وتىرىستا ءبىلىم جانە عىلىم ءمينيسترى اسحات ايماعامبەتوۆتىڭ شەتەلدە كادرلار دايارلاۋ جونىندەگى رەسپۋبليكالىق كوميسسياسى حاتتامالىق تاپسىرمالارىنىڭ ورىندالۋى تۋرالى ەسەبى تىڭدالدى. سونداي-اق «بولاشاق» حالىقارالىق ستيپەندياسىن ىسكە اسىرۋعا قاتىستى بىرقاتار ماسەلەلەر قارالدى.
كوميسسيا شەشىمىمەن «بولاشاق» حالىقارالىق ستيپەندياسى ماگيستراتۋرا, دوكتورانتۋرا, رەزيندەنتۋرا بويىنشا وقيتىن, سونداي-اق الەمنىڭ جەتەكشى عىلىمي جانە وندىرىستىك ورتالىقتارىنا تاعىلىمدامادان وتۋگە جىبەرىلەتىن 196 ۇمىتكەرگە تاعايىندالدى.
ايتا كەتۋ كەرەك, ستيپەندياتتار الەمنىڭ 16 ەلىنىڭ جەتەكشى ءبىلىم وشاقتارىندا, سونىڭ ىشىندە اقش (گارۆارد ۋنيۆەرسيتەتى, كولۋمبيا ۋنيۆەرسيتەتى, ماسساچۋسەتس تەحنولوگيالىق ينستيتۋتى), كانادا (تورونتو ۋنيۆەرسيتەتى), ۇلىبريتانيا (لوندون ەكونوميكا جانە ساياساتتانۋ مەكتەبى, لوندون يمپەريالىق كوللەدجى, لوندوننىڭ كورولدىك كوللەدجى), جاپونيادا (توكيو ۋنيۆەرسيتەتى) ت.ب. ءبىلىم الاتىن بولادى.
سونداي-اق ستيپەندياتتار قازىرگى ۋاقىتقا اسا قاجەتتى قاشىقتان وقىتۋ مەتوديكاسى, جوعارى ءبىلىم بەرۋدەگى ستراتەگيالىق مەنەدجمەنت جانە كوشباسشىلىق, ۋنيۆەرسيتەتتى باسقارۋ, ينكليۋزيۆتى ءبىلىم بەرۋ; مەديتسينالىق گەنەتيكا, ۆيرۋسولوگيا, ينفەكتسيالىق اۋرۋلار, ەپيدەميولوگيا, بيوتەحنولوگيا, بيومەديتسينا; يننوۆاتسيالىق مەنەدجمەنت, تسيفرلىق ەكونوميكا, جاساندى ينتەللەكت, مۇناي-گاز ينجينيرينگ, اۆياتسيا جانە اەروعارىش تەحنيكاسى, اتوم ءوندىرىسى, IT, كولىك تەحنولوگياسى, ماشيناقۇراستىرۋ, ت.ب. ماماندىقتار بويىنشا ءبىلىم الادى.
2021 جىلى «بولاشاق» باعدارلاماسى بويىنشا وقۋعا 1055 ستيپەنديا ءبولىندى. ونىڭ ىشىندە 555 ستيپەنديا ماگيستراتۋرا, رەزيدەنتۋرا, دوكتورانتۋرا جانە تاعىلىمداما باعدارلامالارى بويىنشا بولىنگەن. قوسىمشا 500 ستيپەنديا تاعىلىمدامانىڭ «عالىمدار» جاڭا ساناتى بويىنشا بەرىلدى. بۇل سانات پرەزيدەنت قاسىم-جومارت توقاەۆتىڭ تاپسىرماسىنا سايكەس, الەمنىڭ جەتەكشى عىلىمي ورتالىقتارىندا جىل سايىن 500 عالىمنىڭ تاعىلىمدامادان ءوتۋىن قامتاماسىز ەتۋ ماقساتىندا بەكىتىلگەن.
«بولاشاق» حالىقارالىق ستيپەندياسىن تاعايىنداۋ كونكۋرسىنا قاتىسۋ ءۇشىن قۇجاتتاردى قابىلداۋ وسى جىلعى 4 مامىردان 28 قازانعا دەيىن جالعاسادى.
وتىرىس قورىتىندىسى بويىنشا قىرىمبەك كوشەرباەۆ بىرقاتار ناقتى تاپسىرمالار بەردى. ونىڭ ىشىندە «بولاشاق» باعدارلاماسى ستيپەندياتتارىنىڭ وقۋ جانە ەڭبەكپەن وتەۋ بارىسىن باقىلاۋ جانە قاداعالاۋدى كۇشەيتۋ ماسەلەسىنە باسا نازار اۋداردى.
«بولاشاق» حالىقارالىق ستيپەندياسى يەگەرلەرىنىڭ ءتىزىمى حالىقارالىق باعدارلامالار ورتالىعىنىڭ رەسمي سايتىندا جاريالاندى.
