تەاتر • 13 قىركۇيەك، 2021

مەرەيلى ماۋسىمنىڭ شىمىلدىعىن ءتۇردى

84 رەت كورسەتىلدى

كۇز كەلسە، كۇزبەن بىرگە تەاترلاردىڭ دا ماۋەسىن جايعان اعاشتاي بويىنداعى بار جاقسىسىن كورەرمەنىنە ۇسىنۋعا اسىعاتىن داعدىسى بيىل دا سول قالىبىنان اينىمادى. ەلوردالىق تەاترلار بىرىنەن كەيىن ءبىرى جاڭا ماۋسىمىنىڭ شىمىلدىعىن ءتۇرىپ، استانا حالقىن تاماشا قويىلىمدارىمەن ءتانتى ەتىپ ۇلگەردى. ايتسە دە بيىلعى ماۋسىمنىڭ، اسىرەسە، نۇر-سۇلتان قالاسى اكىمدىگىنىڭ جاستار تەاترى ءۇشىن ورنى بولەك. ونەر ۇجىمى حV مەرەيلى تەاتر ماۋسىمىنىڭ شىمىلدىعىن ءتۇردى.

15 جىل! تاريح ءۇشىن كوپ ۋاقىت ەمەس! بىراق تەاتر ۇجىمى ءۇشىن بۇل 15 جىل قيىندىق پەن قۋانىشقا، جانكەشتىلىك پەن ىزدەنىسكە، ەڭبەك پەن ۇمتىلىسقا، جەڭىس پەن جەمىسكە تولى ۇلكەن شىعارماشىلىق مەكتەپ، تەڭدەسسىز تاجىريبە الاڭى.

ەكى كۇن قاتارىنان باس قالاعا ونەر مەيرامىن سىيلاعان مەرەيلى ماۋسىمنىڭ اشىلۋى­نا ەلىمىزگە بەلگىلى تۇلعالار، ونەر قايراتكەر­لەرى قۇتتىقتاي كەلىپ، وزدەرىنىڭ جىلى لەبىزدە­رىن، اقجارما تىلەكتەرىن ءبىلدىرىستى. تەاترعا قاراي ساعىنىسا اعىلعان تالعامپاز كورەر­مەن رەجيسسەر، تەاتردىڭ كوركەمدىك جەتەك­شى­سى، قازاقستاننىڭ ەڭبەك سىڭىرگەن قايراتكەرى نۇرقانات جاقىپبايدىڭ سۋرەتكەرلىك ساراپ­تاۋىندا ساحنا كورگەن تالاپتان احمەتجان­نىڭ «تاپتىم. عاشىق بولدىم. جوعالتتىم» ميۋزيكلىن تاماشالادى. ايتۋلى قويىلىم جازۋشىنىڭ «سۇلۋ مەن سۋرەتشى» اڭگىمەسىنىڭ جەلىسى نەگىزىندە كورەرمەنىمەن قاۋىشىپ وتىر. جىل باسىندا تۇساۋى كەسىلگەن سىرشىل ­ميۋزيكل جاڭا ماۋسىمنىڭ دا كورەرمەنىنە ­تاماشا تارتۋ بولدى. قويىلىمدا باستى ءرول­دى، ياعني سۇلۋ مەن سۋرەتشى بەينەسىن تەاتر­دىڭ تالانتتى اكتەرلەرى – نازەركە سەرىكبولوۆا مەن مەيىرعات امانگەلدين كەمەلىنە كەل­تىرە كەيىپتەدى.

ماڭگىلىك ماحاببات تاقىرىبىن ارقاۋ ەت­كەن ليريكالىق سپەكتاكلدەگى ەستى اۋەن، ۇتىم­دى تابىلعان رەجيسسەرلىك شەشىم، اكتەرلىك شە­بەر ويىن كوپ كوڭىلىنەن بەرىك ورىن الدى. ءشام­شى قالداياقوۆ، ەركەعالي راحماديەۆ، كەڭەس دۇيسەكەەۆ، سەيدوللا بايتەرەكوۆ، تولەگەن مۇحامەدجانوۆ، ەلەنا ابدىحالىقوۆا باستا­عان ءبىرتۋار كومپوزيتورلاردىڭ جۇرەك قى­لىن شەرتەر اۋەزدى مۋزىكالىق تۋىندىلارى­نىڭ شەبەر ۇيلەسىمىنە قۇرىلعان ايتۋلى سپەكتاكل كورەرمەنىن دە بەيجاي قالدىرما­دى. ال قويىلىم الدىندا وتكەن بۇقارالىق اقپارات قۇرالدارى وكىلدەرىنە ارنالعان ءباسپاسوز كونفەرەنتسياسىندا تەاتر ديرەكتورى، بەلگىلى تەاتر جانە كينو اكتەرى، مەملەكەت­تىك سىيلىقتىڭ لاۋرەاتى ءادىل احمەتوۆ ۇجىم­نىڭ الداعى شىعارماشىلىق جوسپارلارىمەن ءبولىستى.

