قازاقستان مەن وزبەكستاننىڭ عالىمدارى مەن ماماندارىن تارتا وتىرىپ, سەيسميكاعا ءتوزىمدى قۇرىلىس سالاسىنداعى عىلىمي-زەرتتەۋ جۇمىستارىن نەگىزدەۋ جانە ورىنداۋ ءۇشىن بىرلەسكەن ۋاقىتشا عىلىمي ۇجىمدار قۇرۋ جوسپارلانۋدا.
قازاقستاندىق مامانداردىڭ وزبەكستاندا تابيعي ۆيبروديناميكالىق سىناقتار جۇرگىزۋى تۋرالى ۋاعدالاستىققا قول جەتكىزىلدى.
سونداي-اق, بىرلەسكەن ءبىلىم بەرۋ باعدارلامالارىن ازىرلەۋ جانە ىسكە اسىرۋ, جەر سىلكىنىسىنە ءتوزىمدى عيماراتتار مەن قۇرىلىستاردى سالۋ سالاسىندا عىلىمي جانە عىلىمي-ادىستەمەلىك كونفەرەنتسيالار, سەمينارلار, سيمپوزيۋمدار, «دوڭگەلەك ۇستەلدەر», كەزدەسۋلەر مەن كورمەلەر وتكىزۋ, تاجىريبە جانە اقپارات الماسۋدى ۇيىمداستىرۋ كوزدەلگەن.
وزبەكستان قازاقستاننىڭ باعا بەلگىلەۋ, اقپاراتتىق مودەلدەۋ جانە قۇرىلىس سالاسىنداعى حالىقارالىق نورمالاردى ەنگىزۋ سالاسىنداعى تاجىريبەسىنە سۇيەنەدى. ىنتىماقتاستىق شەڭبەرىندە وزبەكستاندا سەيسميكالىق وقشاۋلاۋ تەحنولوگيالارىن جانە عيماراتتار مەن قۇرىلىستاردى سەيسميكالىق قورعاۋدىڭ باسقا دا ادىستەرىن ەنگىزۋ جانە ودان ءارى دامىتۋ بولجانىپ وتىر.
«قازقسعزي ينستيتۋتىنىڭ سەيسميكاعا ءتوزىمدى قۇرىلىس, باعا بەلگىلەۋ جانە اقپاراتتىق مودەلدەۋ سالاسىندا ۇلكەن تاجىريبەسى بار. 2019 جىلى ينستيتۋتقا تمد ەلدەرىنىڭ سەيسميكاعا ءتوزىمدى قۇرىلىسى سالاسىنداعى بازالىق ۇيىم مارتەبەسى بەرىلدى. قازقسعزي بازاسىندا تمد ەلدەرىنىڭ قۇرىلىسىندا اقپاراتتىق مودەلدەۋ تەحنولوگياسى سالاسىنداعى نورماتيۆتىك-تەحنيكالىق بازانى دامىتۋ جونىندەگى كوميسسيا جۇمىس ىستەيدى. ءبىز قازقسعزي-دىڭ قۇرىلىستاعى كاسىبي تاجىريبەسى وزبەكستانداعى ارىپتەستەرىمىز تاراپىنان تابىستى قولدانىلىپ, جەتىلدىرىلەتىنىنە سەنىمدىمىز», دەيدى «قازقسعزي» اق باس ديرەكتورى بەگمان كولباەۆ.
