«بۇلار – مادەنيەت قىزمەتكەرلەرى, مۇراعاتشىلار, كىتاپحاناشىلار, تەحنيكالىق قىزمەتكەرلەر, قورىقشىلار, كولىك جۇرگىزۋشىلەر جانە باسقالار. سوندىقتان 2022 جىلدان 2025 جىلعا دەيىن مەملەكەت وسى ساناتتاعى ازاماتتىق قىزمەتكەرلەردىڭ جالاقىسىن جىل سايىن ورتا ەسەپپەن 20 پايىزعا وسىرەتىن بولادى. تۇتاستاي العاندا, تاعى 600 مىڭ وتانداسىمىز بۇل باستامانىڭ يگىلىگىن كورەدى», دەدى مەملەكەت باسشىسى.
شىندىعىندا, پرەزيدەنت ۇسىنعان باستامالار باياندى بولۋى ءۇشىن مادەنيەت سالاسىنا دەگەن كوزقاراستى تۇبەگەيلى وزگەرتەتىن كەز جەتتى. ويتكەنى ەلدىڭ وركەندەۋىنىڭ ءبىر كورىنىسى رۋحانياتىنىڭ, ونىڭ ىشىندە مادەنيەت سالاسىنىڭ دامۋىنان بايقالادى. راس, ەلىمىزدە مادەنيەت ۇيلەرى بوي كوتەرىپ جاتىر. ونەر ۇجىمدارىنىڭ كونتسەرتتەرى, ساحنالىق قويىلىمدارى ءوتىپ جاتىر. ماماندار دا دايارلانادى. دەگەنمەن ماتەريالدىق-تەحنيكالىق بازاسىن جاڭارتۋ, كادرمەن قامتۋدا ەسكەرەتىن بىرنەشە جايت بار.
بىرىنشىدەن, قازىر اۋىل-سەلولارداعى مادەنيەت وشاعى جەرگىلىكتى اكىمدىك ارقىلى قارجىلاندىرىلادى. الايدا جەرگىلىكتى بيۋدجەتتىڭ شاماسى بۇل سالانى جان-جاقتى دامىتۋعا جەتە بەرمەيدى.
ەكىنشىدەن, وسى سالاعا مامان دايارلايتىن كوللەدجدەر مەن جوعارى وقۋ ورنى سالالىق مينيسترلىككە باعىنىشتى ەمەس. ال بۇل ارناۋلى ورتا, نە جوعارى ءبىلىم العان مامانداردىڭ جۇمىسقا ورنالاسۋىنا ەشكىم مۇددەلىك تانىتپاۋىنا اكەلىپ سوعادى. قازىر وسى سالادا ءبىلىم العان ماماندار جۇمىس تابا الماي ءجۇر. نەگە؟ ويتكەنى سالادا مادەنيەتكە قاتىسى جوق ماماندار جۇمىس ىستەيدى.
ۇشىنشىدەن, مادەنيەت سالاسىندا, اسىرەسە, ارحيۆ پەن مۋزەيدە, كىتاپحانا مەن تاريحي قورىقتاردا جۇمىس ىستەيتىندەردىڭ ەڭبەگى لايىقتى ەسكەرىلىپ ءجۇر دەي المايمىز. سول سەبەپتەن, وسى سالانىڭ ماماندارى مەملەكەتتىك ماراپاتتارعا ۇسىنىلىپ, قازاقستاننىڭ ەڭبەك سىڭىرگەن قايراتكەرى, قازاقستاننىڭ ەڭبەك ەرى اتانىپ جاتسا, ارينە, قۇبا-قۇپ بولار ەدى.
پرەزيدەنت جولداۋىنان كەيىن ەلىمىزدىڭ مادەنيەت سالاسىن دامىتۋدىڭ كەشەندى جوسپارى, كونتسەپتسياسى تۇزىلگەنى ءجون. وندا جوعارىدا ايتىلعان جايتتار ەسكەرىلىپ, سالالىق مينيسترلىككە بەرىلگەنى دۇرىس. ويتكەنى ەلىمىزدى جاھاندانۋ اپانىنان قۇتقاراتىن, قازاقتى ۇلت رەتىندە ساقتايتىن دىڭگەكتىڭ ءبىرى – ۇلتتىق مادەنيەت. سوندىقتان جاھاندىق وركەندەۋدىڭ وزىق تەحنولوگياسىن ەكونوميكانىڭ بارلىق سالاسىنا ەنگىزۋمەن بىرگە, وركەنيەت كوشىندەگى جەتەكشى ەلدەر ساپىنان ورىن الۋ ءۇشىن تاۋەلسىز قازاقستاننىڭ مادەنيەتى دە بۇگىنگى ءداۋىر تالابىمەن دامىعانىن قالايمىز.
قويشىعۇل جىلقىشيەۆ,
قازاقستاننىڭ ەڭبەك سىڭىرگەن قايراتكەرى
اتىراۋ وبلىسى
