مينيستر مالىمدەۋىنشە, بيىلعى قاڭتار-شىلدەدە سىرتقى ساۋدا تاۋار اينالىمى 53,7 ملرد اقش دوللارىن, ونىڭ ىشىندە ەكسپورت بويىنشا كورسەتكىش 32 ملرد اقش دوللارىن قۇرادى. وڭدەلگەن تاۋارلار ەكسپورتى 23,4% ءوسىپ, 10,4 ملرد اقش دوللارىنا دەيىن جەتتى.
«وڭدەۋ ونەركاسىبى تۇراقتى ءوسۋ ءۇردىسىن ساقتاپ وتىر. ءوندىرىس كولەمى 5,8%-عا ءوستى. 14 ءوڭىر بويىنشا وڭ ءوسىم كورسەتكىشى تىركەلدى. ەڭ جوعارعى ءوسىم الماتى قالاسىندا, سونداي-اق الماتى جانە قىزىلوردا وبلىستارىندا بايقالىپ وتىر», دەدى اسەت ەرعاليەۆ.
ال وڭدەۋ ونەركاسىبى بويىنشا ۆاگوندار مەن لوكوموتيۆتەر ونىدىرىسىندە ەڭ جوعارى كورسكەتكىش تىركەلگەن – 48,9%. فارماتسەۆتيكالىق ءونىم وندىرۋدە – 40,8%, ماشينا جاساۋ – 23,9%, ونىڭ ىشىندە اۆتوموبيل جاساۋ – 34,2%, قۇرىلىس ماتەريالدارى – 11,6%, پلاستماسسا بۇيىمدارى – 26,5%, دايىن مەتالل بۇيىمدارى – 18,6%, كيىم – 16,3% جانە جيھاز – 16% دەڭگەيىندە سەرپىندى ءوسۋدى كورسەتىپ وتىر.
«بيىلعى جىلدىڭ سەگىز ايىندا ورىندالعان قۇرىلىس جۇمىستارىنىڭ كولەمى 11,4%-عا ءوسىپ, قۇرىلىس سەكتورى جوعارى قارقىن كورسەتۋدە. كورسەتكىشتىڭ وڭ ءوسىمى بارلىق وڭىرلەر بويىنشا تىركەلگەن. قۇرىلىس-مونتاجداۋ جۇمىستارىنىڭ ەڭ جوعارى ءوسىمى اقمولا جانە تۇركىستان وبلىستارىندا, سونداي-اق الماتى قالاسىندا بايقالادى», دەدى ۇلتتىق ەكونوميكا ءمينيسترى.
