نۇر-سۇلتان قالاسىندا مەملەكەتتىڭ سىبايلاس جەمقورلىققا قارسى ستاندارتتاردى ساقتاۋىن مونيتورينگتەۋ بويىنشا باعالاۋ راۋندى شەڭبەرىندە قر ءىىم دەلەگاتسيالارىنىڭ جانە ەۋروپا كەڭەسىنىڭ سىبايلاس جەمقورلىققا قارسى مەملەكەتتەر توبىنىڭ (گرەكو) كەزدەسۋى ءوتتى.
ماقساتى – مينيسترلىكتىڭ سىبايلاس جەمقورلىققا قارسى ءىس-قيمىل سالاسىنداعى ەۋروپا كەڭەسىنىڭ ستاندارتتارىنا سايكەستىگىن باعالاۋ. قازاقستان ءىىم-ءنىڭ اتىنان ءىىم وزىندىك قاۋىپسىزدىك دەپارتامەنتىنىڭ باستىعى ارمان سادانوۆ, قۇرىلىمدىق بولىمشەلەردىڭ باسشىلارى مەن ۆەدومستۆو قىزمەتكەرلەرى قاتىستى.
ارمان سادانوۆ سىبايلاس جەمقورلىققا قارسى كۇرەس سالاسىندا شەتەلدىك ارىپتەستەر جيناقتاعان وزىق تاجىريبەنى قولدانۋعا جانە قابىلداۋعا دايىن ەكەنىن اتاپ ءوتتى.
«حالىقارالىق ىنتىماقتاستىق – ءبىزدىڭ جۇمىسىمىزدىڭ نەگىزگى باعىتتارىنىڭ ءبىرى. مەملەكەتتەردىڭ ءوزارا ءىس-قيمىلى سىبايلاس جەمقورلىققا قارسى بىرىڭعاي ستاندارتتاردى بەلگىلەۋگە, ازاماتتاردىڭ, زاڭدى تۇلعالاردىڭ جانە مەملەكەتتىڭ قۇقىقتارى مەن زاڭدى مۇددەلەرىن ءتيىمدى قورعاۋعا ىقپال ەتەتىنى ءسوزسىز», دەدى ا. سادانوۆ.
سونىمەن قاتار ىشكى ىستەر ورگاندارىندا سىبايلاس جەمقورلىققا قارسى نورماتيۆتىك قۇقىقتىق بازانى دامىتۋ تۋرالى ايتتى.
«سىبايلاس جەمقورلىقتان تۋىندايتىن قاتەرلەردىڭ جاھاندىق سيپاتىن ءتۇسىنىپ, سىبايلاس جەمقورلىققا قارسى ءىس-قيمىلدىڭ بارلىق ىقتيمال شارالارىن قابىلداپ جاتىرمىز. ناتيجەسىندە, سوڭعى ءۇش جىلدا قىزمەتكەرلەر جاساعان سىبايلاس جەمقورلىق قىلمىستارىنىڭ سانى 43%-عا, جىل باسىنان بەرى قىلمىستاردىڭ جالپى سانى 15%-عا, ونىڭ ىشىندە سىبايلاس جەمقورلىق 8%-عا قىسقاردى», دەدى ول.
سونداي-اق ساراپشىلارعا قازاقستاندىق پوليتسيانى اۋقىمدى رەفورمالاۋ, ادام قۇقىقتارى جونىندەگى حالىقارالىق ستاندارتتاردى زاڭناماعا ەنگىزۋ, سونداي-اق سىبايلاس جەمقورلىققا قارسى ءىس-قيمىل بويىنشا جۇرگىزىلىپ جاتقان جۇمىستار تۋرالى اقپاراتتار بەرىلدى.
كەزدەسۋ بارىسىندا قازاقستان تاراپىنىڭ وكىلدەرى گرەكو ساراپشىلارىنىڭ ىشكى ىستەر ورگاندارىنىڭ فۋنكتسيالارى مەن مىندەتتەرىنە, ونىڭ وكىلەتتىكتەرى مەن باعىنىستىلىعىنا, پوليتسەيلەردىڭ كاسىبي دايارلىعىنا بايلانىستى سۇراقتارىنا جاۋاپ بەردى. گرەكو ماماندارى قازاقستان ءىىم-ءنىڭ سىبايلاس جەمقورلىق تاۋەكەلدەرى مەن كورىنىستەرىنە قارسى ءىس-قيمىلعا, سونداي-اق ولارمەن كۇرەسۋ ءۇشىن بىرلەسكەن ءتيىمدى شەشىمدەردى ازىرلەۋگە قوسقان ۇلەسىن اتاپ ءوتىپ, ۆەدومستۆو وكىلدەرىنە ۇسىنىلعان اقپارات ءۇشىن العىس ءبىلدىردى.
انىقتاما: سىبايلاس جەمقورلىققا قارسى ەلدەر توبى 1999 جىلى وسى ۇيىمعا كىرگەن ەلدەردە ەۋروپا كەڭەسىنىڭ سىبايلاس جەمقورلىققا قارسى ستاندارتتارىن مونيتورينگتەۋ ءۇشىن قۇرىلعان. گرەكو-نىڭ مىندەتى – وسى سالاداعى ەۋروپا كەڭەسىنىڭ ستاندارتتارىن ساقتاۋ مونيتورينگى ارقىلى سىبايلاس جەمقورلىققا قارسى كۇرەس جونىندەگى جۇمىستى ۇلتتىق دەڭگەيدە جەتىلدىرۋ. گرەكو قۇرامىنا جالپى حالقى 1,2 ميللياردقا جۋىق ەۋروپا, امەريكا جانە ازيا مەملەكەتتەرى كىرەدى. 2020 جىلعى 1 قاڭتاردا قازاقستان گرەكو-عا 50-ءشى مۇشە مەملەكەت بولدى. اعىمداعى جىلدىڭ 7-10 قىركۇيەكتە قازاقستان العاش رەت گرەكو تاراپىنان مەملەكەتتىڭ سىبايلاس جەمقورلىققا قارسى ستاندارتتاردى ساقتاۋى بويىنشا باعالاۋدان ءوتتى.
