قارجى • 08 قىركۇيەك، 2021

كەشبەك بەرىپ جارىلقاۋدا

43 رەت كورسەتىلدى

ءبىرىنشى جارتىجىلدىق قورىتىندىسى بويىنشا ەلىمىزدە 54 ملن تولەم كارتاسى اينالىمدا ەكەن. بۇل ءبىر اي بۇرىن ۋاقىتپەن سالىستىرعاندا 0،6 پايىزعا جوعارى كورسەتكىش. ال ءبىر جىلدىق دەڭگەيدەن 34،4 پايىزعا كوپ. البەتتە، كارتا تەك اقشا شەشىپ الۋعا مۇمكىندىك بەرەتىن قۇرال عانا ەمەس، كارتا ارقىلى ءتۇرلى كەشبەكتەر مەن بونۋستار يەلەنۋگە بولادى. 

بانكتەر كليەنت اۋديتورياسىن كەڭەيتۋ ءۇشىن ءتۇرلى جوبالار مەن جەڭىلدىكتەر ۇيىمداس­تىرا­دى. ەلدەگى 25 بانكتىڭ 17-ءسى جەكە تۇلعالارعا ارناپ كارتا ۇسىنىپ وتىرسا، سونىڭ 9-ى – ۇز­دىك وندىق قاتارىنداعىلار. Finprom اگەنتتىگى Gold كلاسىنا دەيىنگى كارتالاردىڭ مۇمكىندىگىن زەردەلەپ كورگەن ەكەن. 0،5-2 پا­يىز ارالىعىنداعى كەپىلدەندىرىل­گەن كەشبەكتى Bank RBK ۇسىنا­دى. ەگەر كليەنتتە دەپوزيتىن­دەگى قارجى 1 ملن تەڭگەدەن جوعارى بولسا 1 پايىز كەپىلدى كەشبەككە تاعى 1 پايىز قوسىلادى، كارتاداعى 100 مىڭ تەڭگەدەن استام قالدىق ءۇشىن – 1 پايىز جانە تاعى كونتاكتىسىز تولەم ءۇشىن 1،5 پايىز بەرىلەدى. ناتيجەسىندە، 4،5 پايىز كەشبەك جينالادى.

4 پايىزعا دەيىن شەكتەۋلى مەرزىمدە «ەۋرازيالىق بانك» كارتاسى بويىنشا الۋعا بولادى. وندا كەپىلدى كەشبەك نەبارى 0،5 پايىزدى قۇرايدى، العاشقى ءۇش ايدا ول ەكى ەسەلەنەدى. سوماسى 1 ملن تەڭگەدەن اسسا، دەپوزيت ءۇشىن دە 1 پايىز قوسىلادى، كونتاكتىسىز تولەم ءۇشىن 2 پايىز ەسەپتەلەدى.

«بانكتەردەن اسا ءىرى كەشبەك­تى سۇيىكتى كاتەگوريالار ارقى­لى الۋعا بولادى (سۋپەرماركەت، جانار-جاعارماي بەكەتى، اپتەكا، سپورت تاۋارلارى، ت.ب.) سۇيىكتى كاتەگورياڭ ءۇشىن ەڭ ۇلكەن كەشبەك – Bank RBK-دا – 20 پايىزعا دەيىن. ودان سوڭ 15 پايىزعا دەيىن كەشبەك بەرەتىن ForteBank پەن Jusan Bank، 10 پايىزعا دەيىن بەرەتىن – «بانك تسەنتركرەديت» كەلەدى. Kaspi Bank ونداي كاتەگوريا اياسىندا 3 پايىزعا دەيىن بەرەدى، ويتكەنى كاتەگوريانى بانكتىڭ ءوزى تاڭدايدى. ال «ەۋرازيالىق بانك» سۇيىكتى كاتەگوريا ءۇشىن نەبارى 1 پايىز قوسادى» دەپ جازادى Finprom.

«الفا-بانك» كليەنتتەرگە 50 مىڭ تەڭگە كولەمىندەگى كەپىلدى كەشبەك ۇسىنۋعا دايىن. بىراق ءبىر جىل تولعان سوڭ عانا. تاعى ءبىر تالابى – سول ءبىر جىلدا كارتا ارقىلى 1،2 ملن تەڭگە جۇمسالۋى ءتيىس. سونداي-اق «بانك حوۋم كرەديت» تە 33 پايىزعا دەيىن كەشبەكپەن جارىلقايدى. الايدا ونىڭ تالابى دا – تاۋداي: ۆاليۋتالىق دەپوزيتتە 25 مىڭنان 100 مىڭ دوللارعا دەيىن ارالىقتا اقشا جاتۋى ءتيىس جانە كارتا ارقىلى اي سايىن 125-500 دوللار كولەمىندە ساۋدا جاسالۋى كەرەك.

سوڭعى جاڭالىقتار

ۇقساس جاڭالىقتار