ءدال وسىنداي ناتيجەنى ەشكىم كۇتپەگەن ەدى. سەبەبى, ەسىمى كوپشىلىككە بەيمالىم ەمما رادۋكانۋ بۇعان دەيىن «ۇلكەن دۋلىعا» تۋرنيرلەرى تۇرماق, WTA دودالارىندا دارالانىپ كورمەگەن. ول 2002 جىلدىڭ 13-قاراشاسىندا كانادادا دۇنيەگە كەلدى. اكەسى – رۋمىن, اناسى – قىتايلىق. وسى ءدۇبىرلى دودادا ونەر كورسەتۋ ءۇشىن ەمما اۋەلى ىرىكتەۋ تۋرنيرىنە قاتىستى. سول جەردە جولى بولعاننان كەيىن نەگىزگى جارىسقا جولداما الدى. بۇل رەتتە رادۋكانۋ تورتكۇل دۇنيە جانكۇيەرلەرىن تامساندىرىپ, بارلىق قارسىلاسىن سىپىرا ۇتتى.
باستاپقى باسەكەلەردە شۆەيتساريالىق ستەفاني فەگەل, قىتايلىق چجان شۋاي, يسپانيالىق سارا سورريبەس-تورمو جانە امەريكالىق شەلبي رودجەرستى ۇتقان ۇلىبريتانيالىق ويىنشى شيرەك فينالدا شۆەيتساريانىڭ تاعى ءبىر وكىلى بەليندا بەنچيچتەن باسىم ءتۇستى. جارتىلاي فينالدا گرەكيالىق ماريا ساكاريدى جەڭگەن ول اقتىق سىندا كانادالىق لەيلا فەرناندەسپەن كەزدەستى.
باس جۇلدە ءۇشىن تارتىس 1 ساعات 51 مينۋتكە سوزىلىپ, بۇل باسەكەدە ەمما رادۋكانۋ جەڭىسكە جەتتى. ەسەپ – 6:4, 6:3. ءبىر كەرەمەتى, وسى تۋرنير بارىسىندا ۇلىبريتانيا تەننيسشىسى قارسىلاستارىنا بىردە-ءبىر سەتتە ەسە جىبەرگەن جوق.
عالىم سۇلەيمەن,
«Egemen Qazaqstan»
