ورىنباسارى ەگەنتاي تاجىباەۆ قىركۇيەكتە بەرىلۋى ءتيىس 17 جاڭا مەكتەپتىڭ 6-اۋى مەرزىمىندە تاپسىرىلماعانىن ايتادى. جاۋاپتىلار قىركۇيەك ايىنىڭ سوڭىنا دەيىن مەكتەپتەردىڭ پايدالانۋعا بەرىلەتىنى تۋرالى ۋادە بەرىپ وتىر. ال وبلىس ورتالىعىندا سالىنىپ جاتقان تۇرعىن ۇيلەردىڭ قۇرىلىسى قارقىندى. تۇركىستان قالاسىنىڭ شىعىس باعىتىندا ورنالاسقان جاڭا اكىمشىلىك-ىسكەرلىك ورتالىعىندا جەكە كاسىپكەرلەر ەسەبىنەن بىرنەشە تۇرعىن ءۇي كەشەنى مەن كوتتەدجدى قالاشىقتار, زاماناۋي قوناقۇيلەردىڭ قۇرىلىسى جۇرگىزىلۋدە. سونداي-اق جاڭا عيماراتتار مەن كەڭسەلەر بوي كوتەرىپ, ساۋدا, ويىن-ساۋىق ورتالىعى سالىنادى. اكىمشىلىك-ىسكەرلىك ورتالىقتا 12 گەكتار جەردە بوي كوتەرگەن 12 قاباتتى «نۇر-سۇلتان سيتي» تۇرعىن ءۇي كەشەنىندەگى تۇرىك كومپانياسى سالعان ءزاۋلىم ۇيلەردەگى پاتەرلەردىڭ جالپى اۋماعى 160 مىڭ شارشى مەتردەن اسادى. مۇندا 2 مىڭنان اسا وتباسى قونىس تويىن تويلايدى. جاڭا ۇيلەردىڭ الدىندا اباتتاندىرۋ جۇمىستارى قاتار جۇرۋدە. قازىر قۇرىلىسى اياقتالعان بەس ۇيدەگى باسپانالاردىڭ 90 پايىزى ساتىلعان. جوعارىدا ايتىپ وتكەنىمىزدەي, جىل اياعىنا دەيىن جاقسى جانە قاناعاتتانارلىق جاعدايداعى وبلىستىق جانە اۋداندىق ماڭىزى بار اۆتوموبيل جولدارىنىڭ ۇلەسىن 79%-دان 87%-عا ارتتىرۋ كوزدەلۋدە. اتالعان ينديكاتورلىق كورسەتكىشتى ءۇش جىلدا 99,5%-عا ارتتىرۋ جوسپارلانۋدا. بيىلعى اۆتوموبيل جولدارى سالاسىن دامىتۋعا بولىنگەن قارجىعا تۇركىستان وبلىسىندا 600-دەن استام نىسان, ياعني 2 مىڭ شاقىرىمعا جۋىق جول مەن كوشە قامتىلعان. ونىڭ جارتىسىنا جۋىعى جەرگىلىكتى ماڭىزى بار جولدارعا, ياعني وبلىستىق, اۋداندىق جانە ەلدى مەكەن كوشەلەرىن جاڭارتۋعا باعىتتالعان. ماقتاارال, جەتىساي, كەلەس اۋداندارىندا ۇزىندىعى 50 شاقىرىم جولدار كۇردەلى جانە ورتاشا جوندەۋدەن وتكىزىلۋدە. ودان بولەك, وسى اۋدانداردا وبلىس اكىمىنىڭ تاپسىرماسىمەن جالپى ۇزىندىعى 180 شاقىرىمنان اساتىن 11 وبلىستىق ماڭىزى بار اۆتوموبيل جولدارى جوندەلۋدە. جاقىن كۇندەرى بۇل جولدار تولىقتاي پايدالانۋعا بەرىلەدى.
پرەزيدەنت قاسىم-جومارت توقاەۆ قازاقستان حالقىنا جولداۋىندا ءبىلىم ساپاسىن ارتتىرۋ, اۋىل شارۋاشىلىعىن دامىتىپ, جوعارى دەڭگەيدەگى قايتا وڭدەۋ ءىسىنىڭ جاڭا وندىرىستىك باعىتتارىن قۇرۋعا ەرەكشە نازار اۋدارۋ قاجەتتىگىن اتاپ كورسەتتى. وسى ورايدا وبلىس اكىمى حالىقارالىق Dogus Group ينۆەستيتسيالىق توبىنىڭ باسشىلارىمەن كەزدەسىپ, ينفراقۇرىلىم مەن حيميا ونەركاسىبى سالالارىن دامىتۋعا قاتىستى جوبالاردى تالقىلادى. «تۇركىستان وبلىسى – جاڭا جوبالاردى جۇزەگە اسىرۋ ءۇشىن وتە ىڭعايلى ينۆەستيتسيالىق الاڭ. جەمشوپ, ءسۇت, ەت وندىرىسىندە ينۆەستورلارىمىز بار. ءبىز وسى باعىتتاردىڭ ءبىرىن ۇسىنا الامىز. سونداي-اق جىلىجاي سالۋعا بولادى. ال ينفراقۇرىلىم جوبالارىنا كەلەتىن بولساق, تەمىر جولدار مەن كوپىرلەر سالۋعا كوزقاراسىمىز وڭ. ءبىز بۇل جوبالاردى قۋانا قولدايمىز», دەدى ءو.شوكەەۆ. ءوز كەزەگىندە تۇرىك ينۆەستورى تۇركىستان ءوڭىرى مەن وبلىس ورتالىعىنىڭ ەكونوميكالىق دامۋ باعىتىن جوعارى باعالاپ, بىرقاتار جوباعا قىزىعۋشىلىق تانىتتى. تۇركىستان قالاسىندا قۇرىلعان «ازىق-ت ۇلىك» بەلدەۋىن دامىتۋ ءۇشىن اتسالىسۋعا نيەت ءبىلدىردى.
تۇركىستان وبلىسى
