اتىراۋ وبلىسى پوليتسيا دەپارتامەنتى كريمينالدى پوليتسيا باسقارماسىنىڭ قىزمەتكەرلەرى وڭىردە ءىرى كولەمدە قاراجات جىمقىرعان ۇيىمداسقان قىلمىستىق توپتى ۇستادى.
پوليتسيا قىزمەتكەرلەرىنە جشس-ءنىڭ قاۋىپسىزدىك قىزمەتكەرى حابارلاما بەرگەن. ءتارتىپ ساقشىلارى دەرەۋ جەدەل ءىس-شارا ۇيىمداستىرىپ, ناتيجەسىندە اتالعان جشس-تە بۇرىن قىزمەت اتقارعان قىزمەتكەرلەر ەكەنىندىگىن انىقتادى. ولاردىڭ ءبىرى قازىرگى كۇنگە دەيىن سول جەردە جۇمىس جاساپ, مالىمەتتەرمەن ءبولىسىپ وتىرعان.
ءتىنتۋ كەزىندە 31 جاستاعى ەر ادامنىڭ ۇيىنەن التى دانا تولەم تەرمينالدارى, كومپيۋتەرلىك كومپونەنتتەر جانە قوسىمشا پەريفەريالىق قۇرىلعىلار تابىلىپ, تاركىلەندى. توپ مۇشەلەرىنىڭ ءبىرى تولەم جۇيەسىنە كىرۋ پارولدەرىمەن قامتاماسىز ەتسە, ەندى ءبىرى ۇرلانعان اقشالاردى ءوزارا ءبولىپ وتىرعان.
«2021 جىلدىڭ 21 ناۋرىزىنان باستاپ شىلدەنىڭ 4-نە دەيىنگى ۋاقىت كەزەڭىندە بەلگىسىز تۇلعالار تولەم جۇيەسىنە زاڭسىز قول جەتكىزۋ جولىمەن جالپى سوماسى 11 170 000 تەڭگە اقشا قاراجاتىن ۇرلادى», دەيدى اتىراۋ وبلىسى پوليتسيا دەپارتامەنتىنىڭ باستىعى قامزا ۇمبەتقاليەۆ.
دەرەكتەرگە سۇيەنسەك, التى ادامنان تۇراتىن قىلمىستىق توپ ءۇش اي بويى ايلاسىن ىسكە اسىرىپ كەلگەن.
قازىرگى ۋاقىتتا 26-31 جاس ارالىعىنداعى التى كۇدىكتىگە قاتىستى قر قك-ءنىڭ 188-بابى 4-بولىگى 3-تارماعىمەن سوتقا دەيىنگى تەرگەۋ امالدارى جۇرگىزىلۋدە. كۇدىكتىلەر كىناسىن تولىقتاي مويىنداپ, ۋاقىتشا ۇستاۋ يزولياتورىنا قاماۋعا الىندى.