15 جىل بويى ۇزدىكسىز كورۋشىسىن ءتانتى ەتىپ، تاڭعالدىرۋدان جالىقپاي كەلە جاتقان جاستار تەاترىنىڭ ءار قادامى مەن ونەردەگى جەمىستى جولى ەلوردالىق كورەرمەننىڭ كوز الدىندا. ولاي دەيتىنىمىز، 2007 جىلدىڭ 5 شىلدەسىندە تۇڭعىش رەت ش.ايتماتوۆ پەن ءا.كەكىلباەۆتىڭ شىعارمالارىنىڭ جەلىسى بويىنشا جاسالعان «شىڭعىسحان» سپەكتاكلىمەن شىمىلدىق تۇرگەن تەاتردىڭ ءتاي-ءتاي باسىپ، بۇگىنگە دە­يىن جەتكەن شىعارماشىلىق جەتىستىگى مەن ونەرىنىڭ ومىرشەڭ ءورىسى استانامەن بىرگە دامىپ، داڭعىلدانىپ كەلەدى.

ءيا، ارقا تورىندە بوي كوتەرگەن ارۋ استانا ۋاقىت-اعزام اجارىنا بەلگى سالعان ساناۋلى جىلدىڭ ىشىندە-اق ساياسي-ەكونوميكالىق باعىتتىڭ بارومەترى عانا ەمەس، ونەرىمىز بەن مادەنيەتىمىزگە ۇيىتقى بولار ۇلتىمىزدىڭ شىن مانىندەگى رۋحاني ءومىرىنىڭ ايناسىنا اينالىپ ۇلگەردى. جەر جاھاننىڭ نازارىن وزىنە بۇرعىزىپ، جىل سايىن ەمەس، اي سا­يىن، ءتىپتى كۇن سايىن قاناتىن كەڭگە جايىپ، قۇلپىرىپ، جايناپ، ەل ەگەمەندىگىمەن بىرگە ەڭسەسىن تىكتەپ، ەركە ەسىلمەن ەگىز جاساسقان باس قالامىزدىڭ باياندى تاريحى تالاي يگى باستامالار مەن ۇلاعاتتى وقيعالاردىڭ سەبەپشىسى ءھام دانەكەرشىسى بولىپ كەلەدى. استانا تامىرىنا تىنىس سىيلاپ، باعىتىنا باعدار بەرگەن سونداي ىرگەلى ونەر وشاعىنىڭ ءبىرى – ءدال وسى جاستار تەاترى دەسەك، تيتتەي دە ارتىق ايتقاندىق ەمەس.

ەڭ العاش «شىڭعىسحان» سپەكتاكلىمەن شىمىلدىق ءتۇرىپ، وسى ۋاقىتقا دەيىن ونەر شىڭىن باعىندىرۋعا ۇمتىلىپ ءھام سول دودا­دان ۇنەمى جەڭىسپەن ورالىپ جۇرگەن تەاتر­ ۇجىمىنىڭ جاس تەاتردىڭ تۇساۋىن كەسەر قو­يىلىم رەتىندە ءدال وسى ءافسانانى تاڭ­داۋى كەزدەيسوقتىق بولماسا كەرەك. جاستار تەاترىنىڭ شاڭىراق كوتەرگەنىن سۇيىنشىلە­گەن «شىڭعىسحاندى» زور سۇيىسپەنشىلىك­پەن قارسى العان ونەرسۇيەر قاۋىم ءۇشىن دە، ءۇمى­تىن ۇكىلەپ دوداعا قوسقان تەاتر ۇجىمى ءۇشىن دە اتالعان قويىلىم اقجولتاي سپەكتاكل بولدى. جارتى الەمدى جاۋلاعان جەڭىمپاز جايلى شىعارمامەن تۋ تىككەن تەاتر كۇنى بۇگىنگە دەيىن سول بايراقتى تومەن تۇسىرمەي، ونەر الامانىندا لايىم جەڭىمپاز بولىپ كەلەدى. تەاتر رەپەرتۋارىن ءتۇرلى باعىتتاعى سپەكتالدەرمەن تۇرلەندىرىپ، تالاي دودادا توپ جارعان ونەرلى ۇجىمنىڭ الدا ءالى دە الار اسۋىنىڭ مول بولارىنا سەنىم زور.

سوڭعى جاڭالىقتار

15169 ادام كوروناۆيرۋس جۇقتىردى

كوروناۆيرۋس • كەشە

ۇقساس جاڭالىقتار