– پاراليمپياداعا كوك بايراقتى جەلبىرەتىپ, ءانۇرانىمىزدى شىرقاتۋ ءۇشىن بارعان ەدىم. جەڭىسكە جەتۋ ءۇشىن باپكەرىمنىڭ كەڭەسىن, ءوزىمنىڭ تاجىريبەمدى تولىق پايدالانۋعا تىرىستىم. بىراق ءسال ساتتىلىك جەتىسپەدى. ەندى پاريجدە وتەتىن پاراليمپياداعا دايىندىقتى باستايمىن. سول كەزدە نامىستى قولدان بەرمەي, كۇمىستى التىن مەدالعا اينالدىرۋدى كوزدەپ وتىرمىن, – دەيدى پاراليمپيادا ويىندارىنىڭ كۇمىس جۇلدەگەرى ءانۋار ساريەۆ.
پارادزيۋدودان ەل قۇراماسىنىڭ باس باپكەرى جاندوس قيانوۆتىڭ ايتۋىنشا, جاھان جۇرتى كوز تىككەن دوداعا بارعان سپورتشىلاردىڭ ءبارىنىڭ جۇلدەگەر اتانار مۇمكىندىگى بولعان. اسىرەسە ءانۋار ساريەۆ – الەمدىك رەيتينگتە العاشقى ۇشتىككە ەنگەن تاتامي شەبەرى. سول سەبەپتەن, ول ەكىنشى اينالىمعا قارسىلاسسىز شىققان. ال ەكىنشى كەزەڭدە موڭعول سپورتشىسىن جارتىلاي جەڭىسپەن ۇتتى. ونىمەن تارتىستى بەلدەسۋدە ساۋساعىن اۋىرتىپ, مۇرنى سىنعان. سوعان قاراماستان, كەلەسى اينالىمدا ۆەنەسۋەلالىق ماركوس بلانكونى ەكى ادىسپەن جەڭگەن ەدى. الايدا اقتىق كەزدەسۋدە ازەربايجاندىق ۆۋگار شيرينليدەن ۇتىلدى.
وبلىس اكىمى ماحامبەت دوسمۇحامبەتوۆ پاراليمپيادانىڭ كۇمىس جۇلدەگەرلەرى ءانۋار ساريەۆ, تەمىرجان داۋلەت پەن زارينا بايباتيناعا Toyota كولىگى مەن 2 بولمەلى پاتەر, 1 ميلليون تەڭگە بەردى. پاراليمپيادا جۇلدەگەرلەرىنىڭ شەبەرلىگىن شىڭداعان باپكەرى جاندوس قيانوۆقا 4 ميلليون تەڭگەنىڭ سەرتيفيكاتى تاپسىرىلدى.
– بۇل – ەلىمىزدىڭ پاراسپورتى ءۇشىن تاريحي جەتىستىك, قاجىرلى ەڭبەك پەن بيىك نامىستىڭ, ءورشىل رۋحتىڭ جەمىسى. ەڭ باستىسى, اتىراۋ سپورتشىلارىنىڭ ەل تاۋەلسىزدىگىنىڭ 30 جىلدىعىنا ايرىقشا تارتۋى. پارادزيۋدوشىلار قارا ورمانداي جانكۇيەرى مەن مىڭداعان جاسقا قايسار مىنەزدىڭ ءمانىن ۇعىندىردى, – دەدى ماحامبەت دوسمۇحامبەتوۆ.
سونداي-اق پاراليمپيادا ويىندارىنىڭ قاتىسۋشىلارى امانجول جانبوتا, عالىمجان سماعۇل ۇلى, ەرلان وتەپوۆ, نۇرلان دومباەۆ, ەرجان سالىمگەرەەۆ پەن ولاردىڭ جاتتىقتىرۋشىلارىنا قۇرمەت كورسەتىلدى.
اتىراۋ وبلىسى
